سترانبێژێ ناڤدارێ كوردستانێ كۆچا داوی كر
ده‌نگبێژێ دیاربه‌کرێ سه‌یدخانێ بۆیاخچی ئانگۆ “بلبلێ ئامه‌دێ” د 87 سالیا خوه دا چوو سه‌ر دلۆڤانیا خوه.
ل گۆر كوردستان24، مه‌همه‌ت شیمشه‌ک کورێ ده‌نگبێژی دبێژە كو بابێ وی ژ ۷٦ سالان زێده‌تر ل سه‌ر ئێش و ئازار و ئه‌ڤین و ده‌شت و چیایێن وه‌لاتێ خوه ستران گۆتنە لێ نێزیكێ سال و نیڤه‌کێ بوو، نه‌خوه‌شیا وی لێ گران ببوو. جه‌نازه‌یێ سه‌ییدخانێ بۆیاخچی ل گۆرستانا یه‌نیکۆیێ یا دیاربه‌کرێ ب ئاخێ هات سپارتن.
ده‌نگبێژێ ناڤدار سه‌ییدخانێ بۆیاخچی ل مالا خوه یا دیاربه‌کرێ رۆژا (2020.07.05) چوو سه‌ر دلۆڤانیا خوه. ل گۆری گۆتنێن کوورێ سه‌ییدخانێ بۆیاخچی مه‌همه‌ت شیمشه‌ک، بابێ وی د ژیانا خوە یا سترانگۆتنێ دا ب سه‌دان ستران و کلام ل ئارشیڤا ده‌نگبێژیا کوردی زێده کرنه.
سه‌ییدخانێ بۆیاخچی، د سالا 2019 ێ دا ب نه‌خوه‌شیه‌کا گران دکه‌ڤه و ژ به‌ر ڤێ نه‌خوه‌شیێ فه‌لچ دبه و ژ وێ ڕۆژێ ڤه ڕه‌وشا ته‌ندورستیا وی گران بوو. مه‌همه‌ت شیمشه‌کێ کورێ ده‌نگبێژی ئاماژه کر کو ژ به‌ر ڕه‌وشا گران یا ته‌ندورستیا وی ئه‌و د ڤان ده‌مێن داویێ دا ل مال دهات ده‌رمانکرن و ژ به‌ریا کو جانێ خوه ژ ده‌ست بده ژی بزیشک لێ نێریه.
ده‌نگبێژێ مالا ده‌نگبێژان بوو
سه‌ییدخانێ بۆیاخچی یه‌ک ژ ده‌نگێنێژێن مالا ده‌نگێژان بوو. ب سالان ژ بۆ وه‌لاتی و گه‌شتیاران کلامێن ل سه‌ر شه‌ر، ئه‌ڤینیێ، مێرخاسی، سۆزداریێ، ده‌شت و چیا و زۆزانێن کوردستانێ گۆتنە.
25 سالان بۆیاخجیتی کر
ناڤێ سه‌ییدخانێ بۆیاخچی یێ ناسنامه‌یێ سه‌یدۆ شیمشه‌که. لێ ژ به‌ر کو ده‌بارا مالباتا خوه، ل کوچه و کۆلانێن ناڤچه‌یا سوورا دیاربه‌کرێ 25 سالان پێلاڤ بۆیاخ کرن، ناڤێ سه‌ییدخانێ بۆیاخچی دگره. بلبلێ ئامه‌دێ نه ته‌نێ بۆیاخچیتی کر، هه‌روها ل کارێن وه‌کی حه‌مالی و شڤانی و فرۆتنا ئاڤا سووسێ ژی کر.
ئێشه‌کا مه‌زن: ۷ زارۆکێن وی ل په‌ی هه‌ڤ مرن
ژیانا سه‌ییدخانێ بۆیاخچی ژی وه‌کی یا گه‌له‌ک ده‌نگبێژێن کورد د ناڤ ئێش و ئازارێن گران دا ده‌رباس دبه. هێژ 2 سالی، دایکا وی وه‌فات دکه و ده‌ما دبه 4 سالی ژی بابێ وێ وەفات دکه. سه‌ییدخانێ بۆیاخچی ژ ئالیێ مامێ خوه ڤه تێ خوه‌دیکرن. پشتی کو دزه‌وجه ژی 7 زارۆکێن وی ل په‌ی هه‌ڤ دمرن.
سه‌ییدخانێ بۆیاخچی ژی وه‌کی گه‌له‌ک ده‌نگبێژێن کورد ته‌مه‌نێ خوه د ناڤا خێزانی و بێخوه‌دیتیێ دا ده‌رباس کر. وی دگۆت؛ “ئه‌ز گه‌له‌ک جاران به‌شداری میهریجانان بووم، من د گه‌له‌ک به‌رنامه‌یان ده کلام گۆتن، لێ پشتی کو نه‌ز خوه‌ش که‌تم ئەز ب ته‌نێ هاتم هشتن.”
