ئیراق نکارە پێنگاڤەکێ ژی پاڤێژە
بەری چەند رۆژان ترکیی ب تۆپان هاڤینگەها گوندێ پەرەخێ ل دەڤەرا زاخۆیێ سەر ب پارێزگەها دهۆکێ ڤە تۆپباران کر کو ژ ئەگەرێ وێ تۆپبارانێ ٩ کەسان ژیانا خوە ژ دەست دا و هژمارەک ژی بریندار بوون. یێن ژیانا خوە ژ دەستدایی و یێن بریندار کەتین هەموو ژ نەتەوەیا عەرەب بوون و خەلکێ بەخدایێ و باژارێن باشوورێ ئیراقێ بوون کو ژ بۆ بهێنڤەدانێ هاتبوون وێ هاڤینگەهێ.
پشتی ڤێ بوویەرێ ژ هەموو کۆنج، قۆلاچ و ئالیانڤە پەیام و داخویانی بارین. هندەک ژ وان پەیامام و داخویانیان ب زمانەک دپلۆماسی، هندەک رەق، هشک و دژوار و هندەک ژی ژ گەفان و تۆلەڤەکرنێ داگرتی بوون.
پەیام و داخویانیێن هشک و دژوار و داگرتی ژ گەف و تۆلەڤەکرنێ ژ بەرپرسێن حکومەت و پارتییێن ئیراقی دەرکەتن. بەرپرسێن عیراقی ب ڤان داخویانا خوەست نیشا رایا گشتیا ئیراقێ بدن کو ئەو د خەما وەلاتیێن خوە دانە و خوینا ئیراقیان ب نرخ و بوهایە و ئەڤ تاوان بێ تۆلڤەکرن دەرباس نابە. ڤێ یەکێ باوەریەک د ناڤ هندەک کوردان دا چێکر کو ئەڤە چەند سالە خەلکێ سڤیلێ کورد ل باشوورێ کوردستانێ ژ ئەنجامێ تۆپباران و بۆمبەبارانا لەشکەرێ ترکیێ شەهید و بریندار دبن و کەس دەنگێ خوە ناکە و لێ ڤێ جارێ ژ بەر کو عەرەبن بەرپرسێن ئیراقی قیامەت راکر. د راستیا خوە دا نە وەسایە، حکومەت و بەرپرسێن ئیراقی هندەک ئارمانجێن دن ژ وان داخویانیان هەنە:
بەرپرسێن حکومەت و پارتیێن سیاسی یێن ئیراقێ دخوازن ب ڤان پەیام و داخویانیان و درووشمێن تەیسۆک فکۆسا جادەیا ئیراقی ل سەر گەندەلی، دزی، نەبوونا خزمەتەگۆزاریین بنگەین ببە سەر سەر پرسێن نەتەوەیی و سەروەریا ئیراقێ و خەلکی ب هندەک تشتان ڤە مژوول بکن و کریزا سەرۆککۆماریێ، سەرۆکوەزیرتیێ و پێکانینا حکومەتێ کو ئەڤە ١٠ مەه ب سەر ئەنجامدانا هلبژارتنان را دەرباس بوون، ژ بیرا خەلکی ببن.
ئیراق هەتا حەڤکێ یا کەتیا د ناڤ شەر، پەڤچوون و ناکۆکیێن نەتەوی، تایفی و مەزهەبی. ب تایبەتی ناکۆکیێن د ناڤبەرا ئالیێن شیعە دا. ئەڤ پەیام و داخویانی بازارەک و مزیدەیا سیاسییە و هەر کەساتی، بەرپرسی و پارتییەکێ دڤیا خوە ژ یێ دی مخلستر و نشتمانپەروەرتر نیشان بدە و رەئیا جادەیێ بەر ب ئالیێ خوە ڤە بکێشە.
ئەگەر ئیراق راست دبێژە کو دێ رێاکسیۆنەک دژوار ل دژی پەکەکێ و ترکیێ نیشان بدن، هەما بلا ژ جیبجیکرنا رێکەفتنا شنگالێ دەست پێ بکە و گرۆپێن نەیاسایی ژ ناڤ باژێر دەربخە و پۆلیسێ فەدەرالی ئەمنیەتا وێ دەڤەرێ بپارێزە، لێ نکارن، خوە جەرباند، چەند جارەکا لەشکەرێ ئیراقێ بەر ب وێ دەڤەرێ ڤە ب رێ کەت لێ گرۆپێن چەکدار یێن دەرڤەیی یاسایێ پێشیا وان گرت و لەشکەرێ ئیراقێ نەکاری دەرباسی دەڤەرێ ببە.
ئیراق نکارە پێنگاڤەکێ ژی پاڤێژە
نێرین/شرۆڤه
2022.07.23
