من گەلەک وانە و پەند چ ئەرێنی و چ نەرێنی بن ژ شۆرەشێ وەرگرتن
مالپەرا مە، سبەهی، ب هەلکەفتا شۆرەشا گولانێ دۆسیەیەک ڤەکریە ل ژێر ناڤێ: ئەز و شۆرەشا گولانێ.
د ڤێ چارچۆڤەیێ دا چەند پێشـەرگەیێ یێن دێرین بەرسڤا پرسێن
مالپەرا مە ددن کو، یەک ژ وان ژی برێز د. حەمید باڤی یە.
سبەهی: تو وەک پێشمەرگە یێ دێرین، شۆرەشا گولانێ ژ بۆ تە چیە؟
د. حەمید باڤی: شۆرەشا گولانێ (٢٦/ ٥/ ١٩٧٦)ێ ژ بو من تمامکەرا شۆرەشا ئیلۆنێ (١١/ ٩/ ١٩٦١- ٦/ ٣/ ١٩٧٥)ێ بوو. ژ بەر کو ئەز ژ بیر و هزر و دیمەنێن شۆرەشێ نە ڤەقەتیا بووم .. د شۆرەشا ئیلۆنێ دا ئەز ل قوناغا سیێ ناڤنجی بووم و ل ئامێدیێ مە تاقیکرنێن ویزاری ئەنجام ددان. مە خەبات ب رێکا ئێکەتیا قوتابیێن کوردستانێ را دکر و ئەم پشکداری شۆرەشێ بووین. پشتی راوەستانا شۆرەشا ئیلۆنێ ژی (ئادارا ١٩٧٥)ێ ب حوکمێ کو، مالا مە ل گوندی بوو (گوندێ باڤا ل سەر رووبارێ خابووری- ل ناحیا مانگێشکێ) و زوو دەستپێکرنا خەباتا کوردایەتیێ و کارێ رێکخستنا پارتییا دەمۆکراتا کوردستانێ و هاتنا مەفرەزێن پێشمەرگەیی و گەهشتنا بەلاڤوکا و ئەنجامدانا چالاکیێن پێشمەرگەیی- پشتی ئەز ژ خواندنا ئامادەییێ خلاس ژی بووم و چوویمە زانکویا بەغدا ژی- هاتن و چوونا من بو گوندی یا بەردەوام بوو، لەوما ژ نێزیک من تێکەلی د گەل کادر و بەرپرسێن پارتی و پێشمەرگه و فەرماندارێن شۆرەشێ هەبوون. پشتی ژ خواندنا ماجستەرێ ل بەغدایێ خلاس بوویم، ئەز ب ئێکجاری گەهشتمە ناڤ رێزێن شۆرەشێ. ڤێجا د ناڤ شۆرەشێ دا، ب رێکا ئێکەتیا زانایێن ئایینی/ تایێ دهوک- نەینەوا، من و هەر ٦ ماموستا و هەڤالێن خوە خودێژێرازیان: ١- ماموستا مه‌لا أحمد إسلام زينل دووتازى نێروەیی (١٩٢٢- ٢٨/ ٧/ ١٩٩٤). ٢- ماموستا مه‌لا محمود فندى عبد الله دێرشه‌وى ( ١٩٤٠- ١٨/ ١٠/ ٢٠٠٤). ٣- ماموستا مه‌لا إبراهيم علي سيف الدين چێيى (١٩٣٢- ٢/ ١٠/٢٠١٥). ٤- ماموستا مەلا طاهر فەق عمر مەلا طاهر رەشاڤەیی (١٩٣١-(٢٨/ ٧ /٢٠٢٢) و بەرێزان: ٥- ماموستا مەلا عبد الوحید یاسین سعید رەشاڤەیی (١٩٥٦) ٦- ماموستا مەلا عصمت إسلام محمد گوهەرزی (١٩٥٣) مە خزمەتا ئایینی و جڤاکی و خەباتا کوردایەتیێ و پشتەڤانیا شۆرەشێ دکر ب روحیەتا پێشمەرگەهێ قارەمان ودلسوز وخەمخور … لەوما شۆرەشا گولانێ ژ بو مە دەرفەتەکا زێرین بوو کو، ئەم تێدا خزمەتا جڤاکێ خوە بکەین و پشتەڤانا مافێن ملەتێ کوردستانێ یێن رەوا و خودایی و ئایینی و یاسایی بکەین ب رێکا پەیاما قورئانا پیروز و مزگەفتێ و رێکخستنێن ئێکەتیا زانایێن ئایینی کو، مە ددیت باشترین رێک بوو خەباتا کوردایەتیێ ئەم مافێن نەتەوێ خوە و ملەتینیێ گرێبدەین دگەل پەیاما ئایینی یا پیروز و بنەمایێن مروڤایەتیێ.. دا ملەت ئازاد و سەربەست و ئولدار و بەختەوەر بژیت د کوردستانەکا رزگارکری دا.
