کورد و پێکانینا کۆنفه‌رانسان
ئه‌م کورد کورێ مه‌له‌ته‌کی نە کو سه‌د سالن د بن نیری داگیرکه‌ران دا دپه‌رچقن، تێنه کوشتن. دکه‌ڤن زیندانان، تێنه ڕه‌ڤاندن و گه‌له‌ک تشتێن دن.
لێ دیسا ژی ئه‌م وه‌که کورێ ڤی مله‌تی و چو جاران ب ته‌مامی ته‌سلیمی دژمنێ خوه نه‌بوونه و ل هه‌ر چار پارچەیێن کوردستانێ به‌رخوه‌دان و شه‌رێ ئازادیا ژ بۆنا کوردستانه‌کا سه‌ربخوه چو جاران تێک نه‌چوویه. هندەک جاران ژ به‌ر ئەگەرێن تایبه‌ت، شه‌ر دکاره هاتبه ڕاوه‌ستاندن، هه‌تا کو مه‌جال چێ بوویه، دیسا گەلێ مە به‌رخوه‌دانە و ل هه‌مبه‌ر داگیرکه‌ران شۆروش کرنە.
ڤان سه‌رهلدان و به‌رخوه‌دانا پێشمێرگه یێن قه‌هره‌مان، ڕێ و ڕێبازا بارزانیێ مه‌زن ئه‌م ل باشوورێ کوردستانێ نها کرنه خوه‌دی ده‌وله‌ته‌کا فه‌ده‌رال و باوه‌ریا من ئه‌وه کو دێ د ده‌مه‌کێ نه زێده دوور ژی ئه‌ڤ ده‌وله‌تا فه‌ده‌رال دێ ببه کوردستانه‌کا سه‌ربخوه.
هه‌می کار و خه‌باتێن پارله‌مه‌نا کوردستانێ نها، ب ڕێ و ڕێبازێن ده‌مۆکراتیک د ناڤا هه‌ولدانان دایه کو ئه‌و داخوازا کوردان یا سه‌د سالان ئانکۆ کوردسانه‌کا سه‌ربخوه حاڤا بکن. ئه‌ڤ خه‌یالە یا هه‌می کوردانه.
سه‌رۆک و ڕێبه‌رێن مه، به‌رپرس و پێشه‌ڤانێن مه ل باشوورێ کوردستانێ ب هه‌ر ئاوایی د هه‌ر واری دا، کار و خه‌باتێن ناڤده‌وله‌تێ دکن دا کو وێ خه‌یالا کوردان یا ده‌وله‌ته‌کا سه‌ربخوه پێک بینن. ئالا کوردستانێ د ناڤا ئالێن جیهانێ دا بلند و به‌رز بکن.
لێ د واره‌کی دن دا ده‌ما کو ئه‌م ل بوویه‌ر و کریاران دنێرن دبینن کو هندەک که‌س و هندەک ژ به‌رپرسیاران، هێشتا وه‌که پارتیەکێ کار دکن، نه وه‌ک ده‌وله‌ت. ژ بیر دکن ئان نایێ بیرا وان کو حکومه‌ته‌کا وان یا ب ده‌نگێ گه‌لێ کوردستانێ هاتیە هبژارتن ل سەر کارە. هه‌می کێماسی و شاشیێن کو هه‌نه ئان تێنه کرن ژ ڤر ده‌ستپێ دکه. ده‌ستپێ دکه ژ به‌ر کو هندەک ب ته‌مه‌نێ خوه یێ مه‌زن ب سالان به‌رپرسن، ل گۆر ئاقل و مه‌ژی هێشتا ژی وه‌که پارتی یە ته‌ڤدگه‌ره. ته‌ڤگه‌رێن وه‌ها هەم زه‌رارێ دگەهینه پارتیێ (پەدەکە) و هەم دگەهینە حکومه‌تا هه‌رێما کوردستانێ و هەم ژی ب وان که‌سێن کو گه‌له‌ک ژ به‌شدارێن نه‌زان جڤین ئان کۆنفرانس ئه‌نجاما کو تێ خوه‌ستن ناده.
ئه‌م ڤێ هنه‌کی ڤه‌کن دا کو مه‌سه‌له زه‌لال ببه.
