سوشيال مەديا و مەترسيێن وێ
د جيهانا ئەڤرۆ دا خراب بكارئينانا سوشيال مەديايێ ژ لايێ بكاربەرێن وێڤە وەك مەزنترين گەڤ ل سەر مروڤاتيێ دهيێتە قەبوولكرن، ڤايروسىێ سوشيال مەديايێ كوژەكترە ژ كوڤيد/19 و هەمى ڤايروسێن ديتر.
دگەل كو بازرگانيەكا زێدە مەزن ب سوشيال مەديايێ دهێتە كرن، لێ وێ ل سەر سەكتەرێ ئابوورى ل جيهانێ مفايێن خوە يێن مەزن ژی هەنە. د هەمان دەم دا بكارئينانا وێ يا ساخلەم ژى ژ بۆ جڤاكى و تاكێن جڤاكى گەلەك يا مفادارە، چونكى تاك ل سەر رەوشا دەوروبەر و هەموو بوويەر و قەومينێن د جيهانا بچووك يا نوكە دا رووددەن يێ ب ئاگەهە.
سوشيال ميديا ئەڤرو دشێت رايا گشتى بگوهرە، دشێت هزرا ژينگەپارێزيێ بەرەڤ پێش ببە و دشيێت مايتێكرنێ د ياسايێن وەلاتان دا بكە و بەرەڤ ياسايێن مەدەنى و سەردەمانە بگوهرە.
لێ يا ب مەترسى ئەوە دەما كو ل وەلاتەكى ياسايا كارێ ڤان ناڤەندێن سوشيال مەديايێ نەبە، ل وى دەمى كارەسات روددەن و جڤاك ل هەمبەرى خەتەرێ دمينە، لەورا دشێم بێژم ئەوا نوكە ل كوردستانێ ڤەدگەريتەڤە بۆ نەبوونا ياسايا بكارئينانا سوشيال مەديايێ، ئەڤرۆ تابوورێ پێنجێ ب هێسانى دشيێت هەر گوهرينەكا هزرى ل سەر تاكێ كورد ئاڤا بكە ب رێكا تورێن جڤاكى بێى كو چ رێگريەك ل هەمبەرى وان هەبە.
نۆرمالە ل هەر وەلاتەكى پارتيێن دەستهەلاتدار و ئۆپۆزسيون هەنە، هەر دو ئالی ژی شەرى ل سەر كورسيان دكەن و كار ژ بۆ بدەستڤەئينانا زێدەترين دەنگان دكەن و دەما ئێك ژ وان دگەهيتە پەرلەمانى يا ديتر دبە ئۆپۆزسيون، لێ ل وەلاتێ مە هەر تشت بەرۆڤاژيە و مايتێكرنا وەلاتێن جیران ژی كار نە ب تەنێ ل سەر هزرا مە يا سياسى كريە لێ بەلێ مايتێكرن ل سەر چاند، كلتور، ژينگەهـ و هەبوونا مە ژى يا كرى.
ئەگەر باس ل سەر رێگريا ژى بكەين، من نەمەرەمە كو ژيان ب ياسايێن دكتاتوريەتێ بهێنە دورپێچكرن و دەڤ و چاڤێن خەلكى بهێنە گرتن، لێ من مەرەمە كو چێنابە داگيركەرێن وەلاتێ مە بشێن هندە ب ساناهى هزرا تاكێ كورد بگوهرن و وان بەرەڤ ئاقارێن تاريتر ژ داگيركەريێ ببەن.
ئەز دخازم بێژم كو يا فەرە ل سەر پەرلەمانى ياسايەكا ساخلەم و باش و بهێز بۆ بكاربەر و چەوانيا بكارئينانا سوشيال مەديايێ ل كوردستانێ بهێتە دانان و ب جدى كار ل سەر جهگرتنا وێ ژى بهێتەكرن چونكى ب تەنێ هەبوونا ياسايێ بەس نينە لێ بەلێ بجهئينانا وێ مەزنترين خالا سەركەفتنێ يە.
سەردار هێتوتى
2020.04.20
