تێکەلیێن ترکیێ و سوریێ و چەند گوهارتن
سه‌رۆککۆمارێ ترکیێ، رەجەب تەیب ئه‌ردۆگان، به‌ری هەیامەکی داخوویاکرن کو، ئەو دێ ئۆپه‌راسیۆنه‌کا دن ل سوریێ و رۆژاڤایێ کوردستانێ بکن دا کو بکاربن ئه‌وله‌هیا تخووبێن خوه بپارێزن. هه‌روه‌ها د ڤێ ده‌ربارێ دا وه‌زیرێ ده‌رڤه یێ ترکیێ ژی د چه‌ند مناسه‌به‌تان دا به‌حسا پێوستیا ئۆپه‌راسیۆنه‌کێ ل سوریێ و رۆژاڤایێ کوردستانێ کر.
ئەمریکا ل دژێ ئۆپه‌راسیۆنا ترکیێ هه‌لوه‌ستا خوه ئاشکه‌ره کر و داخوویاکرن کو، ئۆپه‌راسیۆنه‌ک د ڤی ده‌می دا دێ زیانێ ب شه‌رێ ل دژێ داعشێ بگەهینە. هه‌روه‌ها روسیا و ئیرانێ ژی هەلوەستا خوە ب ڤه‌کری دانخوویاکرن و گۆتن کو نابه ئەرتەشا ترکیێ ئۆپه‌رسیۆنه‌کێ ببە سەر سوریێ.
پشتی هه‌ڤدیتنا سه‌رۆکێ روسیا و سەرۆکۆمارێ ترکیێ یا ڤێ داویێ ل سۆچی، ره‌وشه‌ک دن ده‌رکه‌ت هۆلێ. پوتن، ل شوونا کو ترکیه دژاتیا رژێما سوریێ بکە، وی خووست کو، ترکیه دگه‌ل سوریێ دانو دەست ب دانوستاندان بکە. وەک تێ زانین کو ژ خوە ئه‌ڤه ده‌مه‌که د ناڤبه‌را ده‌زگه‌هێن ئیستخباراتا ترکیێ و سوریێ دا هه‌ڤدیتن هه‌نه. ئەڤ داخوازا پوتن د هەمان ده‌مێ دا داخوازا ئۆپۆزسیۆنا ترکیێ ب خوه یه ژی.
د مه‌دیایێ دا هاته ئیدیعاکرن کو، نه دووره د ناڤبەرا ئه‌ردۆگان و ئه‌سه‌د دا ته‌له‌فۆنی پێکبینن.
روسیا ئه‌ردۆگان رازی کریه کو، تێکەلیێن دگه‌ل رژێما ئه‌سەد دکارە پتر ببه ئەگەرێ پاراستنا ئه‌وله‌هیا تخووبێن ترکیێ. ژ به‌ر کو روسیا ب خوه ژی دخوازه کو هێزێن چه‌کدارێن هەسەدە ببه به‌شه‌ک ژ هێزا لەشکەرێ سوریێ و
ل گه‌له‌ک دەڤەران ل سه‌ر داخوازا روسیایێ هەسەدێ هنده‌ک دەڤەر راده‌ستی هێزێن رژێمێ کرنە. ده‌ما ترکیێ به‌حسا ئۆپه‌راسیۆنێ کری به‌رپرسێن هەسەدێ دانخوویاکرن کو، ئه‌و ل گه‌ل لەشکەرێ سوریێ هه‌ڤکاریێ دکن.
ل ڤێ ده‌رێ فاکتۆرا ئەمریکایێ رۆله‌ک دن دله‌یزە کو ناخوازه هێزێن هەسەدێ خوه نێزکی رژێمێ بکن. ژ به‌ر کو ئەمریکا چه‌کان دده هەسەدێ و وان خوه‌دی دکه. ئانکو هەسەدە ب ته‌مامی د بن کۆنترۆلا ئەمریکایێ دایە و ل پرانیا دەڤەرێن رۆژاڤایێ کوردستانێ ب هەڤ را تەڤدگەرن و داخوازا ئەمریکایێ یا سه‌ره‌کی ئه‌وە کو هەسەدە وەکە هێزەک سەرەکێ بمینە و شەرێ دژی داعشێ بکه. تایبه‌تی ژی ده‌رڤه‌یی هه‌رێما رۆژاڤایێ کوردستانێ ئه‌ڤ شه‌ر تێ کرن.
ل هەمبه‌ر ڤان هه‌موو بوویه‌ران، هەر کەس دزانو کە ترکیه رۆژانە ئۆپه‌راسیۆنێ ل رۆژاڤایێ کوردستانێ دکه، رۆژانه ل رۆژاڤایێ کوردستانێ ل هەمبه‌ر به‌رپرسێن هەسەدێ ب درۆنا ئۆپه‌راسیۆنا دکه، ده‌ڤه‌رێن نێزکی تخووبێ باکورێ کوردستانێ تۆپباران دکه. رۆژانه خه‌لکه‌ک سڤیل د ڤان ئۆپه‌راسیۆنێن ترکیێ دا ژیانا خوه ژ ده‌ست ددن و بریندار دبن.
ژ ئالیه‌ک دن ڤه به‌شه‌کا به‌ربچاڤ یا رۆژاڤایێ کوردستانێ و سوریێ د بن ده‌ستێ ترکیه دا یه. ترکیێ ل گه‌له‌ک ده‌ڤه‌ران ده‌ستهلاتا خوه دانیه و ل سه‌ر ڤێ ئاخێ جهبوویه. ئەمریکا،روسیا و ئیران ڤێ یه‌کێ دبینن و دزانن. لێ ترکیه تشتێ دخوازه دکه و گوهێ خوە ناده کەسێ. ژ به‌ر کو هه‌ڤبه‌ندیه‌ک نهێنی یا ترکیێ دگه‌ل ڤان وه‌لاتان هه‌یه. ئانکو هه‌تا نها چو وه‌لاته‌کی ب ئاوایەکی زەلال و ڤەکری ل دژی ترکیێ پشتەڤانیا دەستهەلاتا رۆژاڤایێ کوردستانێ نه‌کریه.
نه دووره د ده‌مه‌ک نێزیک دا پێوه‌ندیێن ترکیێ و سوریێ بکه‌ڤن د واره‌ک ئاسایی دا و ب ڤێ یه‌کێ ڤه گرێدایی پێوه‌ندی د ناڤبه‌را ئیداره‌یا خوه‌سه‌ر و ترکیێ ژی ده چێببن.
٢٠٢٢.٨.١١
نێرین / شرۆڤه
