پەكەكە كەچێن دبن 18 سالیێ دا درەڤینە و مەژیێ وان دشوو

چالاکڤانەكا ئێزدی د داخویانیەكێ دا دبێژە کو، چه‌کدارێن پەکەکێ ڕه‌وشا شنگالێ تێکدایه‌ و گه‌له‌ک که‌چێن بن ته‌مه‌ن 18 سالیێ دا ڕه‌ڤاندنه‌ و په‌یوه‌ندیا وان ل گه‌ل داییک و باڤێ وان نه‌مایه‌.

چالاکڤانا ئێزدی دلڤین خه‌له‌ف دبێژە: هاتنا پەکەکێ بۆ ناڤ شنگالێ ته‌نێ ژ بۆ وێ یه‌کێ یه‌ کو باژار ژ خه‌لکێ وێ ڕا نه‌مینه‌ و هه‌موو هه‌ولدانا وان ئه‌وه‌ كو ترکیه‌ بھێتە ڤێ ده‌ڤه‌رێ. ب ڕاستی شنگال قادا شه‌رێ پەکەکێ نینه‌ و بلا بچن باکورێ کوردستانێ کار بکن. بلا شه‌ر و ئالۆزیان ڤه‌گوهێزن بۆ ناڤ ئاخا خوه‌. ژ به‌ر شنگال به‌شه‌که‌ ژ ئاخا هه‌رێما کوردستانێ و ئێدی پێویست ناکه‌ پەکەکە ببه‌ ئەگەرێ ئالۆزی و پرسگرێکان ل ناڤچه‌یێ.

ل گۆر دلڤین خەلەف پەکەکێ ده‌ست ژ باکورێ کوردستانێ به‌ردایه‌ و هاتیه‌ ناڤ شنگالێ بوویه‌ سه‌رێشه‌ و گه‌له‌ک پرسگرێکێن جڤاکی بۆ خه‌لکێ چێدكە. ب تایبه‌ت ڕه‌ڤاندن و بێسه‌رشوونکرنا که‌چێن بن ته‌مه‌نێ 18 سالیێ دا گەلەك زێده‌ بوویه‌. ئێزدی ئێدی وه‌ک به‌رێ قه‌بوول ناکن که‌چێن وان ببن چیا و ژ داییک و باڤ و مرۆڤێن وان بێن قوتکرن، تشتا کو پەکەکە دکه‌ دژی که‌ڤنه‌شۆپیێن ئێزدیانه‌. ئه‌و که‌چێن کو چوونه‌ ناڤ پەکەکێ یه‌ک ژ وان ژی ب دلێ خوه‌ نه‌چوویه‌. ھەموو ژ ئالیێ چەكدارێن پەکەکێ ڤه‌ هاتنه‌ ڕه‌ڤاندن و مەژیێ وان شووشتنه‌. پەکەکە پرسگرێک و ئاسته‌نگە ژ بۆ هه‌موو مالباتان. ژ به‌ر گه‌له‌ک که‌چێن بن ته‌مه‌نێ 18 سالیێ دا برنه‌ فێرگه‌هێن خوه‌ و مەژیێ هه‌موویان تێکدایه‌ و هه‌موو خاپاندنه‌ و وسا ل وان کرنه‌ ئێدی ژمرۆڤێن خوه‌ دوور دکه‌ڤن.

چالاکڤانا کورد خه‌له‌ف دبێژە: داییک و بابێ وان که‌چێن ژ ئالیێ پەکەکێ ڤه‌ هاتنه‌ ڕه‌ڤاندن، گه‌له‌ک جاران هه‌ولدان زارۆکێن خوه‌ ببینن، لێ پەکەکێ ب چو ئاوایه‌کی ڕێ نه‌دا و ناهێله‌. ب ڕاستی هێڤیا مه‌ هه‌یه‌ ڕه‌ڤاندیێن ده‌ست ته‌رۆریستێن داعشێ بێن ئازاد کرن، لێ چوهێڤیا مه‌ و باوه‌ریا مه‌ ب وێ یه‌کێ نینە کو ئه‌و که‌چێن پەکەکێ ڕه‌ڤاندنه‌ جاره‌که‌ دن بێن ڕزگار کرن و ب مالباتێن خوه‌ شاد ببن.

هه‌روه‌ها دلڤین خه‌له‌ف دبێژه‌: زانیاریێن مه‌ هه‌نه‌ کا پەکەکێ چ ب سه‌رێ وان که‌چان ئانیه‌، ژ به‌ر جاره‌کا دن نکاربن ڤه‌گه‌رن ناڤ مالبات و مرۆڤێن خوه‌، ژ ئالیێ پەکەکێ ڤه‌ ڕاستی زۆر و سته‌مێ هاتنه‌.