مستەفا ئوزچەلیك: یەكێتیا نەتەوەیی ب پێشكێشیا ھەدەپێ ئاڤا نابە
رۆژەڤاكورد: ھنده‌ک پارتی و ئالیێن سیاسی ب پێشكێشیا هەدەپێ به‌حسا ئاڤاكرنا یه‌کێتیا نەتەوەیی دکن، لێ هنده‌ک پارتی و ئالیێن دن یێن کوردستانی ژ ده‌رڤه‌یێ هەدەپێ هه‌نه و ئه‌و هێز خوه وه‌ک هێزێن کوردستانی و نه‌ته‌وەیی ب ناڤ دکن. هه‌روه‌ها گه‌له‌ک که‌سایه‌تی، سیاسه‌تمه‌دار، نڤیسکار و ره‌وشه‌نبیرێن کورد هه‌نه کو دخوازن یەكێتیەكا نەتەوەیی ئاڤا بكن.
پرسا مه ئه‌وه: هون وه‌ک پارتیا ئازادیا كوردستانێ ( پاک)ێ د ڤێ ده‌ربارێ ده چ دبێژن و ژ بۆ ئاڤاکرنا یه‌کتیه‌ک نه‌ته‌وەیی چ پێشنیارێن وه هه‌نه ؟ گه‌لۆ ژ بۆ ڤێ یه‌کێ هه‌ولدانێن وه وه‌ک پارتی هه‌نه؟ ئەگەر هه‌بن هون دکارن به‌حسێ وان ھەولدانان بکن؟
به‌رسڤ:
دڤێ ئه‌م ژ گه‌لێ خوه را هه‌ڤکاری و تفاقێن راسته‌قین یێن نه‌ته‌وەیی بهوونن
پرسا تفاق و هه‌ڤکاریێن نه‌ته‌وەیی، ژ به‌ر کو پرس و پێویستییه‌کا گه‌لێ مه یا ئه‌ساسی یه، هه‌ر د رۆژه‌ڤا مه دا یه. لێ مخابن، ژبۆ کو ئه‌ڤ تفاقا نه‌ته‌وەیی پێک نه‌یێ، ژبۆ کو شێلوو و لاواز ببه ژی، گه‌له‌ک پیلان و مداخه‌له و سیاسه‌ت ژی دھێنە مه‌شاندن.
ل گۆر مه ل باکورێ کوردستانێ مخاتەبێ تفاقا نه‌ته‌وەیی ، ئه‌و پۆتانسیه‌ل و ئالیێن کو هه‌بوونا مله‌تێ کورد، هه‌بوونا کوردستانێ قه‌بوول دکن؛ ل کوردستانێ ستاتویه‌کا سیاسی ژبۆ گه‌لێ کوردستانێ دپارێزن؛ مافێ نه‌ته‌وەیی، ده‌مۆکراتیک یێن مله‌تێ کورد دپارێزن؛ ل ئالا کوردستانێ و هه‌موو نرخ و هێژایی و سه‌مبۆلێن نه‌ته‌وەیی، نشتمانی خوه‌دی ده‌ردکه‌ڤن؛ ئه‌و ئالیێن کو ژ یه‌کرێزی و یه‌کگرتنه‌کا نه‌ته‌وەیی باوه‌ر دکن؛ ئه‌و ئالییێن کو رێزێ ل ئازادی و ده‌مۆکراسیا ناڤخوه‌یی و ل هه‌ڤدو دگرنه.
ب پێشکێشیا هەدەپە، دەبەپە، دەتەکەیێ “۱۰ پارتی و حه‌ره‌که‌تان” ، ژ بۆ کو ئه‌م ژی به‌شداری جڤینێن وان یێن ب ناڤێ “هه‌ولا ئاڤاکرنا تفاقه‌کا نه‌ته‌وەیی” ببن، پێشنیار ژ پارتییا مه را ئانین. لێ پارتیا ئازادیا كوردستانێ (پاک) و پارتیا سوسیالیستا كوردستانێ (پەسەک)ێ د رۆژا 2019.12.04 دا نامه‌یه‌ک ژ ڤان “۱۰ پارتی و حه‌ره‌که‌تان” را شاندن و گۆتن:
“ئه‌م ڤێ خه‌باتێ وه وەكو خه‌باتا ئاڤاکرنا تفاقا نه‌ته‌وەیی نابینن. هەدەپە ژ ئالیه‌کی ڤه خوه وه‌که پارتیه‌کا ترکیه‌یی پێناسه دکه، لێ ژ ئالیێ دن ڤه ژی پێشکێشیا ئاڤاکرنا تفاقا نه‌ته‌وەیی ل باکورێ کوردستانێ دکه؛ ئه‌ڤ نه راسته، نه ماقووله. پارتیه‌کا ترکیه‌یی نابه کو پێشکێشیا تفاقا نه‌ته‌وەیی بکه، نابه د ناڤ تفاقا نه‌ته‌وەیی دا جھ بستینه. ب ئاکتۆرێن شاش، ئه‌نجامێن راست نه ممکنه ده‌رکه‌ڤن هۆلێ. ته‌جروبه‌یێن مه یێن د گه‌ل هەدەپە، دەبەپە، دەتەکەیێ یێن د ده‌ربارێ بهه‌ڤرا خه‌باتێ ژی نیشانی مه ددن کو، هەدەپە، دەبەپە، دەتەکە ل پشت ئیمزایێن خوه راناوه‌ستن، سۆزێن خوه بجھ ناینن و رێزێ ل هه‌ڤکارێن خوه ناگرن. ژبه‌ر ڤان سه‌به‌بان ژی ئه‌م به‌شداری ڤێ هه‌ولا وه نابن”.