ده‌ما هندەک کۆنفه‌رانس، جڤین و سه‌مینارێن ناڤنه‌ته‌وه‌یی ل هه‌ولێرێ دهێنە کرن، ئارمانج ژ وان ئه‌وه کو که‌سێن د مژارێ دا پسپۆر ئان ژی خوه‌دی زانین و لێکۆلینڤان بن دا کو ئه‌و که‌سانە ب وان ته‌جروبه‌یێن خوه، وێ زانین و تێگەهشتنا خوه د جڤین و کۆنفه‌رانسه‌کا وه‌ها دا گۆتوبێژ بکن دا کو ئه‌و ببه وه‌که خاله‌کا سه‌ره‌که ژ بۆنا د قادا ناڤنه‌ته‌وه‌یی دا جهێ خوه بگره.
لێ د ئالیێ دن دا ده‌ما ئه‌م ل به‌شدارێن گه‌له‌ک جڤین و کۆنفه‌رانسێن کو پێک هاتنە دنێرن و دبینن کو پرانیا وان بەشداران، ژ ته‌ره‌ف ناس و دۆستێن پارتیێن یێن ل ئه‌ورۆپا و پارچه‌یێن دن دژین تێنه هلبژارتن. ژ به‌ر کو مرۆڤێن هەڤن.¸ب سالان هه‌ڤالبه‌ندێن هه‌ڤن، دۆست و حه‌زکرێن هه‌ڤن. هه‌رکه‌س بانگی یێ خوه دکن.
ئه‌ڤ ژی دبه وه‌که ئاسته‌نگه‌کێ کو ئه‌و جڤینا تێ کرن ب ناڤارۆکا خوه نه تێر و تژی یه. ده‌ما ته مرۆڤ و هه‌ڤالبه‌ندێ خوه ته‌نێ ڤه‌خواند کۆنفه‌رانس ئان جڤینه‌کا وه‌ها و د ئالیێ دن دا تو که‌سێن پسپۆر زانا و لێکۆلینه‌ر یێن کو دکارن ب دیتن و پێشنیارێن خوه وێ کۆنفه‌رانسێ گه‌ش بکن و ببن خوه‌دی پێشنیارێن کو دڤێ چاوا و د چ واری دا کار بێ کرنێ، قیمه‌ت و ڕوومه‌تا وان ناگره، ژ بۆنا کۆنفه‌رانسه‌ک سه‌رکه‌تی تو دبی ئاسته‌نگ.
ژ به‌ر کو پرانیا کوردێن مه چاڤێن خوه ب کار و بارێ ڕێخستنیێ ڤه‌کرنه، ب ته‌مه‌نێ خوه یێن بچووک خوه د ناڤا ته‌ڤگه‌ره‌کێ دا دیتنه، لۆما چ کار به وه‌که پارتیێ ته‌ڤدگه‌رن. ژ بیر دکن کو ئێدی کورد ل باشوورێ کوردستان ب ئالا خوه، ب پارله‌مه‌نا خوه، دام و ده‌زگه‌هێن خوه ده‌وله‌ته.
ده‌ما کو ئه‌م ده‌وله‌ت بن دڤێ د هه‌می چالاکی، کۆنفه‌رانس و جڤینێن گرسه‌یی دا، بانگی که‌سێن د وێ مژارێ دا پسپۆرن، لێکۆلینه‌رن، خوه‌دی ته‌جروبه بن دا کو بکاربن ژ وێ جڤین ئان کۆنفه‌رانسێ ئه‌نجامه‌کی باش و واته‌دار ده‌رخن.
باش دزانم و بوومه شاهدێ وێ یه‌کێ کو گه‌له‌ک که‌سێن تێنه ڤه‌خواندن ئانگۆ هاتنه بانگکرن ته‌نێ وه‌که گوهداره‌کی دبه مێڤانێ وێ کۆنفه‌رانسێ ئان جڤینێ. نه دکاره باخفه، نه دکاره ببه خوه‌دیێ خوه و پێشنیاره‌کێ. ته‌نێ دکارن ب کشاندنا وێنه‌یێن خوه ئێن خوارنێ، گه‌ر و سه‌یرانێ و ل سه‌ر فێسبۆکێ به‌لاڤ بکن، زیره‌کن. ل گۆر من ئه‌ڤ ژی دبه باره‌کی گران ل سه‌ر پشتا حکومه‌تا هه‌رێما کوردستانێ.
