مژارێن جڤینا نێچیرڤان بارزانی و هاكان فیدان
نێچیرڤان بارزانی سه‌رۆکێ هه‌رێما کوردستانێ، رۆژ پێنچشه‌مێ ٢٠٢٣/٨/٢٤ێ ل باژارێ هەولێرێ، دگەل هاکان فیدان وه‌زیرێ ده‌رڤه یێ ترکیێ جڤیا.
د جڤینێ دا په‌یوه‌ندیێن ترکیێ دگه‌ل هه‌رێما کوردستانێ و وارێن ئالیکاریێن هه‌ڤبه‌ش یێن د ناڤبه‌را وان دا، تێكەلی و پرسگێرێكێن ناڤبەرا هه‌ولێر و بەغدایێ و دانوستاندنێن ژ بۆ چاره‌سه‌رکرنا وان، ره‌وشا ئیراق و هه‌رێما کوردستانێ ب گشتی گوفتووگۆ کرن.
سه‌رۆک نێچیرڤان بارزانی كێفخوشیا خوە ب سه‌ردانا وەزیرێ دەرڤە یێ تركیێ بۆ هەولێرێ نیشان دا و تەئكید کر کو هه‌رێما کوردستانێ ب گرینگیێ ڤه ل په‌یوه‌ندیێن خوه یێن دگه‌ل ترکیێ دنێره کو به‌رژه‌وه‌ندیێن هه‌ڤبه‌ش یێن ئابۆری، بازرگانی و ئه‌منی وان ب پێکڤه گرێددە و ئاماده‌یه د هه‌موو واران دا په‌یوه‌ندیێن هه‌ولێر – ئه‌نقه‌ره پێش بخه. هه‌روەسا، سەرۆك نێچیرڤان بارزانی، ژ بۆ وێ پشتگیریا د هه‌موو واران دا و ب تایبه‌تی د ده‌مێن دژوار دا ل هه‌رێما کوردستانێ كری، سپاسیا ترکیێ كر و بالکشاند ل سه‌ر وێ یه‌کێ کو هه‌رێما کوردستانێ چ ده‌مه‌کێ پشتگیری و هه‌ڤکاریێن ترکیێ ژ بیر ناکه.
وه‌زیرێ ده‌رڤه یێ ترکیێ ته‌که‌ز ل وێ یه‌کێ کر کو ترکیه گرینگیه‌کا تایبه‌ت ب په‌یوه‌ندیێن خوه یێن دگه‌ل هه‌رێما کوردستانێ دده و به‌غدا و هه‌ولێرێ گرینگیه‌کا تایبه‌تی ژ بۆ ترکیێ هه‌یه. وی په‌سنێ ئارامیا هه‌ولێر و هه‌رێما کوردستانێ کر و ئاماده‌هیا وه‌لاتێ خوه ژ بۆ به‌رفره‌هکرنا په‌یوه‌ندیان و ئالیکاریێن هه‌ڤبه‌ش د ناڤبه‌را هه‌ر دو ئالیان، د هه‌موو واران دا، ده‌ربری. هه‌روەسا سپاسیا رۆلا سه‌رۆک نێچیرڤان بارزانی یا د پێشخستنا په‌یوه‌ندیێن ئیراق و هه‌رێما کوردستانێ دگه‌ل ترکیێ کر.
مژاره‌کا دن یا جڤینێ ب گرینگی ڤه به‌حسا پرسا هه‌نارده‌کرنا نه‌فتا هه‌رێما کوردستانێ ب رێیا به‌نده‌را جه‌یهانا ترکیێ ڤه کرن و د ڤی واری دا بیر و رامانان ل هەڤ گوهەرتن.
