قه‌ندیل پیشتگریا کلچدارۆگلو دکه، لێ کەس نزانە بەرامبەر چ؟
وه‌ک تێ زانین د ده‌ما بریارا هلبژارتنا هات گرتن هه‌تا وه‌ک ڤێ گاڤێ هەدەپە د ناڤا گۆتوبێژان دا بوو. هەدەپێ د سه‌ری دا داخوویاکرن کو، ئه‌و د ناڤا خوه دا ژ بۆ دەستنیشانکرنا به‌ربژێره‌کی بۆ سه‌رۆککۆماریێ دخه‌بتن. هه‌تا شاندەیا هەدەپێ سه‌ردانا ده‌مرتاش کر و ژێ را پێشنیار بر کو ببه به‌ربژێر. ده‌مرتاش قه‌بول نه‌کر و هەدەپێ داخوویاکرن کو ئه‌و دخوازن به‌ربژێره‌ک ژن ده‌ستنیشان بکن. لێ ئه‌ڤ هه‌موو له‌یزتکه‌ک سیاسی بوو.
ژ به‌ر کو، هەر ژ رۆژا بریارا هلبژارتنا هاتی دایین قه‌ندیل و جەهەپێ ل هه‌ڤکری بوو. ممکنه هه‌ڤسه‌رۆکێن هەدەپێ ناڤه‌رۆکا ڤێ لهه‌ڤکرنێ نزانن، ژ به‌ر کو هه‌ڤسار ب ته‌مامی د ده‌ستێ قه‌ندیلێ دایە. هه‌تا ئه‌ڤ یه‌ک د ناڤا کوردێن کو پشتگریا هەدەپێ دکن بوو سه‌ده‌مێ چێبوونا نەخوەشی و رەخنەیان.
هه‌تا ڤێ گاڤێ لهه‌ڤهاتنا جەهەپێ و قه‌ندیل نەهاتیە ئاشکه‌ره‌کرن و دێ چوجاری ژی نکاربن ئاشکه‌ره بکن. ئه‌گه‌ر کلچدارۆگلو سه‌ربکه‌ڤه دێ د ده‌ستهلاتا خوه دا جهی بده هەدەپێ. لێ دێ ڤێ جارێ نوونه‌رێن قه‌ندیل د ناڤا ده‌ستهلاتێ دا دێ نه کورد بن. نوونه‌رێن قه‌ندیل حەسەن جه‌مال، جه‌نگیز چاندار و یێن وه‌ک سری سوره‌یا بن. یانی دێ که‌ساتیێن که‌مالیست بن .
هەدەپێ ب ئاوایه‌ک ئاشکه‌ره ب رێیا تفاقا که‌د و ئازادیێ پشتگریا خوه ژ بۆ کلچدارۆگلو ئاشکه‌ره کر. د داخوویانیێ دا جاردن به‌حسا کوردا نه‌کرن و تفاقا که‌د و ئازادیێ دبێژه: “وه‌که کو تێ زانین، شۆره‌شگه‌ر، ده‌مۆکرات و بنده‌ستێن گه‌لێن ترکییێ ب ناڤێ تفاقا که‌د و ده‌مۆکراسیێ دا ل هه‌ڤ کۆم بوونه. مه بریار دان کو د هلبژارتنێن سه‌رۆککۆماریێ دا نامزه‌ت نیشان نه‌دن و د هلبژارتنێن پەرلەمه‌نتۆیێ دا ژی د بن سیوانا تفاقێ دا ته‌ڤلی ببن. د ڤێ پێڤاژۆیا دیارکه‌ر ئا سیاسه‌تا ترکیه‌یێ دا هه‌م ژ بۆ بجهانینا وه‌زیفه‌یا خوه یا دیرۆکی، هه‌م ژی ژ بۆ پاشه‌رۆژا نفشێن نوو، مه بریار دان کو به‌رپرسیاریا خوه ب جهبینن. د ڤێ چارچۆڤه‌یێ دا د هلبژارتنێن سه‌رۆککۆماریێ یێن ۱٤ێ گولانا ۲۰۲۳ئان دا مه بریار دان کو پشتگریێ بدن که‌مال کلچدارۆگلو و ئه‌م ڤێ بریارا خوه ب رایا گشتی را پارڤه دکن”.
تفاقا کو ژ هەدەپێ و گروبێن چه‌پێن ترکان پێکهاتی دبێژه: “ئه‌م بانگ دکن کو د هلبژارتنێن پەرلەمه‌نته‌ریێ دا ده‌نگێ خوه بدن تفاقا که‌د و ئازادیێ، د هلبژارتنێن سه‌رۆکۆماریێ دا ژی ده‌نگێ خوه بدن که‌مال کلچدارۆگلو.”
