شۆرەشگەری ب کراسێ کەڤن نابە
گه‌له‌ک جاران مرۆڤ ڤێ پرسێ ژ خوه دکه. گه‌لۆ شۆره‌شگه‌ری چ یه، شۆره‌شگه‌ر کینه، شۆره‌شگه‌ر چ دخوازن و د ده‌ما ئیرۆ دا دڤێ شۆره‌شگه‌ر چەوا بن؟
گاڤا مرۆڤ شۆره‌شگه‌رێن وێ ده‌مێ و یێن ڤێ ده‌مێ دئینە به‌ر هه‌ڤ، مرۆڤ دبینه کو هه‌مان شۆره‌شگه‌رێن کورد یێن به‌ری ٤۰-٥۰ سالان ئیرۆ د ره‌وشه‌ک دن دا نه و ئه‌و فیداکاری و به‌ده‌لێن کو وێ ده‌مێ ددان، ئیرۆ نکارن یان ناخوازن بدن. ئه‌و شۆره‌شگه‌رێن کو هه‌ول ددان د جڤاکا کوردی دا گوهه‌رتنان بکن و ژ بۆ وان گوهه‌رتنان گه‌له‌ک به‌ده‌لێن گران دان، ئیرۆ نکارن هه‌مان هه‌لوه‌ست هەبە.
شۆره‌شگه‌ری نه ته‌نێ خوه‌ستنا شۆره‌شێ یه. شۆره‌شگه‌ری خوه‌گوهه‌رتنه، خوه نووژه‌نکرنه، ره‌خنه‌کرن و ره‌خنه‌لخوه‌گرتنه، حه‌ز و حه‌زکرن، رێز و رێزگرتنه. هه‌م د وارێ هشمه‌ندی و ئیدیۆلۆژیک دا، هه‌م د وارێ هه‌ست و هه‌لوه‌ستێ دا خوه‌گوهه‌رتنه. ب کورتی، شۆره‌شگه‌ری گوهه‌رتن و نووژه‌نکرنا هه‌ر تشتی یه. که‌سێن شۆره‌شگه‌ر به‌ری هه‌ر تشتی دڤێ خوه بگوهه‌رینه، به‌ری گوهه‌رتنا جڤاکێ دڤێ د مه‌ژی و به‌ده‌نا خوه دا گوهه‌رتنان چێکه. یان نا، ب مه‌ژی و ئیدیۆلۆژییا به‌ری ٤۰-٥۰ سالان نه شۆره‌شگه‌ری دبه و نه ژی شۆره‌ش پێک تێ. ب کوم و کراسێ به‌ری ٥۰ سالی نه خزمه‌ت ژ جڤاکا کورد را تێ کرن، نه ژی کوردستان تێ رزگارکرن. شۆره‌شگه‌رێن کو ل گۆر شه‌رت و شرووتان، ل گۆر پێڤاژۆیێ، ل گۆر خوه‌سته‌ک و داخوازێن جڤاکا خوه خوه نووژه‌ن نه‌کن، هه‌م وه‌ک شه‌خس، هه‌م ژی وه‌ک رێخستن یان پارتی دێ خەلەکەکا ڤالان دا هەر بزڤرن.
ئیرۆ ل باکورێ کوردستانێ هه‌ما بێژن ته‌مامێ کادر و رێڤه‌برێن ته‌ڤگه‌ر و پارتییێن کوردستانی شۆره‌شگه‌رێن به‌ری ٤۰-٥۰ سالانه. ب مه‌ژییێ خوه، ب نه‌رین و ئیدیۆلۆژییا خوه، ب هه‌ست و هه‌لوه‌ستا خوه، خوه د شه‌رت و شرووتێن به‌ری ٥۰ سالان دا دبینن، ب مه‌ژییێ به‌ری ٥۰ سالی خه‌باتێ دکن و ب مه‌ژییێ به‌ری ٥۰ سالی نێزیکی دۆزا ئازادی و رزگارییا مله‌تێ کورد دبن. سیاسه‌تا ئیرۆ ل گۆر مه‌ژییێ به‌ری ٥۰ سالان دمه‌شینن. یانی، ب کراسێ که‌ڤن سیاسه‌تێ دکن و دخوازن وی کراسێ که‌ڤن ل جڤاکا کوردی بکن. ژ به‌ر کو مه‌ژی مه‌ژییێ به‌ری ٤۰-٥۰ سالی یه، کراس کراسێ که‌ڤن و قه‌تیایی یه، نکارن خوه نووژه‌ن بکن و د کار و خه‌باتا خوه دا درزن کێم دبن و زێده‌تر نابن.
د سه‌ر شۆره‌شگه‌رییا که‌ڤن را ٤۰-٥۰ سال ده‌رباس بوون. دنیا هات گوهه‌رتن، کراس و مه‌ژییێ جڤاکا کوردی هات گوهه‌رتن، شه‌رت و شرووتێن کار و خه‌باتێ هاتن گوهه‌رتن، و یا هه‌ری گرینگ ژی هه‌ست و هه‌لوه‌ست، چاند و زمان هاتن گوهه‌رتن. ژ بۆ ئه‌م کاربن دیسا خوه ب جڤاکا خوه بدن قه‌بوولکرن و پشتگرییێ ژێ بستینن، دڤێ ئه‌م خوه ب حه‌فت قالبێن سابوونێ بشۆن، خوه ژ گونه‌ه و کێماسییێن خوه داوشینن، کراسێ که‌ڤن ژ خوه بکن و کراسه‌کی نوو ل خوه بکن. دڤێ ئه‌م پاشه‌رۆژ و رابردوویا خوه د به‌ر چاڤ را ده‌باس بکن، کێماسی و خه‌له‌تییێن خوه ببینن، ژ به‌ر ئێشاندنا جڤاکا خوه خوە رەخنە بکن، لێبۆرینا خوه بخوازن و ب مه‌ژییه‌کی نوو، ب کادر و نفشه‌کی نوو، ب رێ و رێبازه‌ک نوو به‌رێ خوه بدن جڤاکا خوه.
دڤێ ئه‌م ژ بیر نه‌کن کو ئه‌رکا پێشین یا شۆره‌شگه‌ران قانعکرن و بدەستخستنا باوەریا جڤاکێ یە. دڤێ ب ژیانا خوه، ب فکر و هزرا خوه، ب پلان و پرۆژه‌یێن خوه، ب هه‌ست و هه‌لوه‌ستا خوه، ب ئه‌خلاق و سەمیمییه‌تا خوه خوه ب جڤاکێ بده قه‌بوولکرن. ئه‌ڤ یه‌ک ژی ب مه‌ژی و کراسه‌کی نوو چێدبه، ب سیاسه‌ت و ستراته‌ژییه‌ک نوو و ب روحه‌کا گه‌ش و کوردایه‌تی دبه.
ب کورت و کورمانجی؛ دنیا دگوهه‌ره، شه‌رتێن ژیانێ دگوهه‌رن، شه‌رتێن کار و خه‌باتێ دگوهه‌رن و پێ ڤه گرێدایی جڤاکا مه ژی د بن باندۆرا وان گوهه‌رتنان دا خوە دگوهه‌ره. دڤێ ئه‌م نه ب شێوه و مه‌تۆدێن که‌ڤناره، لێ ب شێوه و ده‌رفه‌تێن نوو، ب هشمه‌ندییه‌ک نوو، ب کراسه‌کێ نوو ده‌رکه‌ڤن قادا ته‌کۆشینێ.
نووری چەلیک
