ئیفلاسبوونا پارتی و رێکخستنێن باکور
نزانم گه‌لۆ ل وه‌لاته‌کی دن ئه‌وقاس رێخستن و پارتی هه‌نه یان نا، لێ ئه‌ز زانم هه‌که خه‌لاته‌ک نۆبه‌ل یێ ژ بۆ زێده‌بوونا پارتییان بهاتا دان، سه‌دی سه‌د دێ ئه‌و خه‌لات دێ ببوویا پارا مه کوردان. ل باکور ۳۰-٤۰ ملیۆن کورد دژین، ژ ئەورۆپایێ زێده‌تر ڕرێخستن و پارتییێن وان هه‌نه. ل رۆژاڤا ۳-٤ ملیۆن کورد دژین، ژ ئیسکاندیناڤیا و رووسیایێ زێده‌تر پارتییێن وان هه‌نه. ل باشوور ٦-۷ ملیۆن کورد دژین، ژ چین و ماچینێ زێده‌تر پارتییێن وان هه‌نه. ل رۆژهلات ۱۲-۱٥ ملیۆن کورد دژین، ژ ئەمریکایێ زێده‌تر پارتییێن وان هه‌نه. وه‌ک من گۆت، هه‌که خه‌لاته‌ک نۆبه‌ل ێێ ژ بۆ زێده‌بوونا پارتییان بهاتا دان، سه‌دی سه‌د ئه‌مێ ببوونا خوه‌دییێ خه‌لاتا نۆبه‌ل.
وه‌رحاسل، دبێژن ” هه‌رکه‌س ل سه‌ر مرییێ خوه دگری”. ئه‌مێ ژی ل سه‌ر مرییێن خوه یێن باکور بگرین و ژ خوه گرانییا مژارێن مه ژی ل سه‌ر باکورن.
ئه‌زئه‌زی، به‌رژه‌وه‌ندی، مه‌قام و پۆزبلندییا رێڤه‌بر و کادرۆیێن پارتییێن مه بوویه وه‌ک په‌نجه‌شێرێ و که‌تیه لاشێ وان. ئه‌ڤ نه‌خوه‌شی د پێشییا تفاق و یه‌کیتییه‌ک نه‌ته‌وی دا بوویه که‌له‌م و ستری و د لاشێ کوردان ده رادبه. ئه‌ڤ رێڤه‌بر و کادرۆیێن کو ٤۰-٥۰ سالن د ناڤا سیاسه‌ت و ته‌کۆشینێ دا نه و گه‌له‌ک ژ وان به‌ده‌لێن گران ژی دانه، دکن و ناکن نایێن جه‌م هه‌ڤ و نکارن یان ناخوازن د بن سیوانه‌کێ دا ببن هێزه‌ک کوردستانی. د گۆتنێ دا هه‌لبه‌ت کوردستانی نه، لێ ل قادێ چو خزمه‌ته‌ک به‌ربچاڤ ژ کوردستانێ را ناکن. ب سه‌ر کو دزانن ب ته‌نا سه‌رێ خوه نکارن گاڤه‌کێ ژی پێش دا هه‌رن، لێ دیسا ژی چاڤێن خوه ژ راستییێ را دگرن و سیاسه‌ته‌ک هندک و ر ندک، گه‌رمک و نه‌رمک، سیاسه‌ته‌کێ ئێش و بێ به‌ده‌ل دمه‌شینن. ئه‌ڤ یه‌ک ژی بێ گومان چو خێر و به‌ره‌که‌تێ ناده پێشکه‌تنا دۆزا مه و د ئه‌نجامێ دا روون ل سه‌ر نانێ سیاسه‌ت و پلان و پرۆژه‌یێن ده‌وله‌تێ و هێزێن پێ ڤه گرێدایی را دکه.
ئیرۆ ل باکور ب ناڤێ پەدەکە ٥-٦ پارتی هه‌نه. هه‌موو ژی خوه وه‌ک پارێزه‌رێن رێبازا بارزانی دبینن و شوور سمبێلێ وان نابره. چو پرسگرێکێن ئیدیۆلۆژیک یێن کو وان دووری هه‌ڤ بخن نینن. پەسەکە و پاک کوردستانی نه و دیسا چو پرسگرێکێن وان یێن ئیدیۆلۆژیک کو وان دووری هه‌ڤ بخن نینن. ب ده‌هان، به‌لکی ب سه‌دان که‌سایه‌ت، ره‌وشه‌نبیر و نڤیسکارێن کو کوردستانی نه و چو پرسگرێکێن وان یێن ئیدیۆلۆژیک ب هه‌ڤ را نینن، هه‌نه. لێ چ حکمه‌ت به ئه‌و ژی وه‌ک پارتییێن هه‌یی نایێن جه‌م هه‌ڤ و نکارن د بن سیوانه‌کێ دا ببن یه‌ک. هه‌رکه‌س دخوازه ب ده‌سته‌کی راهژه دو-سێ زه‌به‌شان، لێ ئه‌نجام تۆفان بۆهرانه.
