بێبەختیا راگەھاندنا گرۆپا 16ێ ئۆكتۆبەرێ
ئاژانسا پاراستنێ د داخویانیه‌کێ دا رادگەھینە كو، مه‌دیایا گرۆپا 16ێ ئۆكتۆبەرێ ب سیناریۆیه‌کا بێ بنگه‌ھ نووچەیەكا چێكری و دره‌وین وه‌شاندیه و تێ دا ئیدیعا دكە كو هه‌ولا ژه‌هرخوارنا چه‌ند که‌سان هاتیه دایین، “ته‌ڤی کو ئه‌م سەرووبنێ وێ نووچەیا درەو ڕه‌د دکن، ئه‌م ته‌ئكیدێ ل سەر وێ یەكێ دكن ژی کو ڤەھاندنا درهوێن مه‌زن یێن ب شاخ و ب ڤی ئاوایی، نه‌به‌رپرسیارتیا وان که‌س و ئالیان نیشان دده کو ل پشت به‌لاڤکرنا ڤان نه‌راستی و بێبه‌ختیانن.
د داخویانیێ دا هاتیه كو مه‌دیایا سه‌ر ب لاهۆرشێخ جەنگی ڤه ب به‌لاڤکرنا ڤان درهوێن بێ بنگه‌ھ، دخوازە کو دلسۆزیا هۆزا هه‌رکیا به‌ر ب خوه ڤە بكێشە ژ بۆ كو د هلبژارتنان دا هندەك ده‌نگان ب ده‌ست بخه.
داخویانیا ئاژانسا پاراستن:
د چه‌ند مالپەر و پەیچێن سه‌ر ب لاهۆر شێخ جەنگی ڤه ب سیناریۆیه‌کا بێ بنگه‌ھ مژاره‌کا دره‌وین وه‌شاندیە و تێ دا ئیدیعا دكە کو هه‌ولا ژه‌ھرخوارنا چه‌ند که‌سان هاتیه دایین و د چارچۆڤه‌یا وێ نووچه‌یێ دا ناڤێ ئاژانسا پاراستن ژی هاتیه.
ته‌ڤی کو ئه‌م سەرووبنێ وێ نووچەیا درەو ڕه‌د دکن، ئه‌م ته‌ئكیدێ ل سەر وێ یەكێ دكن ژی کو ڤەھاندنا درهوێن مه‌زن یێن ب شاخ و ب ڤی ئاوایی، نه‌به‌رپرسیارتیا وان که‌س و ئالیان نیشان دده کو ل پشت به‌لاڤکرنا ڤان نه‌راستی و بێبه‌ختیانن.
ژ هه‌موو ئالیان ڕا ئاشکه‌ره‌یه کو جه‌ماوه‌رێ سه‌ربلندێ هۆزا هه‌رکیا ژ به‌ر پەیوه‌ندیکرنا جه‌وهه‌ر هه‌رکی ب گرۆپا خایینه‌تێ یا 16ێ ئۆكتۆبەرێ نەرەحەت و دلگران بوونە و ل هه‌مبه‌ر ڤێ یه‌کێ ژی مه‌دیایا سه‌ر ب لاهۆر ڤه ب به‌لاڤکرنا ڤان درهوێن بێ بنگه‌ھ، دخوازە کو دلسۆزیا هۆزا هه‌رکیا به‌ر ب خوه ڤە بكێشە ژ بۆ د هلبژارتنان دا هندەك ده‌نگان ب ده‌ست بخه.
ل سه‌ر وێ ناڤزراندا د مه‌دیایا گرۆپا 16 ێ ئۆكتۆبەرێ دا ھاتی، ئه‌م ب مافێ خوه دزانن کو دۆزا یاسایی ل سه‌ر که‌سێن کو ل پشت به‌لاڤکرنا ڤان بابه‌تانن تۆمار بکن و داخواز دکن کو د بن چاڤدێریا پەرله‌مه‌نتۆ و نوونه‌را ڕێخستنا نه‌ته‌وه‌یێن یه‌کگرتی دا لێپرسینه‌کا دادپه‌روه‌رانه بھێتە كرن و کۆما وان بێبه‌ختیان ژ هه‌موو ئالیان ڕا بێ ئاشکه‌ره‌کرن.