ئه‌م وه‌که پاک و پەسەکە به‌شداری ڤان خه‌باتێن کو ب پێشکێشیا هەدەپە، دەبەپە، دەتەکەیێ ڤە دھێنە مه‌شاندن نه‌بوون و نابن.
مه هه‌ول و خه‌باته‌کا نوو ژ بۆ تفاق و هه‌ڤکاریه‌کا راسته‌قین ئا نه‌ته‌وەیی ده‌ستپێ کرییه.
پاک و پەسەکەیێ د رۆژا 2020.01.12 دا ل ئامه‌دێ جڤینه‌که ب به‌شادریا نوونه‌رێن پاک، پەسەکەیێ، چاڤدێرێن هاک-پارێ و گه‌له‌ک سیاسه‌تڤانێن نه‌ته‌وەیی، یێن ژ ترادیسیۆنا پەدەکەیێ، یێن ژ گرووب و ترادسیۆنێن جودا جودا ، یێن ژ دیندارێن کورد یێن ژ باکورێ کوردستانێ ل دار خستن. جڤین ژبۆ نرخاندن و گاڤئاڤێتنا هه‌ڤکاری و تفاقه‌کا نه‌ته‌وی گه‌له‌کا به‌رهه‌مدار ده‌رباس بوو.
نوها ژی ئه‌م دخوازن، د رۆژێن پێش دا، ل ئامه‌دێ، ب ئاماده‌کاری و ب به‌شدارییا پاک، پەسەکە، هاک-پار، پۆتانسیه‌لا پەدەکەیێ یا ل باکورێ کوردستانێ و ل ترکیێ، پۆتانسیه‌لا دیندار یا نه‌ته‌وەیی، کادرۆ و گروپێن نه‌ته‌وەیی، نشتمانی یێن ل باکورێ کوردستانێ جڤینه‌کا به‌رفرھ، کۆنفه‌رانسه‌کێ ب ئارمانجا نرخاندن و ته‌سبیتکرنا پره‌نسیپێن هه‌ڤکاری و تفاقا نه‌ته‌وەیی ل دار بخن. هه‌ڤدیتن و خه‌باتێن مه یێن ژبۆ لدارخستنا ڤێ جڤینا به‌رفرھ، ژبۆ ڤێ کۆنفه‌رانسێ به‌رده‌وامن.
ب پێشکێشیا هەدەپە، دەبەپە، دەتەکەیێ “۱۰ پارتی و حه‌ره‌که‌تان” د رۆژێن 18 و 2020.01.19 دا ل ئامه‌دێ کۆمخه‌باته‌ک ل دار خستن. به‌ریا ڤێ کۆمخه‌باتێ، حه‌ره‌که‌تا ئازادی داخویانیه‌ک دا و گۆت “ئه‌م دێ به‌شداری ڤێ کۆمخه‌باتێ نه‌بن”. پەدەکە پلاتفۆرم ژی به‌شداری ڤێ کۆمخه‌باتێ نه‌بوو؛ لێ هه‌تا نوها ئاشکه‌را نه‌کریه کا ژ بۆ چ به‌شدار نه‌بوویه. نوها ئه‌ڤ خه‌بات ل گه‌ل هەدەپە، دەبەپە، دەتەکەیێ ، ب به‌شدارییا “٥ پارتی و گروپێن” دن تێ مه‌شاندن.
ئه‌ڤ خه‌بات و هه‌ولا کو ب پێشکێشیا هەدەپە، دەبەپە، دەتەکەیێ ڤه تێ مه‌شاندن، ل گۆر مه، ب ئارمانج و پێکهاته و شێوه‌یێ خه‌باتا خوه ڤه نه هه‌وله‌که ژبۆ ئاڤاکرنا تفاقه‌کا نه‌ته‌وەیی یه. هه‌روه‌ها د ده‌ربارێ ب هه‌ڤرا خه‌باتێ دا، ب تایبه‌تی ژی ، ده‌رباسبووینا هەدەپە، دەبەپە، دەتەکەیێ ب گه‌له‌ک نموونه‌یێن نه‌گاتیف، یێن کو ب بێباوه‌رییێ ڤه هووناندی ژی ل به‌ر چاڤانه.
