رێکەفتنا ھێزێن ڕۆژئاڤا ئاسۆیەک ژ بۆ پەیوەندیێن باشوور و ڕۆژئاڤا

بێ گومان ھەر نێزیکبووناکا کوردی-کوردی، ژبلی کو ئارامییەکێ دبەخشیتە مێشک و دەروونێ تاکێ کورد، د ھەمان دەم دا گەرەنتیا پاراستنا دەستکەفتێن گەلێ کوردستانێ یە و رێیا خەبات و تێکۆشینێ و گەھشتا ب ئارمانجا داویێ نێزیکتر دکە.

 ئەگەر ئەو تێكگەھشتنێن پێشیێ یێن ھەردوو ھێزێن سەرەکە ل ڕۆژئاڤایێ کوردستانێ، (ئەنەکەسە و تەڤدەم) یێن ل سەر بنەمایێ ڕێکافتنا دھۆکێ یا کو ل ژێر سەرپەرشتیا سەرۆک مسعوود بارزانی دا ھاتیە ئیمزاکرن، وەک خوە بێن جی بجی کرن و بێ پرسگرێک ل سەر عەردێ بێن پراکتیزە کرن، بێ گومان دێ ببە دەستپێکا قۆناغەکا نوو د پرۆسەسا پەیوەندیێن ڕۆژئاڤا و باشوورێ کوردستانێ دا، چ ل سەر ئاستێ تێکەلیێن سیاسی، جڤاکی، چاندی، زانستی و چ ژی ل سەر ئاستێ بازرگانی و ئابۆری.

 ڕەۆش ژی دێ ھێتە نۆرمالیزەکرن و باوەری ژی دێ دناڤ بەرا ھەردوو ئالیان دا ئاڤا ببە. دەرگەھێ سێ مالکا و پێشابیرێ ژی مینا دوو دەروازێن کوردی دێ ژنووڤە وەرار و گەشەبوونەکا بەرفرەھ ژ ئالیێ قەبارە و ئالۆگۆڕیا بازرگانی بخوەڤە ببینە. ئەڤ چەندا ھان ژی، ژبلی کۆ داخوازا گەلێ کوردە و گاڤەکە بەرەڤ سەنت و ئاراستەیەکێ ڕاست، دبەرژەوەندیا گەلێ کورد دایە ل ھەردوو بەشان، نەخاسمە ژ ئالیێ پێشڤەبرنا ئابۆری و دابینکرنا دەلیڤێن کاری و خورتکرنا تێکەلیێن چڤاکی و چاندی کو د ئەسل دا ڤان تێکەلیان بنەمایەکێ دیرۆکی یێ خۆرت ھەیە.

 دەرئەنجام ھەردوو بەشێن کوردستانێن دێ پتر پشت بەستنێ ل سەر ئیمکانێن خوەیی کەن، دھەمان دەم دا دێ ببە ئەگەرا کێمکرنا ھەژمۆنا دەولەتێن داگیرکەر ژی ل سەر ھەردو بەشێن کوردستانێ.

 تەڤی کێم وکاسیان،  ئیرۆ ئەڤ ھەردو پارچەیێن کوردستانێ د ئازادن و خوەدی ستاتۆیەکا کوردی خۆمالینە، ھیڤی و ئۆمێدا تەڤایا گەلێ کوردن، نەخاسمە ل باکور و ڕۆژھەلات، لەوما گەرەکە ب ھەر بوھایەکی بە ئەڤ ڕێکەفتنە ب ھشمەندی و ژیری سەرەدەری پێڕا بێ کرن و وەک خوە بێ جی بجی کرن.

 ژ ئالیەکێ دن، ئەڤ لھەڤھاتن دێ کاریگەریەکا ئەرێنی ل سەر پەیوەندیێن سیاسی یێن پەکەکێ و پارتی دەموکراتی کوردستان ژی بكە، دێ ببە ئەگەرا پتر بەرقراربوونا تەناھی و ساقامگیریا سیاسی، ئابۆری و خۆرتکرنا پێگەھێ باشوورێ کوردستانێ ل ھەمبەر بەغدایێ، پووچکرنا پیلانێن نەیار و نەحەزان و ژ ھۆلێراکرنا مینێن ناڤخوەیی، ژناڤبرنا پڕۆژێ داگیرکاریا کوردستانێ ژ ئالیێ عێراق و ئیرانێ ڤە، کۆ ئەڤە دەمەکە ژ بال فرۆشیارێن کەرکۆکێ و بکوژێن شەھید مستەفا سەلیمی کار ل سەر تێ کرن.

 ژبەرکۆ ستراتیجی و ئارەستەیا سیاسی یا پارتی دەموکراتی کوردستان د چارەسەریا دۆزا کورد دا بکارئانینا میتۆد و ئالاڤێن ئاشتیانە یە، لەوما دوور نابینم، پارتی ڕۆلەکێ ناڤبەینکار دناڤبەرا پەکەکێ و دەولەتا تورک دا بگێڕە، ب ئارمانجا ڕاگەھاندنا ئاگربەستێ و جار دن د ناڤبەرا ھەردوو ئالیان دا پرۆسەسا ئاشتیێ دەست پێ بكە.

لەوما ڤێ لھەڤھاتنێ ڕەھەندێن خوە یبن ناڤخۆیی، ھەرێمی و بەلکۆ یێن جیھانی ژی ھەنە، نەخاسمە بەشداریا ڕاستەوخوە یا نوونەرێن وەڵاتێن یەکگرتی و فرەنسایێ د ڤێ پێڤاژوویێ دا بوھا و گرنگیەک دن دا ڤێ لھەڤتێگەھشتنێ، لەوما ئەرکەکێ نەتەوەیی و نیشتیمانییە، ھەموو ڕەوشەنبیر، ھونەرمەند، سیاسەتمەدار و نیشتیمانپەروەر ب ھەموو شیانێن خوە پشتەڤانیێ بدەن ڤێ گاڤا پیرۆز و ڕۆلەکێ چاک د نێزیكبوونا تەڤ ئالی و ھێزێن سیاسی یێن کوردستانێ دا ببینن.