چ گرێدانا داگیركرنا باشوور ب سالا 2023 ێ ڤە ھەیە

ئه‌ڤ چه‌ند ڕۆژن ده‌وله‌تا ترک دیسا پارتیا كاركەرێن كوردستانێ (پەکەکە) دکه‌ بەھانە و ئێریشی خاکا باشوورێ کوردستانێ دکه‌ و گاڤ ب گاڤ نێزیکی دهۆکێ دبه‌. ژ به‌ر كو پەكەكە وه‌ک ڕێخستنه‌ک تەرۆریستی هاتیه‌ په‌ژراندن، ده‌وله‌تا ترک مافێ خوه‌ یێ حقووقا ناڤنه‌ته‌وی ب کار تینه‌ و ژ به‌ر ڤێ یه‌کێ ژی چو که‌س ده‌نگێ خوه‌ ژێ ڕا ناکه‌. هه‌بوونا پەكەكێ  ل باشوور و ڕۆژاڤا ماف، مه‌فه‌ر و فه‌رسه‌ندێ دده‌ ده‌وله‌تا ترک کو ئێریشی باشوور و ڕۆژاڤا بکه‌، خاکێ كوردستانێ  داگیر بکه‌، تێ دا‌ ئاسێ بمینه‌ و   ژ وان ده‌ران ده‌رنه‌که‌ڤه‌. ئارمانجا ” میساقا میلی ” و به‌رفره‌هکرنا خاکا ئۆسمانی ژ خوه‌ هه‌م ئارمانجا ده‌وله‌تا ترکه‌، هه‌م ژی ئارمانجا پەكەكێ ب خوه‌ یه‌.

وه‌ک تێ زانین، حوکمێ په‌یمانا لۆزانێ د 2023ێ دا خه‌لاس دبه‌. حوکمێن کو کوردستان 100 سالن پارچه‌ کربوون ژ هۆلێ ڕادبن. پشتی ڕابوونا حوکمێن په‌یمانا لۆزانێ، وێ ل ڕۆژهلاتا ناڤین دا و ب تایبه‌تی ژی ل سه‌ر خاکا کوردستانێ په‌یمان و حوکمێن نوو بێن سازکرن و هه‌ول تێ دان کو ڕۆژهلاتا ناڤین ب نه‌خشه‌یه‌ک نوو بێ خه‌ملاندن کو کوردستان ژی د ناڤ وێ نه‌خشه‌یێ دا هه‌به‌. هه‌لبه‌ت ئه‌ڤ یه‌ک گرێدایی یه‌کێتییا کوردان و گرێدایی داخوازێن کوردا یه‌. هه‌گه‌ر کورد هشمه‌ند بن و به‌رژه‌وه‌ندییێن خوه‌ یێن پارتیتییێ نه‌کن ئاسته‌نگ، هه‌گه‌ر ل سه‌ر هنده‌ک خالێن بنگه‌هین تفاقا خوه‌ چێکن و د داخوازێن خوه‌ دا زه‌لال بن، وێ ب ئالیکارییا هێزێن هه‌ڤپه‌یمان و ده‌وله‌تێن وه‌ک ئه‌مریکا و فرانسایێ کاربن تشته‌کی بده‌ستخن.   هه‌گه‌ر دیسا به‌رژه‌وه‌ندییێن خوه‌ یێن پارتیتییێ ل پێشییا به‌رژه‌وه‌ندچییێن کوردستانێ بکن ئاسته‌نگ، وێ ده‌وله‌تێن مه‌زن ژی ل گۆر وێ یه‌کێ هه‌سابێ خوه‌ بکن، وێ هێڤییێن خوه‌ ژ کوردان و کوردستانێ قوت بکن و ل گۆر بەرژەوەندیێن خوە بگەرن.

سه‌ده‌مه‌ک ژ سه‌ده‌مێن هه‌ری مه‌زن  یا ئێریشێن ده‌وله‌تا ترک ئه‌ڤ یه‌که‌، ئه‌ڤ ترسه‌. ئانگۆ، ترسا ڕابوونا حوکمێن په‌یمانا لۆزانێ و 2023ێ یه‌. ده‌وله‌تا ترک و حکوومه‌تا وێ ژ زوو دا‌ حه‌سابێ خوه‌ و ئاماده‌کارییێن خوه‌ ژ بۆ سالا 2023 ێ  دکه‌. نه‌ ته‌نێ ئه‌و، پەكەكە ژی ژ ڕۆژا ڕۆژ دا ژ بۆ 2023ێ ل باشوور و ڕۆژاڤا هاتیه‌ بجھ کرن و خزمه‌تا هه‌مان ئارمانج و ترسێ دکه‌. سه‌ده‌ما کو پەكەكە پارادیگمایا ئەنتی ” نه‌ته‌و-ده‌وله‌تبوونێ “، ئه‌م ” کورد ده‌وله‌تێ ناخوازن”،” براتی و هه‌ڤژیانا گه‌لان و ده‌مۆکراتیک جوومهوورییه‌ت “ دا پێش 2023 و ڕابوونا حوکمێن په‌یمانا لۆزانێ یه‌. د ڤر دا‌ پەكەكە و ده‌وله‌ت ژ بۆ یه‌ک ئارمانجێ تێدکۆشن و ئه‌و ژی ئه‌ڤه‌ کو کورد نکاربن پشتی 2023ێ  ببن خوه‌دییێ ستاتویه‌ک نه‌ته‌وی. سه‌ده‌ما کو پەكەكە ناهێله‌ پەیەدە و ئەنەكەسە  ل هه‌ڤ بێن و تفاقه‌ک نه‌ته‌وی چێکن ژی دیسا ئه‌ڤ یه‌.