٢- تو چ ژ وێ شۆرەشێ فێر بووی؟
د. حەمید باڤی: ئەز گەلەک تشتان ژ شورەشێ فێربوومە، ژ وانا: ١- جڤاکێ کوردستانێ ل دەڤەرێن رزگارکری بارێ هەرە مەزن ل سەر ملێن وان بوو هەکە ئەو نەبانە شورەش ب وی رەنگێ سەرکەفتی نە دهاتەکرن! دڤیا خەبات و دلسۆزی و پشتەڤانیا وان بۆ پێشمەرگەیی و شۆرەشێ چو جاران نە هاتبانە ژبیرکرن. ٢- دڤیا رێبەر و سەرکردایەتیا هەر شۆرەشەکێ هەردەم د ناڤ جەرگێ شۆرەشێ بخوە دا بن و ژێ دوور نەکەڤن دا ژ نێزیک ڤە سەرۆکاتیێ بکەن و پرسگرێک و ئارێشەیان چارەسەر بکەن، ئاستەنگان رابکەن و بریارێن دروست بدەن. ٣- دڤیا هەر شۆرەشەکێ هەوالگێریەکا بهێز هەبیت و چاڤدێریا کاودانێن دەڤەرێ و مەترسیا بکەت دا پێشمەرگه و شۆرەشگێر راستی چو قرکرن، ژناڤبرن، جینوساید و ئەنفالان نەبن.
٣- تە چ دا شۆرەشێ و شۆرەشێ چ دا تە؟
د. حەمید باڤی: ئەز وەک شۆرەشگێرەک من پشکداری د شۆرەشێ دا کر لێ من چو تشتێن وەسا مەزن و عنتیکە نە دایە شۆرەشێ هەتا ب ناڤی من بهێنە تومار کرن… بەلێ شۆرەشێ گەلەک هێز دا من، من گەلەک وانە و پەند، چ یێن ئەرێنی بن و چو ژی یێن نەرینی بن، ژ شۆرەشێ وەرگرتن … ب تایبەتی پشتی جینوسایدا ئەنفالێن رەش ب سەر مەدا هاتی ل ٢٥ی تەباخا سالا ١٩٨٨ێ، کە یێن خوە ل خەلکێ تەنگاڤ و پەریشان بکەنە خودان دکێم بوون. پشتی سەرهلدانا ئادارا ١٩٩١ێ ژی ئەنفالچی و ئەنفالکەر تێکهەل بوون و جودایی د ناڤبەرا خەباتێ و خیانەتێ دا کەفتە د رەوشەکا ئالوز و شەپرزە دا.
هیڤیە ئەم هەمی د ڤێ قۆناغا نوکە دا خەباتا کوردایەتیێ بکەین دا ئەو دەستکەفتێن ب خوینا پیرۆزا شەهید و ئەنفالکریان ب دەستڤە هاتین ژناڤنەچن و بهێنە پاراستن و مافێن ملەتی یێن راست و رەوا بهێنە دابینکرن دا ملەتێ مە ب سەرفەرازی و ب خوەشی بژیت، دا سەروەریا وەلاتی یا پاراستی بیت…
هزار هزار سلاڤ بۆ پێشمەرگە یێن قارەمان و بۆ روحا پیروزا شەهیدێن پاراستنا ئاخا وەلاتی و ب دەستڤەئینانا مافێن ملەتی … دگەل سلاڤێن من و رێزگرتنێ.
د. حەمید باڤی – ئێک ژ پشکدارێن شورەشا گولانێ و ئێک ژ دەستەسەرکریێن کەمپا مێردینێ ١٩٨٨-١٩٩٢ێ