هه‌گه‌ر ئه‌م ڤێ خه‌باتا ب پێشکێشیا هەدەپە، دەبەپە، دەتەکەیێ ڤه تێ مه‌شاندن وه‌که خه‌باتا تفاقا راسته‌قین یا نه‌ته‌وی نابینن؛ وێ گاڤێ دڤێ ئه‌م ل سه‌ر پره‌نسیپ و نرخ و رێبازێن نه‌ته‌وەیی ، نشتمانی ، ل باکورێ کوردستانێ ژ گه‌لێ خوه را رێیا هه‌ڤکاری و تفاقێن راسته‌قین یێن نه‌ته‌وەیی، نشتمانی نیشان بدن و بهوونن.
لێ ژبۆ کو ئه‌م بکاربن رێیا راست نیشانی گه‌لێ خوه و نیشانی وێ پۆتانسیه‌لا نه‌ته‌وەیی یا د ناڤ هەدەپە، دەبەپە، دەتەکەیێ دا بدن؛ دڤێ ئه‌م خوه ژ سییا هەدەپە، دەبەپە، دەتەکەیێ دوور بخن. هه‌گه‌ر ئه‌م بکه‌ڤن بن سییا هەدەپە، دەبەپە، دەتەکەیێ، ئه‌م دێ نکاربن رێیا راست نیشانی گه‌لێ خوه ژی، نیشانی وێ پۆتانسییه‌لا نه‌ته‌وەیی یا د ناڤ هەدەپە، دەبەپە، دەتەکەیێ دا ژی بدن. په‌یڤه‌کا کوردی یا خوه‌ش هه‌یه، دبێژه “د بن سیا دارا گویزێ دا گیا شین نابه”. هه‌لبه‌ته ژبه‌ر ڤێ راستیێ، نابه کو ئه‌م دارا گویزێ ببرن. لێ دڤێ ئه‌م باش بزانبن کو د بن سیا ڤێ رێڤه‌بری و سیاسه‌تا هەدەپە، دەبەپە، دەتەکەیێ دا کوردایه‌تی گه‌ش نابه، هه‌ڤکاری و تفاقێن نه‌ته‌وی نایێن ئاڤا کرن.
لێ به‌لێ دڤێ ئه‌م د گۆتن و هه‌لوه‌ستێن خوه دا چێکه‌ر بن؛ دڤێ ئه‌م خوه ژ هه‌لوه‌ستێن کو د ناڤ کوردان دا پرسگرێکان کوورتر بکن، دژمناتییێ د ناڤ کوردان دا مه‌زنتر و گه‌شتر بکن دوور بخن. دڤێ ئه‌م ب سه‌بر، ب ئاقلێ سه‌لیم، ب سیاسه‌ته‌کا ماقوول، ته‌سیرێ ل وێ پۆتانسییه‌لا نه‌ته‌وەیی یا د ناڤ هەدەپە، دەبەپە، دەتەکەیێ دا ژی بکن. دڤێ ئه‌م بکاربن ب هه‌لوه‌ست و هه‌ست و بیر و باوه‌رییێن نه‌ته‌وەیی، نشتمانی وێ پۆتانسییه‌لق نه‌ته‌وەیی یا د هەدەپە، دەبەپە، دەتەکەیێ دا ژی ل هەمبه‌ری سیاسه‌تا ئه‌نته‌گراسیۆنێ هشیار بکن. دڤێ ئه‌م نیشانی وێ پۆتانسییه‌لا نه‌ته‌وەیی یا د ناڤ هەدەپە، دەبەپە، دەتەکەیێ دا بکن ، ئه‌و سیاسه‌تا کو که‌دا هه‌موو مله‌تێ مه د ناڤ فکرا “نه‌ته‌وا ده‌مۆکراتیک، وه‌لاتێ هه‌ڤبه‌ش، جمهووریه‌تا ده‌مۆکراتیک” دا دفه‌تسینه ، د ئه‌سلێ خوه دا شکل و وه‌رسییۆنه‌کا نوو یا وێ سیاسه‌تا ده‌وله‌تا ترکیێ یا “یه‌ک ده‌وله‌ت، یه‌ک وه‌لات، یه‌ک مله‌ت، یه‌ک ئالایێ” یه.
به‌لێ، ئیرۆ پێویستیا گه‌لێ مه ب تفاقه‌کا نه‌ته‌وەیی ل باکورێ کوردستانێ هه‌یه. لێ دڤێ به‌ریا هه‌ر تشتی ئه‌م، ئانگۆ وێ پۆتانسییه‌لا نه‌ته‌وی، نشتمانی یا به‌رفرھ یا ل باکورێ کوردستانێ بێنه جه‌م هه‌ڤ، په‌یوه‌ندییێن خوه گه‌رم بکن، ب هه‌ڤ را خه‌باتێن هه‌ڤبه‌ش پێک بینن، هێد هێدی هه‌ڤکاریه‌کا نه‌ته‌وەیی بهوونن. تفاقه‌کا نه‌ته‌وەیی یا مایینده ژی دکاره د ئه‌نجاما ڤان په‌یوه‌ندی، بهه‌ڤرا خه‌بات و هه‌ڤکارییان دا بێ ئاڤا کرن.
2020.02.02
مستەفا ئوزچه‌لیک
سه‌رۆکێ گشتی یێ پارتیا ئازادیا كوردستانێ (پاك
رۆژەڤاكورد
