ئەردوگان سەرۆککۆمارەک سەرکەفتی بۆ ترکیێ

نەوزاد بەرواری

دوور نابینم هندەک خوەندەڤانێن ڤێ بابەتێ بێژن: چ سەرکەفتن؟ ئەردوگان مروڤەک فاشیستە، رەگەزپەرەستە، ئەگەرێ پرسگرێکێن روژهەلاتا ناڤین و ئەورۆپا و ترکیێ ئەردوگانە! گەلەک ژڤان بوچوونا هەکە هەبن ژی دروستە، بەس ئەو یاریەکا باش و ب مفا بو گەلێ ترک وەک سەرۆککۆمار دکەت، هەر چەندە د هەمی یاریین خوە دا سەر کەفتی نەبویە ژی، بەس هەتا نوکە دەستکەفتێن باش بۆ خوە هەبوینە.
بێ گومان ڤەشارتی نینە فەتحولا گولەن مەلا و دیندارێ بەرنیاسێ ترک، ژ هەمی ئالیان ڤە گەلەک هاریکاریا ئەردوگانی کر هەتا کو ئەردۆگان شیایی دەسهەلاتێ بدەست ڤە بینیت.
فەتحولا گولەن د هەڤپەیڤینەکێ دا بەحسێ ئەردۆگان دکەت و دبێژیت: من گەلەک نسیحەت لێ دکرن و من دگوتێ دژوار و توندرەو نەبە و د سیاسەتێ دا بێهنفرەهی پێویستە…. من هەمی هاریکارییا وی کر حەتا بهێز کەتی، وی چاخی دژی من راوەستا! ئاخفتنەک ل با مە ترکا هەیە دبێژن: “هەکە قەرەچ بو مەلیک یەکەمین شولێ وی دێ باباێ خوە کوژیت دا تایبەتمەندیێن خوە نیشان بدەت”. ئەردۆگان د درێژاهیا دەسهەلاتداریا خوە دا فێری گەلەک کردار و رەوشتێت سەیر بوو. روژەکێ من بەرێ خوەدا تەلەفزیونا رووسی کومبونەک د ناڤبەرا پوتین سەرۆککۆمارێ رووسیا، روحانی سەرۆککۆمارێ ئیرانێ و ئەردۆگان دا هەبوو ، پشتی کومبونێ ژ بو مەدیایێ هەر سێ راوەستان، ل دەستێ چەپێ یێ روحانی راوەستا بوو، پوتینی دڤیا بچیتە نیڤەکێ ناڤبەرا ئەردۆگان و رەعانی، لێ ئەردوگانی ن دەستێکێ خوە دا پوتین و ێێ دی دا روحانی و جهێ خوە ل نیڤەکا وان دا کر، ئەڤ هەلسوکەفت دو جار دگەل ترامپ ژی کر، وی دزانی ترامپ چاخێ دچیتە دەستێ ئێکی بو سفکاتی پێکرن دەستێ وی دکێشیت بو نک خوە. لهەڤدیتنەکا ترامپ و ئەردۆگان پشتی بداوی هاتنا کومبونا وان و ل هەمبەر رۆژنامەڤانان ترامپ دەستێ خوە دا ئەردۆگانی پاشی دەستێ وی کێشا لێ ئەردۆگان ئامادەکاریا خوە کربوو دزانی دێ ترامپ وەسا کەت لەوما دەستێ خوە موکوم گرت و ترامپ نەشیا بکێشیت، لێ ترامپ تێگەهەشت و بەس کرە کەنی، ئەڤ بوویەرە دو جار د مابەینا ترامپ و ئەردۆگان دا بویە.
د ڤان کاودانان دا ئەردۆگان ل سەر دو وەریسا دلەیزیت: ژلایەکی ڤە دناڤ ناتۆیێ دا دڤێت خوە وەکی هێزەکا سەرکی یا ناتۆیێ نیشان بدەت. ژلایەک دی ژی ڤە گەلەک پرەنسیپ و مەرج و یاسایێن ناتۆیێ ل بەر چاڤ ناگریت و شەر و ئالوزیێ دئێخیتە روژهەلاتێ ناڤین، قەفقاز و ئەورۆپایێ، وی دڤێت هێزا خوە نیشانا دەولەتان بدەت و بێژیتە وان: ژبەر جیوپۆلیتیکا ترکیێ چ شەر ئان ئاشتی ل دنیایێ بێی من نابن !!!!
د ئاخفتنەکا خوەدا 23-06-2018 دبێژیت: “د رێخراوا نەتەوێن یەکگرتی دا کەس وەکی من و پوتین بئەزمونتر نینە”، بێ گومان مەبەستا وی ئەو بوو کو ئەردۆگان ئەڤە 20 سالە و پوتین ژوی 23 سالە ددەستهەلاتێ دانە.
سەربارێ حسارێت ئابوری یێن بەرفرهێن ناتۆ و یەکێتیا ئەورۆپایێ کو دانانە سەر رووسیایێ لێ ترکیێ نە کو حسار نە ئێخستە سەر رووسیایێ بەلکی تێکەلی و پەیوەندیێن وان گەلەک دباشن .
د ڤان روژان دا ئەردۆگان دژی بئەندامبوونا سوێد و فینلەندایێ ژی دەنگێ خوە بلند کریە و دبێژیت: ئەز دەنگی بئەندامبوونا ڤان دو ولاتان نادەم ، لێ بەلکی بشێت ڤێ پرۆسێسێ گیرو بکەت بەس نەشێت گەلەک ل سەر رکا خوە بمینیت، ئەز دبینم بارودوخێ شەرێ ئوکراینا و ئاشتیەک ببیت دێ ئەمریکا و روژئاڤا ڤێ زیرەکیا وی لێ تێکبدەن.

٢٠٢٢/٥/٢٢