هەرێما كوردستانێ ل هەمبەر پێشهاتێن نوو
ئاشتى فەتحى بێسفكى
ماوەيەكە ڤەلڤينێن پارتیا كاركەرێن كوردستانێ (پەكەكە) ل ناڤ ئاخا هەرێما كوردستانێ دا د زێدەبوونێ دايە، ب شێوەيەكى كو ژ ترسا دەستدرێژى يێن پارتیا كاركەرێن كوردستانێ خەلكەكى دەست ژ مال و مولكێ خوە بەردايە.
هەروەسا تۆپباران و بۆمبەبارانا فروكەيێن لەشكەرێ تركيا ل ناڤ ئاخا هەرێما كوردستانێ، ب تومەتا لڤين و چالاكيێن پەكەكێ، ب دەهان خەلكێ سڤيلێ بێ گونەھ شەهيد كرينە، هەرێما كوردستانێ بويە مەيدانا ژێكڤاڤارتنا هێزێن بيانى.
پشتى رێكەفتنا هەولێر و بەغدایێ سەبارەت شنگالێ هاتيە ئيمزاكرن ژ بۆ وێ چەندێ كو ئێدى گروپێن چەكدارى يێن نە فەرمى دناڤ ئاخا شنگالێ دا نەمينن، هەر زوو پارتیا كاركەرێن كوردستانێ ئەڤ رێكەفتنامە رەت كر.
هەلبەت ئەڤ رێكەفتنامە ئاماژەيەكە ژ بۆ پارتیا كاركەرێن كوردستانێ كو هەناسەيێن وێ يێن داويێ نە ل ناڤ ئاخا شنگالێ دا، ژبەركو ب مەرەما پاقژكرنا شنگالێ ئێدى حكومەتا عيراقێ ب هەمى ئامراز و ئاليەت دێ رووبرووىێ هێزێن بيانى ببە.
هەلبەت ئەڤ چەندە يا ب ساناهى نابە، ژبەركو هەمى پێشهات هوسا ددەنە دياركرن كو جێبەجێكرنا ئەڤێ رێكەفتنامێ يا ئاسان نابە. پارتیا كاركەرێن كوردستانێ لايەنێ حكومەتا هەرێما كوردستانێ د رێكەفتناما هەولێر و بەغدایێ دا ب پێناسەيا پارتیا دەموكراتا كوردستان دا زانين، لەورا لڤينێن خوە د ناڤ ئاخا هەرێما كوردستانێ دا زێدەتر لێ كرينە.
راگەهاندنا ئەندامێ كۆنسەيا پەكەكێ، موراد كەرەيلان، كو ب ئاوايەكى باس ل وێ چەندێ كريە كو هەرێما كوردستانێ بارەگا ل هندەك دەڤەرێن هەرێما كوردستانێ داناينە و پەكەكە ئەوان بارەگا ب شەرێ براكوژىێ پێناسە دكە. لەورا ئەڤە ئاماژەيەكە ژبو هندێ كو پەكەكە دخازە رووبرووىێ هەرێما كوردستانێ راوەستە و گروڤەيا ئەڤێ چەندا هەنێ داوى چالاكيا پەكەكێ پەقاندنا بۆريا ڤەگوهاستنا نەفتا هەرێما كوردستانێ ژبو ئاخا توركيایێ یە.
لەورا ب لێنێرينا كو رەوشا هەرێما كوردستانێ سەقامگير نينە و پێدڤيە حكومەتا هەرێما كوردستانێ ب رژدى ژبۆ هەر پێشهاتەكا نوو ئامادەكاريان بكە، ژبەركو د نوكە دا پەكەكە مەزنترين هەرەشە و مەترسى يە ل سەر ئاسايش و سەقامگيريا هەرێما كوردستانێ. داهاتیێ نەفتێ ئێك ژ ژێدەرێن سەرەكى يێ داهاتیێ حكومەتا هەرێما كوردستانێ يە، لەورا دوور نينە د نوكە و داهاتى دا پەكەكە ببيتە ئەگەرێ پاشخستن و برينا نانێ خەلكى ل هەرێما كوردستانێ.
