نێچیرڤان بارزانی بانگ ل ئالیێن ئیراقی و کوردستانی دکە
نێچیرڤان بارزانی سه‌رۆکێ هه‌رێما کوردستانێ د پەیامەکێ دا ب هەلکەفتا ١١ێ ئادارێ بانگ ل هه‌موو هێز و ئالیێن ئیراقی و کوردستانی دکە کو ده‌رس و په‌ندێ ژ ڤێ دیرۆکێ وه‌ربگرن و هه‌موو ژ شاشیێن به‌رێ سوود ببینن. ده‌وله‌مه‌ندی و ئیمکانێن ماددی و مرۆڤی ژ بۆ پێشخستنا وه‌لات و به‌خته‌وەریا وه‌لاتیان بکار بینن. ب هه‌ڤ را ژ بۆ پاراستنا مافێن هه‌موو پێکهاته‌یێن ئیراقێ، سیسته‌ما فه‌ده‌رالی، سه‌روه‌ری، ئاشتی و ئارامیا وه‌لات کار بکن.
ئەڤ ل ژێر تێکستا پەیاما سەرۆکێ هەرێما كوردستانێ:
ئیرۆ د بیرانینا ٥۳ سالیا وێ دا، ئەم ب رێز و حورمه‌ت ڤه رێکه‌فتنا ۱۱ێ ئادارا ۱۹۷۰ێ شۆره‌شا ئیلۆنێ یا ب رێبه‌ریا بارزانی یێ نه‌مر، دگه‌ل حکوومه‌تا ئیراقێ، ب بیر تینن. سلاڤ و نه‌مری ژ بۆ هه‌موو شه‌هیدێن کوردستانێ و وان مێرخاسان دشینین یێن کو د شۆره‌شا مه‌زن یا ئیلۆنێ دا به‌شدار بوون.
رێکه‌فتنا ۱۱ێ ئادارێ د وێ ره‌وش و هه‌ڤکێشه‌یا دژوار و ته‌ڤلیهه‌ڤ یا هه‌رێمی و ناڤده‌وله‌تیا هینگێ دا، سه‌رکه‌فتنه‌ک مه‌زن و گرینگترین به‌لگه‌نامه‌یا فه‌رمی یا په‌ژراندی بوو کو هنده‌ک ژ مافێن گه‌لێ کوردستانێ ناس کرن و ره‌واتیا دۆزا وی ب جیهانێ گەهاند. ئه‌و رێکه‌فتن بوو بنگه‌ها سه‌ره‌که یا هه‌موو ده‌ستکه‌فتێن پاشتر یێن گه‌لێ کوردستانێ هه‌ر ژ سه‌رهلدانێ هه‌تا ئاڤاکرنا پەرلەمه‌نتۆ، حکوومه‌ت و فه‌ده‌رالیزمێ.
رێکه‌فتنا ۱۱ێ ئادارێ چاره‌سه‌ریه‌کا نموونه‌یی بوو کو دکاریبوو ئیراق و گه‌لێ وێ ب ته‌مامی به‌ر ب چاره‌نڤیسه‌ک گه‌شتر ڤه ببه و بکه یه‌ک ژ وه‌لاتێن هه‌ری پێشکه‌تی یێن ناڤچه و جیهانێ. لێ پۆشمانیا رایه‌دارێن ئیراقێ و هلبژارتنا لۆژیکێ هێزێ ل شوونا هێزا لۆژیکێ، ژ شه‌ر، ئێش، پاشڤه‌مان و بهه‌ده‌ردانا سه‌روه‌ت و سامانێن وه‌لات پێڤه تشته‌کی دن ژ ئیراقێ را نەئینا. ئیراق هێشتا ژی باجا وێ شاشیێ دده.
ب ڤێ هه‌لکه‌فتێ، ئه‌ز بانگ ل هه‌موو هێز و ئالیێن ئیراقی و کوردستانی دکم کو ده‌رس و په‌ندێ ژ ڤێ دیرۆکێ وه‌ربگرن و ئه‌م هه‌موو ژ شاشیێن به‌رێ سوود ببینن. وه‌رن ئه‌م ده‌وله‌مه‌ندی و ئیمکانێن ماددی و مرۆڤی ژ بۆ پێشخستنا وه‌لات و به‌خته‌وەریا وه‌لاتیان بکار بینن. وه‌رن ئه‌م ب هه‌ڤ را ژ بۆ پاراستنا مافێن هه‌موو پێکهاته‌یێن ئیراقێ، سیسته‌ما فه‌ده‌رالی، سه‌روه‌ری، ئاشتی و ئارامیا وه‌لات کار بکن. وه‌رن ئه‌م هه‌موو ب هه‌ڤقه‌بوولکرن، تۆله‌رانس، پێکڤه‌ژیان، براتی و یه‌کرێزی، ژ بۆ ئاڤاکرنا وه‌لاته‌کی ئاڤه‌دان، ژیانه‌ک خوه‌ش و بهێز ژ بۆ پاشه‌رۆژه‌ک باشتر ب هه‌ڤ را کار بکن.
ب روومه‌ت به بیرانینا رێکه‌فتنا ۱۱ێ ئادارا ۱۹۷۰ێ .
سلاڤ ل گیانێ شه‌هیدان.
نێچیرڤان بارزانی
سه‌رۆکێ هه‌رێما کوردستانێ
٢٠٢٣/٣/١١
