دەمیرتاش لێبۆرین خواست و دەست ژ سیاسەتێ بەردا
ئه‌ڤ ده‌مه‌کێ درێژه کو د ناڤبه‌را سه‌لاحەدین ده‌میرتاش و رێڤه‌برێن هەدەپێ دا پرسگرێک و ناکۆکی هه‌نه. وه‌کی تێ زانین، د ناڤا هەدەپێ دا گه‌له‌ک باسک و گرووپ هه‌نه: گرووپا ئیمرالییێ، گرووپا قاندیلێ، گرووپا چه‌پێن ترک و که‌مالیست یێن ده‌وله‌تێ و گرووپا کورد کو ژ سیاسه‌تا هەدەپێ و هه‌ڤکارییا ب چه‌پێن ترک را عاجزن. پشتی کو هەدەپێ د ڤێ هلبژارتنێ دا تفاق ب چه‌پێن کەمالیست یێن ترک را چێکر و ده‌نگێن خوه کێم کرن، د ناڤ هەدەپێ دا گه‌نگه‌شە و نه‌رازیبوون زێده‌تر بوویه و ب تایبه‌تی کوردێن وه‌لاتپارێز یێن د ناڤ هەدەپێ دا داخواز دکن کو رێڤەبەریا هەدەپێ داخوازا لێبۆرینی و ئیستیقالە بکن.
سه‌لاحەدین ده‌میرتاش د ناڤ جەماوەرێ هەدەپێ دا خوه‌دییێ گۆتن و حه‌زکرنه‌کا زێده یه. هه‌تا کورد یێن وەلاتپارێز یێن د ناڤا هەدەپێ ژی دا گوهێ خوە ددن ده‌میرتاش، گوهێ خوە نادن ئۆجالان و قه‌ندیلێ. ئه‌ڤ یه‌ک ژی هه‌م د ناڤا ده‌وله‌تێ دا و هه‌م ژی د ناڤا پەکەکێ و هەدەپێ دا نه‌رازیبوونه‌ک مه‌زن چێدکە. ده‌میرتاش گه‌له‌ک جاران نامه ژ رێڤه‌برییا هەدەپێ را شاندن، رێ و سیاسه‌تا وان ره‌خنه کر و پێشنیازێن خوه ئاراسته‌یی وان کرن. لێ رێڤه‌برییا هەدەپێ گوهێ خوە نه‌دا پێشنیازێن ده‌میرتاش و دخوه‌ستن باندۆرا ده‌میرتاش یا ل سه‌ر کوردان بشکینه و وی د چاڤێن وان دا پچووک بکه.
ده‌میرتاش، هه‌ر چقاس د رابردوویا خوه دا ب پشتگرییا شەرێ خه‌نده‌کان و دژبەریا ئه‌ردۆگان زیان دابه کوردان ژی، لێ د ناڤ هەدەپێ دا یه‌ک ژ که‌سێن کو خوه‌دییێ هه‌ست و هه‌لوه‌سته‌ک کوردی بوو. چاوا کو گرووپێن ناڤا هەدەپێ ب دلخوازییا ده‌وله‌تێ، ئیمرالی و قه‌ندیلێ کوردێن وه‌ک له‌یلا زانا، ئۆسمان بایده‌میر و کوردێن کو د دۆزا کورد دا پیچەکێ حه‌ساس و خوه‌دی هه‌ست و هه‌لوه‌ست بوون ژ هەدەپێ دوور خستن، دخوه‌ستن ژ ده‌میرتاش و باندۆرا وی ژی خلاس ببن و پەرێن وی بقوسینن. هه‌لوه‌ست و سیاسه‌تا ڤان گرووپێن کو ل دژی هه‌ست و هه‌لوه‌ستێن کوردی نه بوو سه‌ده‌مه‌ک کو ده‌میرتاش ده‌ڤ ژ سیاسه‌تا چالاک به‌رده و خوه دووری سیاسه‌تا هەدەپێ بکه.
هه‌ڤسه‌رۆکێ به‌رێ یێ هەدەپێ، سه‌لاحەدین ده‌میرتاش، پشتی کو هەدەپە د هلبژارتنێن بۆری دا هێز و خوین وندا کر، داخویانییه‌ک دا و ره‌خنه ل خوه و پارتییا خوه کر. ده‌میرتاش لێبۆرینا خوه ژ کوردان خوه‌ست، ل سه‌ر مه‌دیایا جڤاکی ئاشکرا کر کو وی دەست ژ سیاسه‌تا ئەکتیف به‌ردایه و گۆت:
“ئه‌ز ل سه‌ر ناڤێ خوه ژ دل لێبۆرینێ دخوازم کو مه نه‌کاری سیاسه‌ته‌ک لایقی گه‌لێ خوه بدن مه‌شاندن. ئه‌ز سۆز ددم کو ب خه‌باتێن خوه یێن پراکتیکی ڤان کێماسییان به‌رته‌ره‌ف بکم. هه‌روەسا سپاسییا ره‌خنه‌یێن چێکه‌ر یێن کو ل من هاتن کرن دکم. ئه‌ز دێ هه‌ول بدم سوودێ ژێ وه‌ربگرم. ئه‌زێ ژی وه‌ک هه‌موو هه‌ڤالێن خوه یێن ل گرتیگه‌هێ دێ تێکۆشینا خوه ب به‌رخوه‌دانێ بمه‌شینم، ئه‌ز د ڤێ قۆناخێ دا دەست ژ سیاسه‌تا چالاک به‌رددم. ب هێڤییا رۆژێن ئازاد”.
داخویانییا ده‌مرتاش وه‌ک بۆمبه‌یه‌کێ که‌ت د رۆژه‌ڤا سیاسی یا کورد، ترکیێ و جیهانێ دا. تێ گۆتن کو گه‌له‌ک ژ رێڤه‌برێن ناڤا هەدەپێ گرینگی نه‌دانه داخویانییا ده‌میرتاش و دبێژن: “ده‌ستژێبه‌ردانا سیاسه‌تا ئەکتیف یا ده‌میرتاش مژاره‌کە کو دڤێ نه‌یێ مه‌زنکرن. سیاسه‌تمه‌دارێن دن یێن د گرتیگه‌هێ دا ب توویتەر و داخویانییان سیاسه‌تێ ناکن. ره‌وش ب ته‌ڤاهی نۆرماله و د ناڤا پارتییێ دا ئه‌رکێن ده‌میرتاش نینن“.
د ڤێ ده‌ربارێ ده که‌سێن نێزیکی ده‌میرتاش دبێژن: “رێڤەبەریا هەدەپێ دخوازە ده‌میرتاش بێده‌نگ بکن. پێشنیازێن وی نایێن گوهداریکرن. ب سه‌ر دا ژی ده‌ما کو ئه‌نجامێن هلبژارتنێ ب ڤی ره‌نگی هاتن، هه‌ول دان کو ده‌میرتاش به‌رپرسیار ببینن. د ناڤا هەدەپێ دا که‌سێن کو دخوازن ده‌میرتاش ژ گرتیگه‌هێ ده‌رنه‌که‌ڤه ژی هه‌نه”
