١١ێ ئادارێ بنگه‌هێ ده‌ستکه‌فتیێن پشتتی سه‌رهلدانێ
په‌یاما سه‌رۆک نێچیرڤان بارزانی ب هه‌لکه‌فتا ۱۱ێ ئادارێ
ئیرۆ ٥۲ سال ب سه‌ر ده‌ستکفته‌کا دیرۆکی و هه‌ری دیار یا گه‌لێ کوردستانێ دا ده‌رباس دبن کو ئه‌و ژی ڕێکه‌فتنا ۱۱ێ ئادارا سالا ۱۹۷۰ێ د ناڤبه‌را حکومه‌تا وێ ده‌مێ یا ئیراقێ و شۆره‌شا مه‌زن یا ئیلۆنێ ب ڕێڤه‌به‌ریا بارزانی یێ نه‌مر دا یه.
ڕێکه‌فتنا ۱۱ێ ئادارێ گرنگترین ده‌ستکەفتیا دیرۆکا نوو یا ته‌کۆشینا ئازادیخوازا گه‌لێ کوردستانێ یه کو بوویه یه‌که‌م به‌لگه‌نامه‌یا یاسایی و دانپێدانان ب مافێن ڕه‌وایێن گه‌لێ کوردستانێ. هه‌ر چقاس ده‌ستهلاتا هینگێ یا ئیراقێ پاشی ژ وێ ڕێکەفتنێ پۆشمان بوو، لێ به‌لێ بوو ئه‌گه‌رێ ناساندنا دۆزا گه‌لێ کوردستانێ ل سه‌ر ئاساتا جیهانێ و بوو بنگه‌هه‌ک ژ بۆ ده‌ستکه‌فتیێن پشتی سه‌رهلدانێ و دامه‌زراندنا قه‌واره‌یێ ده‌ستووری و فه‌ده‌رالی یێ هه‌رێما کوردستانێ.
ئه‌گه‌ر ده‌ستهلاتا هینگێ یا ئیراقێ ڕێز ل وێ ڕێکه‌فتنێ بگرتایه، وه‌لات و په‌شه‌رۆژا نفشێ وی ژ گه‌له‌ک شه‌ر و وێرانکارییان دپاراست و نها ئیراق ب تمامی وه‌لاته‌کێ ب ئیستیقرار، ئاڤادان و پێشکه‌تی دبوو. نها ژی دڤێ ئه‌م هه‌موو ل ئیراقێ په‌ند و عیبره‌تێ ژ وان ده‌رسان وه‌ربگرین و ب پاراستنا فه‌ده‌رالیزمێ و مافێن ده‌ستووری یێن هه‌موو پێکهاته‌یێن ئیراقێ، نها و پاشه‌رۆژه‌کا باشتر ژ بۆ نه‌ڤیێن خوه دابین بکین.
د ڤێ بیره‌وه‌ریێ دا ڕێز و سلاڤان ژ بۆ جانێ پاقژێ شه‌هیدێن کوردستانێ دهنێرین و ب ڕوومه‌ت ڤه وان ل بیرا خوه تینین. بلا ئه‌ڤێ بیرانینێ بکین پالده‌رێ پێکڤه‌یی، براتی و یه‌کرێزیا گه‌لێ کوردستانێ کو هینگێ ژی سه‌رکه‌فتن و ڕێکه‌فتنا ۱۱ێ ئادارێ ژێ به‌رهه‌م هات و ب ڤێ یه‌کێ ژی ئه‌م دکارن مافێن خوه یێن نها و پاشه‌رۆژا قه‌واره‌یێ هه‌رێما کوردستانێ بپارێزین.
نێچیرڤان بارزانی
سه‌رۆکێ هه‌رێما کوردستانێ
١١ێ ئادارا ۲۰۲۲
