كارەساتا زێوە ژ رووپەلێن رەشێن رێژما بەعس
سەرۆك مەسعوود بارزانی، ب بیرەوەریا 35 سالیا بومبەبارانكرنا كامپا زێوە، د پەیامەكێ دا دێبژە كو كارەساتا زێوە یەك ژ رووپەلێن رەش یێن رێژما بەعس یا ئیراقێ یە و ئەڤ تاونا درندە و ھۆڤانە چ جارا ناھێتە ژ بیركرن.
د 9ێ حزیرانا سالا 1986ێ دا رژێما بەعس یا ئیراقێ ب ھەشت فرۆكەیێن سیخۆ یێن رووسی ب ئاوایەكێ ھۆڤانا و درندانە پەنابەرێن زێوە كو ھەموو خەلكێ باشوورێ كوردستانێ بوون و پشتی رێكەفتنا خیانەتكارەنەیا جەزائیر و شكەستنا شۆرەشا ئیلونێ ژ بەر زۆلم و زۆرا رژێما سەدامێ دكتاتۆر ل ئیرانێ ببوون پەنابەر و و ل كامپا زێوە ھاتبوون ئاكنجی كرن، لێ ل وێرێ ژی دەستێ رەشێ بەعسیان گەھشتێ و ب سەدان ژن و زارۆكێن بێ گونەھ و بێ تاوان شەھید كرن.
ئەڤ ل ژێر تێكستا پەیاما سەرۆك بارزانی:
ب ناڤێ خودێ مەزن و دلۆڤان
ئیرۆ 35 سال ب سەر بومبەبارانا ئودوگایێ زێوە (كامپا زێوە) دەربا س دبن. د 9ێ حزیرانا سالا 1986ێ دا رژێما بەعس یا ئیراقێ ب ھەشت فرۆكەیێن سیخۆ ب ئاوایەكێ ھۆڤانە پەنابەرێن ئودوگایێ زێوە بومبەباران كر و ھژمارەكا زێدە یا ژن و زارۆكێن بێ تاوان شەھید كر.
كارەساتا زێوە یەك ژ رووپەلێن رەش یێن دەولەتا ئیراقێ یە كو چ جارا ناھێتە ژبیر كرن. رژێما بەعس ب ئەنفال، گرتن و كۆچبەركرنا خەلكێ كوردستانێ نەراوەستا و تاوانا درندانەیا زێوە ژی ئەنجام دا. ھەر كەسێ نالینا برینداران و لاشێن پرتپرتكری و شەوتی یێن شەھیدێن زێوە دیتبان، گەلەك ب باشی ھۆڤیتیا رژێما ھینگێ یا ئیراقێ و مەزلۆمەتیا گەلێ كورد بۆ ئاشكەرا دبوو. د ھەمان دەم ژی دا خوەراگری و مێرخاسیا پەنابەرێن زێوە و دایكا ئەمینا و ب سەدان میناكێن دن یێن گەلێ كورد، پەیامەكا زەلال بوو ژ بۆ ھەموو ئالیان كو دوژمن چەند دلرەق و پرچەك ژی بە نكارە رێ ل ئیرادەیا ئازادیخوازا گەلێ كورد بگرە و سەرشۆر و تێكشكەستێ دمینە.
د ڤێ بیرئانینا دلتەزین دا سلاڤ ژ بۆ جانێ شەھیدێن سەربلندێن زێوە و ھەموو شەھیدێن رێیا ئازادیێ و سلاڤ ژ بۆ جانفیدایی و ئازایەتیا گەلێ كورد.
مەسعوود بارزانی
2020.06.09
