حکومەتا ھەرێما کوردستانێ ھەمبەر یەکەمین قەبخوازتنێ
خەلکێ کوردستانێ ب گشتی و ئەندام و ئالیگرێن پارتیا دەموکراتا کوردستانێ گەلەک خەون، ھیڤی و ئۆمێد ل سەر کابینەیا ڕێزدار مەسروور بارزانی ئاڤاکرینە، نەمازە ژ ئالیێ خوەشترکرن و سەقامگیریکرنا ڕەوشا ئابۆری یا کو دەرئەنجامێ گەلەک سەدەمێن خویا تێکچبوو.
ھەر ژ دەستپێکا دەستبکاربوونا کابینەیا نوو، ڕێزدار مەسروور بارزانی تەکەز ل سەر نەھێلانا گەندەڵیێ کر کو ئەڤ چەندە داخوازا تەڤایا خەلکێ کوردستانێ بوو.
دڤی بیاڤی دا کابینەیا ڕێزدار بارزانی یەکەمین گاڤا کردار د پەسەندکرنا یاسایا چاکسازیێ دا ھاڤێت، کو ل گۆر شەھرەزایێن یاسایی و ئابۆری ب ڕێکا ڕێکخستنا موچەیێن کارمەندێن حکومەتێ و نەھێلانا دیاردەیا دو-سێ موچەیی و ھەلوەشاندنا خانەنشینیا نەیاسایی دێ کوژمەکێ باش یێ داھاتی ژ بۆ گەنجینەیا حکومەتێ ڤەگەڕینیت. ئەڤ پێنگاڤە ل سەر ئاستێ ناڤخوەیی یێ ھەرێما کوردستانێ گەلەک ب ئەرێنی ژ لایێ خەلکی ڤە ھات پێشوازیکرن و جارەک دن باوەری دناڤ بەرا حکومەتێ و خەلکی دا ئاڤاکر.
د ھەمان دەم دا ل سازیێن حكومەتێ دیاردەیا گەندەلیێ و واستەکاریێ تا ڕادەیەکا بەرچاڤ ل کێمیێ دابوو و سەقامگیری کەتە بازاڕێ کاری و موچە ژی بێ گیرۆبوون د دەمێ خوەدا ھاتن مەزاختن، ڤێ چەندا ھان کێرف و ھەیبەتا حکومەتێ تا ڕادەیەکێ باش بلند کر.
ل سەر ئاستێ ناڤدەولەتی ژی نەمازە پشتی سەرەدانێن مەزنە بەرپرسێن وەڵاتێن ڕۆژئاڤا و ژوان؛ وەزیرێ دەرڤە یێ ئەمریکایێ بۆ ھەولێرا پایتەخت بێی کو سەرەدانا بەغدا بکەت و ھەروەھا بەشداریكرنا سەرۆکێ ھەرێما کوردستانێ د کۆنگرێ داڤۆس یێ بازرگانی یێ ناڤدەولەتی دا، بەشداریكرنا سەرۆكوەزیرێ كوردستانێ د کۆنگرێ مونشن یێ ئاسایشێ دا و ئەو کۆم جڤینێن بەرفرەھ یێن دگەل وەزیر و سەڕۆک وەڵاتێن جیھانی ئەنجامداین، نەخاسمە ھەڤدیتنا ڕێزدار نێچیرڤان بارزانی و شاندێ پێ را دگەل سەڕۆک ترامپ، نە ب تەنێ پێگەھێ ھەرێما كوردستانێ ڤەگەراندە سەر ئاستێ خوەیێ پێشی لێ بەلێ ل سەر ئاستێ ناڤدەولەتی بھێزتر ژی لێکر نەخاسمە پشتی ئالۆزبوونا ڕەوشا ناڤخوەیی یا عێراقێ و دەست ژکارکێشانا عادل عبدالمھدی.
تا ڤێرە وەکی وێ پڵانا ژبۆ ھاتی داڕشتن کارنامەیا حکومەتێ بێ ئاستەنگ بڕێڤە چوو، مخابن بەربەڵاڤبوونا ڤایرۆسێ کۆرۆنایێ مینا پەژیکەکێ جیھانگیر یەکەمین قەبخواستن بوو ڕاستی حکومەتا كوردستانێ ھاتی و بوویە سەدەمێ ڕاوەستناندا پڕانیا چەمکێن ژیانێ نە پ تنێ ل کوردستانێ لێ بەلێ ل تەڤایا جیھانێ و سەرەڕای وان ڕێکارێن زانستی و وێ سەرەدەریا ساخلەم یا حکۆمەتا كوردستانێ دگەل ڤێ پەتایێ کری کو ل سەرئاستێ ناڤدەولەتی و ل گۆر ھەلسەنگاندنا وڕێکخراوا تەندروستیێ یا جیھانی، كوردستان د رێزا ھەری پێشی دا بوو كو سەركەفتیانە شیای ڤێ پەژیكێ سنوردار بكە و خەلكێ خوە ژی بپارێزە.
لێ مخابن ژ ئالیێ ئابۆریڤە کاریگەریەکا یەکجار مەزن ل سەر کوردستانێ کر نەخاسمە پشتێ داکەتنا بھایێ پەترۆلێ کو مخابن ژێدەرێ ئێکانە و سەرەکیێ داھاتیێ ھەرێما کوردستانێ و عێراقێ یە.
زێدەباری داکەتنا بھایێ پەترۆلێ، نەسەقەمگیریا سیاسی یا عێراقێ بخوە ژی گەفەک مەزنە ل سەر بەردەوامیا ھنارتنا وی کوژمێ پارەی یێ ھەیڤانە ژ بەغدا بۆ كوردستانێ دھێت.
گەلۆ ڕێکارێن حکومەتا كوردستانێ ل ھەمبەر ڤان گەفێن ل سەر ئابۆرێ وێ چنە؟ خەلکێ کوردستانێ شیانێن بەرگریا ڤێ ڕەوشێ ھەیە؟ گەلۆ حکومەتا ڕێزدار مەسروور بارزانی دڤێ ڕەوشێ دا دێ شێت درێژیێ ب پڕۆژێ خوە یێ چاکسازیێ بدە؟ یان پەتایێ کورونایێ ڕەوشەکا دەمکیە و دێ دەرباس بیت؟
كارنامەیا ڤێ كابینەیێ كارنامەیەكا گەلەك زەنگینە، چەند خالێن گەلەك گرنگ و ستراتیژی ژ بۆ ئەنجامدانا چاكسازیان تێ دا ھەنە، پشتی ڤێ كریزێ دڤێ حكومەت ب جدی ل سەر وان خالان راوەستە و بجھبینە.
