هێڤیا خوه‌ ب باباجان ڤە گرێددن

وه‌زیرێ ده‌رڤه‌ یێ به‌رێ عەلی باباجان ب پشتگریا سه‌رۆککۆمارێ به‌رێ عەبدوڵا گول پارتیه‌ک نوو ئاڤا دکه‌. باباجان د به‌رنامه‌یا پارتیا خوه‌ ده‌ دخوازه‌ به‌حسا پرسا کورد ژی بکه‌. ژ بۆ ڤێ یه‌کێ باباجان ل ئه‌نقه‌ره‌ دو ڕۆژان هنده‌ک که‌سایه‌تێن کورد ڕه‌ جڤینه‌ک کر و ڤێ جڤینێ دو ڕۆژان به‌رده‌وام کر.

کۆرادیناتۆرێ پێڤاژۆیا “ئاشتیێ“ وه‌زیرێ به‌رێ بەشیر ئاتالای ژی ته‌ڤلی جڤینێ بوو. ژ کوردان ژی که‌سێن وه‌ک مه‌سوت یه‌گه‌ن، ڤاهاپ جۆشکون، سنان هاکان، مه‌همه‌ت ئه‌من ئاکتار، یوسوف ئالاتاش، ئابدولباک ئه‌ردۆگموش و سه‌رتاچ بوجاک ته‌ڤلی جڤینێ بوون.

لێ پشتی جڤینێ ژ کوردێن کو ته‌ڤلی جڤینێ بوویین چ  داخوویانیه‌ک به‌لاڤ نه‌کرن و به‌حسا ناڤه‌رۆکا جڤینێ نه‌کرن.

هنده‌ک کورد ل باکورێ کوردستانێ پرسا کورد وه‌ک پرسه‌ک سیاسی و نه‌ته‌وەیی نابینن و د ته‌ڤاهیا ترکیه‌بوونێ ده‌ وه‌ک پرسه‌کا ده‌مۆکراس و جڤاکی دبنن. هه‌تا گه‌له‌ک ژ ڤان کوردان ژی هه‌ول ددن ب ناڤێ کورده‌یاتیێ ببن پارله‌مه‌نته‌ر یان ژی به‌رژه‌وه‌ندیه‌کی که‌سایه‌تی ده‌ستڤه‌ بینن. که‌سایه‌ته‌ک وه‌ک سه‌رتاج بوجاک ژ بۆ ڤێ یه‌کێ ده‌سته‌ خوه‌ ل هه‌موو ده‌ریه‌کی دده‌.

بوجاک زێده‌یی ۳۰ سالا د ناڤا پەسەکێ ده‌ وه‌ک به‌رپرسیار سیاسه‌ت کر، ڤه‌گه‌ریا بوو سه‌رۆکێ هاک پارێ، د تەرەتە ٦ێ ده‌ به‌رنامه‌ چێکرن، داوییێ خوه‌ ئاڤێت د ناڤا باسکه‌ک یێ پدک ئا ترکیه‌ ده‌ و وه‌ک میسیۆنه‌کی پدک پارچه‌ کر. هه‌ری داوی خوه‌ ڕاده‌ستی هەدەپێ کر. نها ژی هیڤیا خوه‌ ژ بۆ پارله‌مه‌نته‌ریه‌کی پارتیێن نوو به‌نه‌ ئاڤاکرن ڤه‌ گرێدایه‌.

باش تێ زانین کو بوجاک، کارداش و هنده‌ک دن وه‌ک وان د هلبژارتنێن ل پێشیا ترکیه‌ ده‌ ژ هەدەپێ دبن کاندیدات و ممکنه‌ حه‌سره‌تا دلێ وان پێک وه‌رێ.

کورد ل باکور دڤێ به‌حسا ڕاستیه‌کی بکن و ژ بلی ڕه‌خنه‌یا و هه‌لوه‌ستێن سیاسی بازرگانێن سیاسی تازی بکن. به‌حسا وان و زه‌ره‌را ددن ته‌ڤگه‌را کورد بکن.

ل ترکیه‌ چ پارتیێن سیاسی نه‌وێرن ژ خه‌تا سیسته‌ما ده‌وله‌تێ ده‌رکه‌ڤن و ب ئاوایه‌ک ڕادیکال به‌حسا پرسا کورد بکن. هنده‌ک کورد ته‌نێ شیره‌تان ل پارتیان دکن و ڕێیا کا چه‌وا ده‌نگێ کوردا بگرن نیشا وان ددن.

هنده‌ک کوردێن کو ب ڤه‌کری دیتنێن خوه‌ ژ بۆ پرسا کورد ددن کفشکرن ژی، ژ ئالیێ پارتیێن سیسته‌مێ ڤه‌ هه‌موو ده‌ری ل وان تێنه‌ گرتن. ژ بۆ ڤێ ئیرۆ گه‌له‌ک که‌سایه‌تێن نشتمان په‌روه‌ر بێ ده‌نگن. ل باکورێ کوردستانێ هه‌تا کو سیاسه‌تمه‌دار و که‌سایه‌تێن کورد نکاربن به‌حسا ڕاستیا دۆزا خوه‌ بکن و ل سه‌ر خه‌ته‌ک نه‌ته‌وی پرسا کورد نه‌پارێزن. دێ هه‌ر له‌یزتکبن د ناڤا لنگێن سیاسه‌تمه‌دارێن ترک ده‌ بن