سەرۆکوەزیرا سوێد بەحسا بوویەرێن شەوتناندا قورئانێ دکە
سه‌رۆکوه‌زیرا سوێدێ، ماگدەلێنا ئەندەرسۆن، ل سەر وان بوویەر، تەڤلیهەڤی و ئالۆزیێن ل چەند باژارێن سوێدی قەومین، د داخویانەکێ دا ددە دیار کرن کو هه‌ر که‌سێ ئێریشی پۆلیسێن سوێدێ بکه، ئەو ئێریشی جڤاکا ده‌مۆکراتیک یا سوێدێ دکه و سوێد دێ پۆلیسێ خوە مەزن و ب هێز بکە و ئالەت و ئامێرێن ژێ را پێدڤینە پەیدا بکە.
سه‌رۆکوه‌زیرا سوێدێ دبێژە کو بەرپرسێن وان بوویەر و تێکدانان دڤێت بهێنە گرتن و جەزا کرن.
سیاسه‌تمه‌دارێ توندرەو و راستگر، راسموس پالودان ل داویا حەفتیا چویی، حەفتیا جەژانا قیامە کو ل سوێد بهێنڤەدانە، ل چەند باژاران ب ئیجازەیا پۆلیس قۆرئان شەوتاند، ل هەمبەر ڤێ کریارا راسموس پالودان، بەشەک ژ موسلمانان رێاکسیۆن نیشان دا و ل وان باژارێن قۆرئان لێ هاتیە شەوتاندن، خوەپێشاندانێن توند دەست پێ کرن و خوەپیشاندەران گەلەک ئۆتۆمۆبیلێن پۆلیس شەوتاندن و چەند سڤیل و پۆلیس ژی بریندار کرن.
ل سەر ڤان بوویەران رۆژنامەیا سوێدی ئەفتۆنبلاده‌ت ژ سه‌رۆکوه‌زیرا سوێدی ماگدەلێنا ئەنده‌رسسۆن پرسی.
ئەندەرسۆن د بەرسڤێ دا دبێژە:
– د ڤان رۆژێن داوی دا ل چه‌ند باژارێن سوێدێ مه دیمه‌نێن ترسناک دیتن. کارمه‌ندێن پۆلیس ئێن کو ل هێڤیا بوون جەژنا پۆسکێ (قیامە) دگەل مالباتێن خوە ب بێدەبگی و ئارامی پیرۆز بکن، لێ ئەو نه‌چار بوون کو قانوونێن سوێدی و ئازادیا راده‌ربرینێ ب ژیانێ را بپارێزن. ئەو خوەپیشاندنێن توندرەو و بێسه‌رووبه‌ر نه ب ته‌نێ ل دژی پۆلیسان، ل ئەو ل دژی نرخێن ده‌مۆکراتیک یێن ته‌ڤاهیا جڤاکا مه هاتیه کرن. هه‌ر چقاس ئه‌و په‌یاما پالودان پەیاما کەراهی و توندرویێ بە ژی، لێ نایێ قه‌بوولکرن، نه ره‌وا و نه‌قانوونی یه کو مرۆڤ ب ڤێ توندیا گران را به‌رته‌ک نیشان بده.
رێڤەبەرێ پۆلیسێ سوێدێ ژی ل سەر وان بوویەران دبێژە: کو یا کو وان ب چاڤێن خوە دیتی نە خوەپیشاندانێن ئاسایی یێن دژبەرێن پالودان بوون و ئەو نە خوەپیشاندانێن خەلێ ئاسایی یێ وان دەڤەران بوون، گوومانێن پۆلیسان هه‌نه کو تێکلیا وان خوەپیشاندانان ب گرۆپێن تاوانبار و سووجدار را هه‌یه.
سەرۆکوەزیرا سوێدێ د بەردەومیا بەرسڤا خوە دبێژە:
– ئه‌ز دخوازم پر زه‌لال بێژم: کی ئێریشی پۆلیسێن سوێدی بکه، ئێریشی جڤاکا ده‌مۆکراتیک یا سوێدێ دکه. دڤێ به‌رپرسیار بێن گرتن، جه‌زاکرن و جه‌زایێ خوه بکشینن. هه‌تا نها ٤٤ که‌س هاتنه گرتن.
– ئارمانجا هه‌م راستگرێن توندره‌و و هه‌م ژی یێن چه‌ته‌یان ئه‌وه کو هەڤگرتن و پێکڤەژیانێ تێکبدن، دودلی و نەڤیانێ زێده بکن و جڤاک تەسلیم ببە و خوە پاشدا ڤه‌کشه. به‌رسڤا مه به‌رۆڤاژی یه. پۆلیس دێ ب هێز و مه‌زن ببه و ئالەت و ئاموورێن باشتر وەربگرە.
د ناڤا ڤان چەند رۆژێن چویی دا ژ ئەنجامێ وان ئالۆزی، تەڤلیهەڤی و پەڤچونێن قەومین ٢٦ پۆلی هاتنە بریندار کرن و ٤٤ کەس ژی ژ خوەپیشاندەران هاتنە گرتن.