هێڤی و ڕجا من ئه‌وه کو دڤێ ئه‌ڤ ڕه‌نگێ کۆنفه‌رانس و جڤینان ژ ته‌ره‌ف حکومه‌تا هه‌رێما کوردسانێ پێک تێن، ڤێ ڕه‌وشێ بدن به‌ر چاڤێن خوه. کۆنفه‌رانس ل سه‌ر کیژان مژارێ به دڤێ که‌سێن به‌شدار ژی د وێ مژارێ دا زانا، لێکۆلینه‌ر و خوه‌دی به‌رهه‌مێن وێ بن.
یا هه‌ری گرینگ ژی ئه‌وه کو دڤێ جوانێن کورد یێن ل ئه‌ورۆپایێ کو ب گه‌له‌ک زمانان دزانن، د ناڤ چاندا ده‌وله‌تێن ئه‌ورۆپایی دا مه‌زن بوونه، گه‌له‌ک ژ وان د ناڤا پارتیێن ده‌وله‌تێن لێ دژین دا کار دکن. دڤێ بانگی وان بێ کرنێ، لێ من یه‌ک ژ که‌سێن وه‌ها جوان و زیره‌ک د کۆنفه‌رانسا دیاسپۆرا دا نه‌دیت. ل گۆر شۆپاندنا وێنه‌یان ژ سوێدێ نێزی ١٠ که‌سان به‌شداری کۆنفه‌رانسا ٤-٥-/١۲-۲۰۲۱ئان یا ل په‌یته‌ختێ کوردستانێ ل هه‌ولێرێ پێک هاتبوو، کربوون. ژ ناڤا وان یێ هه‌ری ب ته‌مه‌نێ خوه بچووک نه کێمی ٥۰-٦۰سالی بوو. ژ دێلڤا ئه‌وقاس که‌س ژ سوێدێ به‌شداری وێ جڤینێ بوو بوون و نه بوو بوون خوه‌دیێ خوه و پێشنیاره‌کێ، هه‌گه‌ر سێ جوانێن ژیر، پر زمانی و خوه‌دی ته‌جروبه و جڤاکناس چووبانا ما وێ نه‌باشتر با؟ لێ ده‌ما ئه‌م ڕاستیێ دبێژم، ب ده‌ستێن هندەک ژ وان به‌رپرسێن من ژۆر گۆتبوو، نایێ هه‌سابێ وان لۆما، ل سه‌ر ئاساسێ نه‌ڕاستیان و ل سه‌ر ناڤێ خوه ڕاپۆران ددن ژۆر…
ژ به‌ر کو کۆنفه‌رانسا ل هه‌ولێرێ پێک هاتبوو، مژارا وێ دیاسپۆر بوو و ئه‌ڤ ده‌مه‌که کو ناڤه‌نده‌ک هاتبوو دامه‌زراندن، ژ بۆنا خورتبوون و پێشکه‌تنا وێ ئه‌ڤ کۆنفه‌رانس هاتبوو ئاماده‌کرن
ب هێڤیا کو ئه‌ڤ ڕه‌وش ئێدی ل به‌ر چاڤ بێنه گرتن و ته‌نێ ژ بۆنا ناسێ منه، دۆستێ منه، بانگی که‌سان ژ بۆنا کۆنفه‌رانسان نه‌یێ کرنێ. ئه‌ڤ ئێ ببه گاڤه‌کا ئه‌رێنی ژ بۆنا جڤین و کۆنفه‌رانسێ واته‌دار و سه‌رکه‌تی کو که‌سێن د مژارێ دا پسپۆرن، بێنه بانگکرنێ…
ئه‌ز دیسا ژی وێ کۆنفه‌رانسا کو ٢٠٢١.١٢.٤ان ل پایته‌ختێ کوردستانێ پێک هاتبوو سه‌رکه‌تنێ دخوازم. د کار و خزمه‌تا کو وێ ژ بۆنا گه‌لێ خوه پێک بینه، خوه‌شبینم و وان پیرۆز دکم.
