رەوشا تركیێ ل ئێدلبێ تێكدچە
د سیاسه‌تا سوریێ دا ترکیا که‌تیه ته‌نگاسیه‌ک مه‌زن دا و نزانە دێ چه‌وا خوه ژوێ تەنگاسیێ خلاس بکه. تێ زانین کو ترکیا هنده‌ک هه‌رێمێن سوریێ و ڕۆژاڤایێ کوردستانێ داگیر کرنه و ل وان ده‌ڤه‌ران ب ڕێیا هنده‌ک هێزێن ئۆپۆزسیۆنێ ده‌ستهلاتداریا خوه سەپاندیە. لێ ڕۆژ ب ڕۆژ ل سوریێ سیاسه‌ت تێ گوهه‌رتن و ڕه‌وش زه‌لالتر دبه.
هێزێن ڕژێما سوریێ ب پشتگریا ڕوسیایێ ئێریشێ سەر ئێدلبێ دکه و ڕۆژ ب ڕۆژ نێزکی باژێر دبه، ژ ترسا ئێریشێن لەشكەرێ سوریێ ب سه‌د هه‌زاران خه‌لکێ ئێدلبێ به‌ر ب سنۆرێ ترکیێ ڤه کۆچبه‌ر دبن. ترکیا که‌تیه د ناڤا ته‌نگاسیه‌کێ دا کو نزانە دێ چه‌وا بکه. ھژمارا مه‌زنا یا کۆچبه‌ران به‌رێ خوه دانه ترکیێ و ڕه‌وشا وان خرابه.
ژ ئالیه‌ک دن ڤه ترکیا هه‌ول دده هێزێن خوه یێن ل ئدلبێ د خالێن چاڤده‌ریێ دا ب هێزتر بکه. ژ بۆ ڤێ مه‌به‌ستێ هێزێن له‌شکه‌ری به‌ر ب سنۆرڤه کۆم دکه. ئانكو دھێتە چاڤەرێكركن كو د داویێ دا لەشكەرێ ترکیێ و لەشكەرێ ڕژێما سوریه ل ئێدلبێ بكەڤن بەر سینگا ھەڤ و د ناڤبەرا وان دا شەر دەركەڤە. پەیوندیێن ئه‌وله‌هیێ د ناڤبەرا ڕژێما سوریێ و ترکییێ دا، دێ هه‌تا چ ڕاده‌یێ بکاربن ڕێ ل پێشیا شه‌ره‌کی ڕاسته‌راست د ناڤبه‌را ڕژێما سوریێ و ترکیێ دا بسه‌کنینه ناھێتە زانین.
ترکیا ل سه‌ر ئاخا سوریێ شه‌رێ هێزێن ڕژێمێ بکه تێ واته‌یا کو ئەو شه‌رێ ڕوسیا ژی ل ده‌ڤه‌رێ دکه. ترکیا نکاره ڤێ یه‌کێ ڕاگره. ژ خوه ئه‌ردۆگان دده خوویاکرن کو ڕوسیا به‌رپرسیاریا خوه یا ل پەیمانا ئاستانا و سۆچی پێکنەئینایە و روسیا د پراكتیكێ دا ل دژی ڤان په‌یمانان ته‌ڤدگه‌ره.
ئه‌ردۆگان ژ ئەمریكایێ را دبێژه: یان ئه‌ز یان ھێزێن سوریا دەمۆكرات (هەسەدە)، ژ ڕوسیایێ را ژی دبێژه یان ئه‌ز یان ڕژێما ئه‌سەد. ترکیا دزانه کو نه ئەمریكا دەست ژ هەسەدێ به‌ردده و نه ژی ڕوسیا پشتا خوه دده ڕژێما سوریێ. لێ هه‌ر ده‌می سیاسه‌تا ترکیێ دکاره د ده‌ربارێ ڕژێما ئه‌سەد دا بھێتە گوهه‌رتن. سیاسه‌تا ترکیێ ل سوریێ و هه‌رێمێ، سیاسه‌تا ڕێخستنا برایێن مسلمانه. ژ بۆ ڤێ یه‌کێ ژی ناوه‌ندا وێ سیسەتێ نه تەنێ ل ترکیێ یه.
ژ ئالیێ کوردان ڤه هنده‌ک هه‌ولدان ژ بۆ یه‌كێتیەكا د ناڤبه‌را ئەنجومەنا كورد ل سوریێ (ئه‌نەکەسە) و پارتیا یەكێتیا دەمۆكراتیك (پەیەدە) ێ دا هه‌یه. هه‌لوه‌ستا فه‌رماندارێ هەسەدێ مەزلوم عه‌بدی د ڤێ ده‌ربارێ دا گرنگه. گه‌ر هات و یه‌کتیه‌ک بێ ئاڤاکرن ل ڕۆژاڤایێ کوردستانێ کورد بیه‌ک ده‌نگیا خوه دکارن هه‌رێما کوردستانێ بپارێزن و دانوستاندنان دا ببن ئاکتۆره‌ک ئه‌ساسی.
ئه‌نەکەسە و پەیەدە ل هه‌ڤ بکن و هێزێن خوه یێن سیاسی و له‌شکه‌ری بکن یه‌ک، دێ باندۆرا خوه ل سیاسه‌تا ترکیێ ژی بکه و هێدی ترکیا سه‌ده‌مێن کو دده پێش و ئێریشێ ڕۆژاڤایێ کوردستانێ دکه، ژ ده‌ست دده. ژ بۆ کوردا سه‌رکه‌ڤتن د یه‌کێتیه‌کێ ڕا ده‌رباس دبه.