بێگومان، ده‌وله‌تێن وه‌ک ئه‌مریکا و فرانسا ژی حه‌سابێن پشتی 2023ێ دکن و دخوازن ڕۆژهلاتا ناڤین ل گۆر به‌رژه‌وه‌ندییێن خوه‌ بنه‌قشینن. ژ به‌ر کو د ڕۆژهلاتا ناڤین دا‌ ته‌نێ کوردان نێزیکی خوه‌ و وه‌ک دۆستێن خوه‌ دبینن، حه‌سابێ خوه‌ ل سه‌ر وان دکن و دخوازن وان نێزیکی هه‌ڤ بکن، تفاقه‌کێ د ناڤبه‌را وان دا‌ چێکن.

 سه‌ده‌ما کو سەرۆكێ فرانسایێ ماكرۆن، سه‌رۆکێ کوردستانێ نێچیرڤان بارزانی ڤه‌خوه‌ند پاریسێ ژی ئه‌ڤ یه‌که‌ یە. ئهم‌ریکا و فرانسا دخوازن ب ناڤگینی و قاسدییا نێچیرڤان بارزانی تفاقا پەیەد و ئەنەكەسێ چێکن دا کو کاربن پشتی 2023ێ ستاتویه‌کێ ژ کوردان ڕا دامه‌زرینن و هه‌تتا باشوور و ڕۆژاڤا بکن یه‌ک.

 هه‌لبه‌ت ده‌وله‌تا ترک ڤێ یه‌کێ دبینه‌ و دزانه‌. ژ به‌ر ڤێ، پشتی چوونا نێچیرڤان بارزانی گرانییا خوه‌ زێده‌تر دا ئێریشێن سه‌ر باشوور دا کو به‌ری تێکچوونا په‌یمانا لۆزانێ به‌شه‌ک ژ خاکا باشوور و ڕۆژاڤا داگیر بکه‌ و خه‌ونا خوه‌ یا “میساقی میلی” پێک بینه‌. ده‌وله‌تا ترک ب سه‌ر دکه‌ڤه‌ یان سەر ناکه‌ڤه‌ تشته‌کی دنه‌. لێ وێ خاکا کو داگیر کریه‌ ل دژی ئه‌مریکا و فرانسایێ ژ خوه‌ ڕه‌ وه‌ک “كارت” ب کار بینه‌ و هه‌ول بده‌ ژ وان ڕا‌ ببه‌ شریک.

گه‌له‌ک ژ مه‌ حکوومه‌تا باشوور ڕه‌خنه‌ دکن و دبێژن “چما ده‌نگێ خوه‌ ل دژی ده‌وله‌تا ترک ناکن”. بێگومان، “هه‌چیێ نه‌ ل شه‌ره‌ شێره‌” و “که‌س ب خوێیا گرارا که‌سی نزانه”‌. هه‌ر چقاسی حکوومه‌تا باشوور د بریارێن ناڤخوه‌یی دا سه‌ربخوه‌ به‌ ژی، د سیاسه‌تا ده‌رڤه‌ دا‌ گرێدایی حکوومه‌تا به‌غدایێ یه‌ و مافێ وێ یێ بریاردایینا سیاسه‌تا ده‌رڤه‌ نینه‌. د بریارێن ناڤخوه‌یی دا‌ ئازاده‌، لێ د بریارێن ده‌رڤه‌یی دا ئێخسیرێ به‌غدایێ یه‌. ئه‌ڤ یه‌ک حکوومه‌تا کوردستانێ که‌ڕ و لال و کۆر دکه‌ و ده‌ست و لنگێن وێ گرێ دده‌. ل دژده‌رکه‌تنا ئێریشێن ده‌وله‌تا ترک مافێ به‌غدایێ یه‌ و به‌غدا ژی ل گۆر یاسایێن ناڤنه‌ته‌وی ڤی مافی ژ ده‌وله‌تا ترک ڕا ڕه‌وا دبینه‌.

ب کورت و کورمانجی؛ ده‌وله‌تا ترک و پەكەكە شه‌ره‌کی ب شێور و مشێور دکن. ئێریشێن ده‌وله‌تا ترک و داگیرکرنا به‌شه‌ک ژ خاکا باشوور و ڕۆژاڤا، پارچه‌یه‌ک ژ حه‌سابێ 2023ێ یە، تێکچوونا په‌یمانا لۆزانێ و خه‌ونا به‌رفره‌هکرنا میساقی میڵی یه‌. هه‌گه‌ر ئه‌مریکا و فرانسا ڕێ ل به‌ر ده‌ک و دۆلابێن پەكەكێ نه‌گرن و پەیەدێ و ئەنەكەسێ  ل هه‌ڤ نه‌ینن، نه‌ ل ڕۆژاڤا ستاتویه‌ک نه‌ته‌وی چێدبه‌، نه‌ باشوور و ڕۆژاڤا دبن یه‌ک، و نه‌ ژی د نه‌خشه‌یا پشتی 2023ێ دا‌ جهێ خوه‌ دگرن. تفاق و یه‌کێتییا کوردان هه‌م ل خێرا کوردانه‌، هه‌م ل خێرا ده‌وله‌تێن ڕۆژاڤا دا یە. پارچه‌بوون و بێتفاقی وێ مرنا کوردان و داگیرکرنا کوردستانێ بدۆمینه‌ و وێ ببه‌ سه‌ده‌ما لۆزانێن نوو.

2021.04.25