نێچیرڤان بارزانی به‌شداری تازیا قوربانیێن ئه‌ردهه‌ژێ دبه
برێز نێچیرڤان بارزانی سه‌رۆکێ هه‌رێما کوردستانێ، ئیرۆ یه‌کشه‌مێ ٢٠٢٣/٢/١٢ێ ل کۆنسولخانه‌یا گشتیێ یا ترکیه‌یێ ل باژارێ هه‌ولێرێ، به‌شداری مه‌راسیما تازیا قوربانیێن ئه‌ردهه‌ژا ٦ێ ڤێ مه‌هێ ل ترکیێ و سووریێ کو ب هه‌زاران که‌س بوونه قوربانی کر.
سه‌رۆک نێچیرڤان بارزانی، د ده‌فته‌را تۆمارکرنا په‌یامان دا، په‌یامه‌کا سه‌رساخیێ تۆمار کر و ژ بۆ وێ کاره‌ساتا ب ئێش کو ژ ئه‌نجاما ئه‌ردهه‌ژه‌کا وێرانکه‌ر کو ل ١٠ پارێزگه‌هێن ترکیه‌یێ و چه‌ند باژارێن سووریێ قه‌ومی، ب ناڤێ خوه و هه‌رێما کوردستانێ، سه‌رساخی و هه‌ڤسۆزی و هه‌ڤخه‌میا خوه پێشکێشی ب گه‌ل، حکوومه‌ت و سه‌رۆکاتیا ترکیێ کر.
سه‌رۆک نێچیرڤان بارزانی ته‌که‌ز کر کو ل هه‌رێما کوردستانێ دگه‌ل هەموو مرۆڤاتیێ، ب دل و ده‌روونه‌کی خه‌مگین، هزر و دلێ مه دگه‌ل گه‌لێ ترکیێ و مالبات و که‌سووکارێن ب هه‌زاران قوربانیانه کو چو جاری وێنه‌یێن تراژیک و دیمه‌نێن کاڤلان و وێرانبوونا باژار و ئاڤادانیان ژ بیرا مه ناچن و ده‌روونێ مرۆڤی دهه‌ژینن.
سه‌رۆکێ هه‌رێما کوردستانێ، هه‌ر وه‌سا، ژ خوه‌دایێ مه‌زن خوه‌ست کو جانێ قوربانیان ب میهره‌بانی و دلۆڤانیا خوه شاد بکه و سه‌بر و هه‌دارێ ب مالباتێن وان بده و هێڤیا باشبوونێ ژ برینداران را خوه‌ست. ته‌که‌ز ژی کر کو هه‌رێما کوردستانێ ئاماده‌یه، چو ژ ده‌ستێ وێ بێ، ئالیکاریێ بکه.
کۆنسولێ گشتی یێ ترکیێ خوه‌شهالیا وه‌لاتێ خوه ژ بۆ به‌شداربوون و هه‌ڤخه‌میا سه‌رۆک نێچیرڤان بارزانی د ڤێ پرسێ دا و ژ بۆ هه‌لوه‌ستا هه‌رێما کوردستانێ ب گه‌ل و حکوومه‌ت ڤه ژ بۆ ئالیکاریا قوربانیان نیشان دا.
