کا مە ژ بۆ عەفرینێ چ کریە
شێخۆ عه‌فرینی
پشتی هه‌ر تاوانه‌کێ، یان بنپێکرنه‌کێ کو د ده‌رمافێ کورده‌کی عه‌فرینێ دا تێ ئه‌نجامدان، یه‌کسه‌ر ده‌ست ب لۆرین، گرین و نالینان دبه، پۆست و به‌لاڤکۆکێن جوودا جوودا تێنه نڤیساندن، پشتگریا خوه ژ وێ بوویه‌رێ را ددن دیارکرن، لێ د راستیێ دا، نه ب دل و نه ژی ب جان ئاماده یه کو تشته‌کی بچووک، به‌رچاڤ یان گوژمه‌ک په‌ره ژ وی که‌سی کو بنپێکرن د ده‌مافێ وی/ێ دا هاتیه ئه‌نجامدان را پێشکێش بکه‌ن، بێگومان ئه‌ڤ ئاخافتن نه ل سه‌ر هه‌موویان ب جی دبه، ژ به‌ر کو هندەک که‌س هه‌نه دکن، بێ کو ده‌نگێ خوه ده‌رخینن.
هه‌لکه‌فتا ڤێ ئاخافتنێ ئه‌وه کو؛ یه‌ک ژ چه‌کدارێن ئۆپۆسزیۆنا سووریێ ب ناڤێ، به‌شار ئه‌بوو ساله، کو ژ کۆکا خوه ژ باژارێ عه‌زازێ یه، د درێژاهیا دو سالان دا تاوان و بنپێکرنێن نه‌مرۆڤانه ل گوندێن مه‌یدانا (۷ په‌رچه نه) ل ناڤچه‌یا راجۆ یا عه‌فرینێ د ده‌رمافێ کوردان دا ئه‌نجام دانه، کو پشتی وی چەکداری کاریبوو خوه بگهینه ئه‌لمانیایێ، رێخستنا مافێ مرۆڤان ل عه‌فرینێ د ۱٥ێ به‌رچله‌یا ئیسال، ناڤ و وێنه‌یێ وی چەکداری به‌لاڤ کرن، و راگهاند کو وی تاوان ل عه‌فرینێ د هه‌قێ کوردان دا ئه‌نجام دانه، دڤێ ژ بۆ دادگه‌ها ئه‌لمانی بهێتە راده‌ستکرن؛ دا کو سزایێ خوه ببینه، لێ ژ وێ ده‌مێ ڤه تا نها، نه پارێزه‌ر، نه یاساناس نه ژی ده‌وله‌مه‌ندێن کورد، خوه ته‌رخان کرنه کو دۆزا وی تاوانباری بشۆپینن و بدن دادگه‌هکرن!
ژ ده‌ما عه‌فرین که‌تیه وێ ره‌وشێ دا، ب ده‌هان سازی، رێخستن، کۆمه‌له، پلاتفۆرم، ئه‌نجوومه‌ن و ده‌زگه‌ه ب ناڤێ عه‌فرینێ هاتنه دامه‌زراندن، لێ کا تا نها چ ژ خه‌لکێ عه‌فرینێ، یێن ل سه‌ر ئاخا خوه مانه، یان یێن ل کامپێن شه‌هبایێ، یان یێن ده‌ربده‌ر ل حه‌له‌بێ را پێشکێش کرنه؟ به‌رسڤ ئه‌وه کو، کێم خزمه‌تگوزاری و چالاکی هاتنه پێکانین. چه‌ند که‌سان خوه دانه به‌ر وه‌لاتیێن تێنه ره‌ڤاندن و ژ ئالیێ ره‌ڤینه‌ر، یێن په‌ره‌یێن فدیێ دخوازن را، په‌ره دانه و ئه‌و وه‌لاتی رزگار کرنه؟ ب سه‌دان ده‌وله‌مه‌ندێن هه‌رێما چیایێ کورمێنج ل ده‌رڤه‌یی وه‌لات دمینن، کا چ کرنه؟ چه‌ند مالباتێن محتاج خوه‌دی کرنه؟ چه‌ند سێوی ب خوه‌ندن دانه؟ چه‌ند ژنه‌بی (ژنبی) خوه‌دی ل وان ده‌رکه‌تنه؟ چه‌ند نه‌خوه‌ش ده‌رمان و چاره‌سه‌ر کرنه؟ ئه‌گه‌ر هه‌بن ژی ل سه‌ر پێچی و تلیان تێنه هه‌ژمارتن.