براستی چ ب مه هات؟ چ ب وان کادرۆ و رێڤه‌برێن کو د ده‌ما خوە دا وه‌ک چرووسکێن ئاگر بوون، هات؟ ئه‌و گه‌رمی، فه‌داکاری، ڕروحێ شۆره‌شگه‌ری و کورده‌واری چ لێ هات؟ ئه‌و رێڤه‌بر و کادرۆیێن کو پرانییا وان ئیرۆ ژی سه‌رکێشییا ته‌ڤگه‌را کورد دکن و هینا ب هشمه‌ندییا به‌ری ٤۰ سالی دلڤن، ویژدانه‌ن چاوا کارن رازێن؟ چ د ده‌ستێ مه دا مایه کو ئه‌م ل سه‌ر ل هه‌ڤ ناکن؟ ئه‌م هه‌موو تێک چوون، مه رێخستن و پارتییێن خوه تێک برن، مه مه‌یدان ژ خێرنه‌خواز و نه‌یاران را هشت، و هینا ژی ئه‌م دبێژن ئه‌ز و ئه‌ز. په‌لوولا کو ب سه‌رێ مه دا رژیایه ب سه‌رێ چو که‌سی دا نه رژیایه. لێ دیسا ژی ئه‌م ژ هه‌ڤ داناخون و ل رێ و چاره‌سه‌رییه‌کێ ناگه‌رن.
گۆربوهەشتێ جه‌گه‌رخوین دگۆت، “هه‌گه‌ر ئه‌م نه‌بن یه‌ک، ئه‌مێ هه‌رن یه‌ک ب یه‌ک”. هوون ده‌ڤ ژی یه‌ک و یه‌کێ ژی به‌ردن، هه‌گه‌ر ئه‌م نه‌بن یه‌ک، ئه‌مێ کۆم ب کۆم هه‌رن، ئه‌مێ وه‌ک مله‌ت هه‌رن. و د ڤێ چوونێ دا هه‌لبه‌ت سووجدار و سه‌رسه‌به‌بێن هه‌ری مه‌زن ژی ئه‌مێ ب خوه بن. ژ به‌ر ڤێ، دڤێ هه‌ر ئه‌ندام و فه‌ردێ ڤان پارتییێن هه‌یی زۆری ل سه‌رۆک و رێڤه‌برێن خوه بکن کو به‌رژه‌وه‌ندییێن خوه یێن پارتیتییێ ده‌ینن ئالییه‌کی و ژ بۆ تفاق و یه‌کیتییا پارتی و ته‌ڤگه‌رێن کوردستانی ئه‌رکێن خوه بینن جه. ئیدیۆلۆژی، ئۆل و مه‌زهه‌ب چ دبن به‌لا ببن، هه‌گه‌ر سەمیمییه‌ت و پچه‌ک هزرا کوردایه‌تییێ ب مه را مابه، تشته‌کی کو ئه‌م نکاربن ل هه‌ڤ بکن نینە. دڤێ ئه‌م نه‌دن دو تشتێن چوویی. یا گرینگ ئه‌ڤه کو ئه‌م کاربن ده‌رسان ژ پاشه‌رۆژا خوه بستینن و رووپه‌له‌کی نوو ژ بۆ پێشه‌رۆژا خوه ڤه‌کن. ئه‌و رووپه‌ل ژی سەمیمییه‌ته، دروستی یه، باوه‌ری و جه‌ساره‌ته. هه‌که ئه‌ڤ هه‌بن وێ ئاڤاکرنا تفاق و یه‌کیتییێ نه زه‌حمه‌ت به.
ئیفلاسبووناوه‌خت و زه‌مان ل به‌ندا مه نامینه، زوو ده‌رباس دبه و خه‌له‌تییان ژی عه‌فوو ناکه. ده‌ستێ ب ته‌نێ ده‌نگ ژێ نایێ. هێشتا کو فه‌رسه‌ند د ده‌ستێ مه دا هه‌یه دڤێ ئه‌م ئه‌رکێن خوه بینن جیه و ل هه‌ڤ کۆم ببن. یان نا، ئه‌م ل دنیا و ئاخره‌تێ وه‌ک رووره‌شێن کورد و کوردستانێ بمینن.
