پەیاما نێچیرڤان بارزانی ژ بۆ رۆژنامەڤانێن كورد
نێچیرڤان بارزانی سه‌رۆکێ کوردستانێ ب هه‌لکه‌فتا رۆژا رۆژنامه‌گه‌ریا کوردی د په‌یامەكێ دا داخوازێ ژ رۆژنامه‌ڤانێن کوردستانێ دکه كو هه‌رده‌م د وێ ئاستێ دا بن کو هشیاری و زانیاریێن راست و دروست و هه‌ڤسه‌نگیێ ڤه‌گوهه‌زن و پاراستنا ئاشتیا جڤاکی و ئارامیا سیاسی و به‌رژه‌وه‌ندیێن بلندێن گه‌ل و وه‌لاتێ خوه ل به‌رچاڤ بگرن.
په‌یاما سه‌رۆکێ هه‌رێما کوردستانێ:
ب هه‌لکه‌فتا سه‌د و بیست و دویه‌مین سالڤه‌گه‌را رۆژنامه‌گه‌ریا کوردی و ده‌رچوونا یه‌که‌م ژمارا رۆژنامه‌یا کوردستان یا میر میقداد به‌درخان یێ ره‌وانشاد کو هه‌ڤده‌مه د گه‌ل بیست و دویه‌مین سالڤه‌گه‌را دامه‌زراندنا سه‌ندیکایا رۆژنامه‌ڤانێن کوردستانێ، ئەز پیرۆزباهیه‌کا گه‌رم ل هه‌موو رۆژنامه‌ڤانێن کوردستانێ دکم و هێڤیا سه‌رکه‌فتن و پێشکه‌تنێ ژ بۆ هه‌موو رۆژنامه‌ڤانان و سه‌ندیکایا وان دخوازم.
ئیسال کو ئەم ڤێ سالڤه‌گه‌رێ ب بیرتینین، کوردستان و جیهان ل به‌ر گه‌فا پەژیكا کۆرۆنایێ و د ره‌وشه‌کا ئالۆز ونە نۆرمال دایه، رۆلا رۆژنامه‌ڤان و مه‌دیاکاران د به‌لاڤکرنا هشیاریا ته‌ندروستی و خوه‌پارێزیێ ژ وێ پەژیكێ و هاندانا وه‌لاتیان كو پێگریێا رێکاران بكن، رۆله‌کا ب باندۆر و به‌ر ب چاڤ بوو، ئەم وێ رۆلا وان ب حورمەت دنرخینین. هێڤیدارین هه‌ر چ زووتره ئه‌ڤ به‌لا ژ ستوکورا مرۆڤایه‌تیێ ڤه‌بە و ژیان ل کوردستان و جیهانێ ئاسایی و نۆرمال ببە.
د ڤێ سالڤه‌گه‌رێ دا وه‌کی هه‌رده‌م پشته‌ڤانیا خوه ژ بۆ رۆژنامه‌ڤان و ئازادیا کارێ رۆژنامه‌گه‌ریێ دووپات دکن. ژ رۆژنامه‌ڤانان ژی چاڤه‌رێ دکین كو هه‌موو ب به‌رپرسیارانه و پیشه‌ییانه، سەرەدەریێ د گه‌ل پرس و بابه‌تان بکن. هه‌رده‌م ئە دەنگێ بلند بن كو هشیاری و زانیاریێن راست و دروست و هه‌ڤسه‌نگیێ ڤه‌دگوهه‌زن و پاراستنا ئاشتیا جڤاکی و ئارامیا سیاسی و به‌رژه‌وه‌ندیێن بلندێن گه‌ل و وه‌لاتێ خوه ل به‌رچاڤ دگرن.
سلاڤ ل بیرانینا رۆژنامه‌ڤانێن شه‌هید و ئه‌و رۆژنامه‌ڤانێن پێشه‌نگێن ژیانا خوه ژ بۆ گەهاندنا راستی و پێشخستنا رۆژنامه‌گه‌ریا کوردستانێ ته‌رخان کرین.
پیرۆزباهیێ ل هه‌موو رۆژنامه‌ڤانان دکم، هێڤیدارم سالا بھێت د ره‌وشه‌که باش و به‌خته‌وه‌ر دا بیرانینا ڤێ رۆژێ و هه‌لکه‌فت و بۆنه‌یێن دن بکین.
نێچیرڤان بارزانی
سه‌رۆکێ هه‌رێما کوردستانێ
2020.04.22