ب سه‌دان ئه‌که‌دیمیناس!
د ڤێ داویێ دا مالپه‌را تێریژ یا عه‌فرینێ ناڤێ زێده‌تری ۱۲۰ ئه‌که‌دیمیناسێن کوردێن عه‌فرینێ ل دیاسپۆرا به‌لاڤ کر، و گۆت ل سه‌رانسه‌ری جیهانێ به‌لاڤ بوونه و وه‌که دکتۆر، مامۆسته و پرۆفه‌سۆر د زانینگه‌هێن جهانی دا نه، لێ پشت را هندەک که‌س ده‌رکه‌تن و گۆتن کو هه‌ژمار وان زێده‌تره، دبه کو هه‌ژمار ۲۰۰ ئه‌که‌دیمیناس به ژی. کا ڤان مامۆسته‌یێن زانینگه‌هێن جهانی دۆسه‌یه‌ک ژ هه‌زاران دۆسه‌یێن کو ل عه‌فرینێ هه‌نه گهاندنه ئالیێن په‌یوه‌ندیدار و به‌رپرس؟ هه‌ما چ دۆسیه به، ره‌ڤاندن، بنچاڤکرن، برینداران، شه‌وتاندنا داران، ده‌سته‌سه‌رکرن، گوهه‌رتنا ده‌مۆگرافی، ئاڤاکرنا نشته‌جیگه‌هان، ژناڤبرنا ناسنامه‌یا کوردی و ژیانا سیاسی، بجهکرنا عه‌ره‌بان ل مالێن کوردان دا، و به‌ربه‌لاڤبوونا دیارده‌یێن چه‌کداری؟ گەلۆ یه‌ک ژ ڤان دۆسه‌یان گەهاندنه رێخستنه‌کا جیهانی یان رێخستنێن به‌لگه‌کرنا بنپێکرنان.
گۆتنه‌ک کوردی هه‌یه دبێژه: راستی ته‌حلە، ئه‌ڤ ژی راستیا کو چێ دبه، نه سیاسه‌تمه‌دارێن مه، نه ره‌وشه‌نبیرێن مه، نه ژی ده‌وله‌مدێن مه، نه ژی ئه‌که‌دیمیناسێن مه کاریبوون تشته‌کی ژ عه‌فرینێ را پێشکێش بکن. هه‌رده‌م گلی و گازندان ژ پارتیان تێنه کرن، راسته پەیەدێ عه‌فرین فرۆت، و ئه‌نەکەسێ ژی نکاریبوو خوه‌دی ده‌رکه‌ڤه و نڤسگه‌هێن ل عه‌فرینێ، ناڤچه و گوندێن وێ ڤه‌که، لێ ئه‌م عه‌فرینی ژی تێرا خوه هه‌نه، نێزیکی ملیۆنه‌ک مرۆڤن، مه ب قاسی ١٠% ژی نه‌کریه، دیسا ژی دوباره دکم کو هندەک که‌س هه‌نه ب هێمنی و بێده‌نگی کار دکن و جهێ رێزێ نه.
ب ته‌نێ ئه‌م د گۆتنان دا زیره‌کن ل سه‌ر عەردی بۆش و ڤالا نه. پێویستیا عه‌فرین ب کاره‌کی جدی بله‌ز هه‌یه، ئه‌گه‌ر نا ژی عه‌فرین تێک دچه و هێدی هێدی دده هه‌رێمه‌کا عه‌ره‌ب و تورکمانان.
