ئاڤرک ل سەر شەرێ رووسیا و ئوکراینایێ
نەوزاد بەرواری
داویا ئالۆزیا د ناڤبەرا رووسیا و ئوکراینایێ دا گەهەشتە شەری، من بخوە ب دوور دزانی کو رووسیا راستەراست هێرش بکەتە سەر ئوکراینایێ. لێ وەک خوەیایە رووسیا شەر ل دژی ئوکراینایێ دەست پێ کر. هەر وەسا رووسیایێ هندەک پلان ژی هەنە بۆ پشتی داگیرکرنا ئوکراینایێ. رووسیا هەرتم ئوکراینا و بێلەروسیا ژ خوە ومالێ خوە دزانە و هەتا پەیمانا بوداپێست د سالا 1991ێ دا ژ 1300 سەرکێت ئەتۆمی یێن سوڤیەتێ، 173 ل ناڤ ئاخا ئوکراینایێ بوون.
پوتین د گوتارا خوە یاچەند روژ بەرێ دا گۆتبوو: “دیرۆک، ئۆل و کولتورێ مە و ئوکراینایێ ئێکە و ئەم خرابیێ ژی لگەل ناکەین”. بەس وەکی خویایە د (کونفرانسا ئاساییشێ یا مونشن) دا ل سەر سەرکێت ئەتۆمی ل ئوکراینایێ بەحس هاتیەکرن، لێ زلێنسکی، سەرۆکێ ئوکراینایێ، گوت ل دووف پەیمانناما بوداپێست “مە سوز دایە د هەمبەر پاراستنا ئوکراینایێ وەک ولاتەکێ سەربخوە ئەم چو سەرکێت ئەتۆمی نەهێلین، لێ نوها خویایە کو سەروەریا ئاخا ئوکراینایێ نەپاراستیە و ئەم د مەترسیێ داینە و لەوما مە بڕیار دایە وان سەرکێت ئەتومی لبا خوە بپارێزین”. پشتی ڤان گوتنێن زلێنسکی خویایە رووسیایێ هەست ب مەترسیێ کریە، هەتا پوتین د ئاخفتنێن خوە دا ئاماژە ب ڤێ چەندێ ژی کر.
ئەز د وێ باوەریێ دا مە کو پشتی رووسیایێ هەست ب مەترسیا سەرکێت ئەتومی کری لەز ل دەستپێکرنا شەڕی کر و وێ بەری ناتۆیێ گۆرزێ خوە وەشاند، ئەو جهێن کرینە ئارمانجا بومبارانا خوە ژی ناڤەندا ئاسایش و هەوالگریا ئوکراینایێ و هەمی ئەو جهێن ناڤەندا پەیوەندیێن لەشکرێ ئوکراینایێ و ناتۆیێ نە و ئارمانج ژ بۆمبەبارانا وان جهێن ستراتەژی ئەو بوو دا پەیوەندیێن لەشکرێ ئوکراینایێ لگەل ناتۆیێ ببریت. رووسیا ل ڤێرێ ناراوەستیت و مەبەستا وێ ژی ژناڤبرنارژێما زلێنسکی یە و دانانا رژێمەکا کونفدرالی کو تێدا هەردو کومارێن نوو: لوگان و دانێتسک ژی د ناڤ چارچۆڤەیا ڤێ کونفدرالیێ دابن و ب ڤی ئاوایی ژی شرعیەتا یاسایی بدەتە ڤان دو کومارێن نوو. لێ پرسیار ئەڤە: گەلۆ ئەڤ پلانا رووسیایێ دێ سەرگریت؟
ئاریشەیا دەڤەرا دومباس تم وتم ئێک ژ پرسا گرنگ یا هەلبژاتنا بویە بۆ سەرۆککۆماریێ، ئێک ژ سەدەما سەرنەکەتنا پەرەشێنکۆ سەرۆککۆمارێ بەرێ چارەسەرنەکرنا ئاریشەیا دونباس بوو،
هەر وەسا ئێک ژ سەدەما سەرکەتنا زلێنسکی بۆ سەرۆککۆماریێ ژی ئەو بوو سوز دابوو کو چارەسەریا ئاریشەیا دەڤەرا دونباس بکەت، لێ خویا بوو نە کاری وان سوزان بجێ بینیت. زلێنسکی گەلەک ژ کەسێن دیارێن سیاسی یێن پرۆ روسیا گرتن کو ئێک ژوان سیاسەتمەدرێ بناڤ و دەنگ و زەنگین ڤیکتور مێدڤێدچوک بوو کو خودانێ خوە ٣ کەنالێن تەلەڤزیونێ بوو. رووسیا دێ هەول دەت چەند بشێت زووتر ڤێ ئۆپەراسیونێ ب دوماهیک بینیت و پاشی دەست ب هەوڵێن دپلۆماسی بدەت. لەوما نوها پوتین نەڤێت لگەل چو ولاتان ل سەر پرسگرێکا ئوکراینایێ دانوستاندنان بکەت
