لهەڤهاتنا جەهەپێ و قەندیل
ل ترکیێ و باکورێ کوردستانێ د پێڤاژۆیا پرۆپاگانده‌یا هلبژارتنان دا گه‌له‌ک تشت تێنه گۆتن. هنده‌ک تفاق پێکهاتنه و هه‌موویان ژی ناڤه‌رۆکا تفاقێن خوه ئاشکه‌ره کرنه. لێ ب ته‌نێ ناڤەرۆکا هه‌ڤهاتنا ناڤبه‌را هەدەپێ و جەهەپێ دا نه‌هاتیه ئاشکه‌ره کرن. ئه‌ڤ یه‌ک گه‌له‌ک جاران د ناڤا ده‌نگده‌رێن هەدەپێ و هنده‌ک به‌رپرسیارێن هەدەپێ دا ژی تێ گۆتوبێژ کرن کا چما هەدەپە و جەهەپە ناڤەرۆکا رێکەفتنا خوە ئاشکەرا ناکن؟.
ڤێ داویێ رەجەب تەیب ئه‌ردۆگان ژی د ئاخاڤتنه‌کا خوه دا به‌حسا لهه‌ڤهاتنا ناڤبه‌را جەهەپێ و هەەدپێ دا کر و گۆت: “که‌مال کلچدارۆگلو سۆزێن مه‌ترسیدارد دانه باسکێ سیاسی یێ پەکەکێ. کلچدارۆگلو چما ئاشکه‌ره ناکه کا ب هەدەپێ را ل سه‌ر چ رێکه‌فتیه”.
کلچدارۆگلو و جەهەپە دبێژن کو، چو هه‌ڤهاتنێن نهێنی د ناڤبه‌را وان و هەدەپێ دا نەچێبوونه. لێ هه‌ڤسه‌رۆکا هەدەپێ بولدان به‌رسڤا ئه‌ردۆگان دا و گۆت: “دبێژن د ناڤبه‌را هەدەپێ و هه‌ڤپه‌یمنایا مله‌ت دا، ل پشت ده‌ریان بازاره‌ک کرێت هاتیه کرن. هەدەپێ چو جارا و ل چو جهان و ل پشت ده‌ریان بازارێن کرێت نه‌کریه و ناکه. مه چو کربه ب زه‌لالی کریه. ده‌ما دیتن ل سه‌ر ده‌سهلاتێ نامینن، جاره‌که دن ده‌ست ب پوخاتانێن ل دژی هەدەپێ دکن. داخوازا ده‌نگان ژ وه‌لاتیان دکن. لێ ئه‌م ژی دبێژن دڤێ دەستهەلاتا ئاک پارتیێ بداوی وه‌ره و ئه‌ردۆگان ژێ بچه”.
د راستیا خوه دا ژی چو رێکەفتن و هەڤپەیمانی د ناڤبه‌را جەهەپێ و هەدەپێ دا، نه ئاشکه‌را و نه ژی نهێنی، نەچێهبوویه. لێ په‌یمانه‌ک نهێنی د ناڤبه‌را قه‌ندیل و جەهەپێ دا چێبوویه. رێکەفتنا د ناڤبەرا قەندیل و جەهەپێ دا نهێنیه و هه‌ر دو ئالی ژی نکارن ڤێ یه‌کێ به‌ری هلبژارتنان ئاشکه‌ره بکن. لێ ئه‌گه‌ر کلچدارۆگلو سه‌ربکه‌ڤه دێ به‌رهه‌مێن ڤێ په‌یمانا ڤه‌شارتی ده‌رکه‌ڤه هۆلێ.
