شۆرەش مر
د شۆرەشا چەکداری دا، مە شیا خوە ل سەر لنگان بگرین و خەباتێ بکەین و پشتی هەر شکەستنەکێ ب رحەکا نوو رابینە سەر پێیان و دوبارە بۆ ئارمانجێ بجەنگین.
د شۆرەشا کلتوری دا ب سەدان سالانە ژ بەر نەبوونا دەوڵەتێ کارێ ل سەر کلتورێ مە دهێتە کرن و ڤان جیرانە درندەیان هند پنی ژێ ڤەکرینە و ئیخستینە سەر کلتورێ خوە، لێ ژ بەر رحا کوردینیێ و خوەدی دەرکەفتن ژ ناسناڤێ راست یێ کورداتیێ مە شیایە ستران و موزیک و جل و رەوشت و تیتاڵ و زمانێ خوە بپارێزن.
د شۆرەشا ئابۆری دا باشترین نموونە سالێن نوتانە ل باشوور دەما خەلکی شیای بەرسینگێ برسا مەزن بگرن و ب کەدا خوها خوە زارۆکێن ڤی وەڵاتی زکێ وانێ برسی تێر بکەن ئاها ل وی دەمی مە تشتەک نەبوو ب ناڤێ حکومەتێ، چونکی هندا ساڤا بوو هێشتا د ناڤا لاندکێ دابوو دەما شەر ل سەر هاتیە سەپاندن.
د شۆرەشا ئاڤەدانیێ ژی دا یا دیارە کانێ ڤی گەلی چاوا مل دایە بەر ئاڤەدانكرنا گوند و باژێران و ئەو ماڵێن ب سەدان سالان ئاخ ئەڤرۆ بوونە خوەشترین جهێن ژیانێ، کو د ڤی بیاڤی دا حکومەت خوەدان کێمترین پشکە.
هەروەسا د شۆرەشا پاراستنا دەستکەفیتان ژی دا گەلێ رەپ و رووت، وان گەنجێن نوو ژیان دیتی، وان کۆرێن خوین گەرم و کچێن جوان رەف ب رەف مل دا بەر پاراستنا هەرێما کوردستانێ و شیان ب خوینا هزاران پێشمەرگان ڤێ جوانیا کوردی د ناڤا تاریپەرێسیا عەرەبان دا بپارێزن و نەهێلن داعش نێزیکی ئاخا پیرۆز و وەڵاتێ ئاگر و رۆژێ ببە.
لێ د ئاست شۆرەشا باوەریێ دا هەر تشت مر، مرۆڤ مر، کوردینی مر، ئاخ مر، وەلات مر، پێشمەرگە مر، چونکی دەستهەڵاتدارێن مافیایی یێن کورد هەمی پیرۆزی ئێخستنە ژێر لنگێن خوە و پیرۆزترین پیرۆزیا وان بۆ پارەپەرێسی، لەورا ئەو شۆرەشا بۆ ژیانێ هاتی دەستپێکرن ئەڤرۆ ل ڤی وەڵاتی ژ بەر بێ باوەریێ یا د گۆری دا.
سەردار هێتوتی
2020.09.13