سیاسه‌تا پەکەکێ دیارە، پەکەکە ژ نهاڤه د مه‌دیایا خوه دا، ژ بۆ هلبژارتنا شه‌رێ پەەدکێ دکه. رۆژانه د مه‌دیایا خوه دا پەدەکێ ب پشتگریا “فاشیستان“ تاوانبار دکه.
د وه‌شانا فه‌رمی یا پەکەکێ مالپەرێ لێکۆلین دا رۆژانه نڤیسێن ل سه‌ر ده‌ره‌وان هاتین ئاڤاکرن دهێن نڤیساندن و پەدەکێ ب هه‌ڤالتیا ئاکەپێ تاوانبار دکن. د نڤیسه‌کێ دا کو د مالپەرێ، لێکۆلین ێ دا هاتیەە وه‌شاندن دبێژه: “چما پەدەکە د ڤان هلبژارتنان دا ژی وه‌که به‌رێ ته‌ڤدگه‌ره و هه‌لوه‌ستا خوه دده خوویاکرن؟ نڤیسکار، وێنه‌ساز، سه‌مپاتیزان و هندەک بورۆکراتێن وێ ڤێ یه‌کێ پر ڤه‌کری، بێ شه‌رم دکن. قاشۆ هه‌لوه‌سته‌که کورده‌واری دگرن و هەدەپێ وه‌ک پارتییەکا ترکیپه‌ره‌ست ب ناڤ دکن. تفاقا پەدەکە-ئاکەپ، هه‌ڤکاری، شریکاتی، تو چ ببێژی، تێ زانین. ره‌وشه‌کا نوو نینه. به‌رێ ژی پدەکێ ب گه‌له‌ک ئاوایان ب تایبه‌ت ل باکورێ کوردستانێ ده‌سته‌که‌که مه‌زن دابوو ده‌ستهلاتداریا فاشیست ئا ئاکەپێ-مەهەپێ و ژ بۆ ڤێ ژی خه‌بات دکر. تفاق و هه‌ڤکاریا پەدەکە-ئاکەپ نه ته‌نێ ل دژی گه‌ریلایێن ل باشوورێ کوردستانێ یه، ل دژی هه‌ر که‌سێ کو ل دژی ئاکەپێ به یه.“
پەکەکە ژ بۆ پاراستنا ده‌وله‌تا کوور ئا ترکا وه‌شێره دڤێ ئێریشێ پەدەکێ بکه. چو پێوه‌ندیا پەدەکێ راسته‌راست ب هلبژارتنێن ترکیه و کوردستانا باکور ڤە نینە. لێ گه‌له‌ک وه‌لات و ده‌وله‌ت ل هەمبه‌ر هلبژارتنێن ترکیێ دیتنێن خوه دبێژن. ده‌ستهلاتا باشوورێ کوردستانێ خوه‌دی دۆست و هاڤالانه، هه‌ر ده‌می ئه‌و رێبازا کورداتییێ رێڤه دبن و تشتا کو د به‌رژه‌وه‌ندیا گه‌لێن کوردستانێ دا به و هه‌روه‌ها تشتا کو ده‌ستکه‌فتیێن کوردستانی بپارێزە دکن.
پەکەکە ب هه‌موو ئاوایی وه‌ک سیخوورێ ده‌وله‌تێن داگیرکه‌ر دژمناتیا ده‌ستهلاتا باشوورێ کوردستانێ دکه و “گه‌رلایێن” خوه هه‌موو وه‌که ته‌هدیده‌کی ل دژێ ده‌ستهلاتا باشوور ته‌ڤدگه‌رینه.
لێ نها ژی هه‌ڤکاریا خوه یا دگه‌ل جەهەپێ و تفاقا مله‌ت ڤه‌دشێره و ژ بۆ ڤێ ژی هه‌ر تشته‌کی دکه. به‌ربژێرن جەهەپێ ڤه‌کری دبێژن، دێ پەکەکە ده‌ست ژ چه‌کان به‌رده، ئه‌م دێ ده‌مۆکراسیه‌ک نوو ئاڤابکن و به‌حسا “ئاشتیێ“ دکن.
پەکەکە به‌ر ب تێکچوونه‌کێ ڤه دچه، هێدی نه کلچدارۆگلو و نه ژی ئی پارتی نکارن پەکەکێ ژ تێکچوونێ خلاس بکه. پەکەکێ ڤه‌کری دگەل ماسه‌یا ٦ قۆلی دا وه‌ک ئالیێ هه‌فتان جهگرتیه. لێ ژ بۆ سیاسه‌تا بێ شه‌خسیه‌ت نکارن ڤێ یه‌کێ ئاشکه‌ره بکن. ژ بۆ پسیتیا خوه ڤه‌شێرن ئێریشێ پەدەکێ دکن.
