ژ نێچیرڤان بارزانی پێنگاڤەک دیرۆکی
جارێ هنده‌ک بوویه‌ر هه‌نه کو دبنە وه‌ک بوونەکێ/میلادەکێ ژ بۆ پێشخستنا جڤاکێ و هه‌روه‌ها دبنه سه‌ده‌مێ رۆناهیه‌کێ ژ بۆ چاره‌سه‌رکرنا پرسگرێکان. وه‌ک تێ زانین ئه‌ڤه ده‌مه‌ک بوو، پەرله‌مه‌نتۆیا ئیراقێ نکاریه سه‌رۆککۆمارێ ئیراقێ هلبژێره. ژ به‌ر کو پەدەکێ و یەنەکێ هه‌ر پارتیەکێ به‌ربژێرێن خوه هه‌بوو. ئانکو نه‌لهه‌ڤکرنا پەدەکێ و یەنەکێ سه‌ده‌مه‌ک بنگه‌هین بوو کو، سه‌رۆککۆمارێ ئیراقێ نه‌هات هلبژارتن و حکومه‌تا نوو یا ئیراقێ ژی ب ڤێ یه‌کێ ڤه گرێدایی نه‌هات ئاڤاکرن.
ب ئاوایه‌کی دن، یه‌کرێزیا د ناڤا مالا کورد دا تێکچووبوو. ده‌ما یه‌کێتیا د ناڤا مالا کورد دا ئالۆز دبه، ده‌زگه‌هێن حکومی ژی ب ئاوایێ پێوست نکارن ئه‌رکێن خوه ب جهبینن. ل ڤێ ده‌رێ پرس نه ئه‌وه کو، سه‌ده‌مێ ئالۆزیان کینه و ژ بۆ چ ئه‌ڤ ئالۆزی ده‌ردکه‌ڤن. بێ گومان جڤاکا کورد ل گۆرا کو بوویەرا دبینه ڤێ یه‌کێ دنرخینه.
رۆژا ٢٠٢٢/٥/٢٢ێ نێچیرڤان بارزانی سه‌رۆکێ هه‌رێما کوردستانێ، ژ بۆ به‌شداریێ د مەراسما ده‌رچوونا دو خولەیێن پێشمه‌رگه ل کۆله‌ژا ٣ یا سه‌ربازی ل قه‌لاچۆلان دا بکه، سەردانا سلمانیێ کر. سه‌رۆکێ هه‌رێما کوردستانێ، هەروەسا، د چارچۆڤەیا سەردانا خوه دا د چەند جڤینێن جودا دا دگەل ئالیێن سیاسی جڤیا.
نێچیرڤان بارزانی د مەراسمێ دا ئاخاڤتنه‌ک کر و به‌حسا هنده‌ک خالێن گه‌له‌ک گرنگ کر.
خالێن گرنگ کو سه‌رۆکێ هه‌رێما کوردستانێ به‌حسێ کرین:
ئه‌م خوینەک نوو دخن ناڤ ره‌فێن پێشمه‌رگه، دڤێ بله‌ز یه‌ککرنا هێزێن پێشمه‌رگه وه‌ره کرن و “ده‌ستێ حزبی ژ سه‌ر پێشمه‌رگه وه‌ره کشاندن.
ژ بۆ پاراستنا شانازی، رێز و حه‌زکرنا پێشمه‌رگه دڤێ پێشمه‌رگه ببن یه‌ک.
نێچیرڤان بارزانی دیار کر کو، دڤێ یەنەکە و پەدەکە ده‌ستێ حزبی ژ سه‌ر پێشمه‌رگه بکشینن.
سه‌رۆکێ هه‌رێما کوردستانێ گۆت: یه‌ککرنا هێزێن پێشمه‌رگه پێویستی ب کار و پێنگاڤه‌که ب له‌ز و ب باوه‌ری هه‌یه.
نێچیرڤان بارزانی داخواز ژ فه‌رماندارێ گشتی یێ هێزێن چه‌کدار یێن ئیراقێ، وه‌زیرێ به‌ره‌ڤانی و سه‌رۆکئه‌رکانێ ئارتێشا ئیراقێ کر کو، وه‌ک د ده‌ستوورا ئیراقێ دا هه‌یه و دڤێ وه‌ک به‌شه‌ک ژی سیسته‌ما به‌ره‌ڤانیا ئیراقێ، هێزا پێشمه‌رگه ببینن و پێدڤیێن پێشمه‌رگه دابین بکن.
نێچیرڤان بارزانی دێ ل سلێمانیێ ب یه‌کێتیا نشتمانی یا کوردستانێ (یەنەک)، ته‌ڤگه‌را گۆڕان، یه‌کگرتوویا ئیسلامی یا کوردستانێ، جڤاکا دادوه‌ریا کوردستانێ و پارتیا ده‌مۆکراتا کوردستانێ (پەدەکە) را بجڤه.
ئه‌ڤ سه‌ردانا سه‌رۆکێ هه‌رێما کوردستانێ جارەک دن نێزکبوونه‌کێ د ناڤبه‌را ئالیێن سیاسی دا په‌یدا دکه و یه‌کرێزیا ئالیێن سیاسی ئاڤا دکه و هه‌روه‌ها ئه‌ڤ یه‌کرێزی دهێله کو هه‌موو داموده‌زگه‌هێن حکومی کارێ خوه دا سه‌ربکه‌ڤن و جاردن کورد بکاربن ل به‌غدایێ ب یه‌کده‌نگی ته‌ڤبگه‌رن و مافێن خوه یێن قانوونی ده‌ستڤه بینن.
هه‌ر کورده‌ک دخوازه کو، هێزه‌کا پێشمه‌رگه یا گرێدایی ده‌زگه‌هێن حکومی هه‌به و پێشمەرگە ئێدی نە هێزەک ژ هێزن پارتیێن سیاسی بن. ئه‌ڤه ده‌مه‌که پرۆژه‌یا یه‌ککرنا هێزێن پێشمه‌رگه د رۆژه‌ڤێ دا یه، لێ مخابن گه‌له‌ک هێدی ئه‌ڤ پێڤاژۆیە برێڤه دچه. ئەگەرەک مه‌زن ژی ئالۆزیا ناڤبه‌را پەدەکێ و یەنەکێ دا یه. ژ بۆ ڤێ یه‌کێ سه‌رۆکێ هه‌رێما کوردستانێ د ڤێ سه‌ردانا خوه یا سلێمانیێ دا مزگینیا له‌زکرنا پرۆسه‌سا یه‌ککرنا پێشمه‌رگه‌یێن کوردستانێ دا.
نێچیرڤان بارزانی، ب سیسەتا خوە یا نەرم و دپلۆماسیا خوە یا ژیر و سەرکەفتی وه‌ک مهەندسێ پێکانینا یه‌کرێزیا د ناڤا مالا کوردان دا یه. هه‌ر ده‌ما کو ناکۆکیێن ئالیێن سیاسی کوور دبن و ژ هەڤ دوور دکەڤن، نێچیرڤان بارزانی ب زانه‌بوون دکەڤە ناڤ تەڤگەرێ و پێنگاڤێن جدیدهاڤێژە و ناهێله دیوارێ یه‌کرێزیێ ب یەکجاری بهەرفە و ژ نووڤه ئاڤا دکه.
۲۲.۰٥.۲۰۲۲
نێرین/شرۆڤه
