گۆتارا نێچیرڤان بارزانی د ڤەکرنا کۆنگرەیێ یەنەکێ دا
گۆتارا نێچیرڤان بارزانی د ڤەکرنا کۆنگرەیێ پێنجەمین یێ یەکێتییا نشتمانییا کوردستانێ دا:
برێز بافل جه‌لال تاله‌بانی
سه‌رۆکێ یه‌کیتییا نشتمانییا کوردستانێ
برێزان مێڤان، به‌شدار و ئه‌ندامێن کۆنگره‌یێ پێنجه‌مین یا یه‌نه‌کێ
رۆژ باش.
ئه‌ز کێفخوه‌شم کو، ئیرۆ ب وه یێن برێز را به‌شداریێ د مه‌راسما ڤه‌کرنا کۆنگره‌یێ پێنجه‌مین یا یه‌کیتییا نشتمانییا کوردستانێ دا دکم. ئه‌ز ڤێ کۆنگره‌یێ ل هه‌موو ئه‌ندام و جه‌ماوه‌رێ یه‌نه‌کێ پیرۆز دکم و هێڤیا سه‌رکه‌فتنێ ژ وه را و ژ کۆنگره‌یێ وە را دخوازم. هێڤیدارم کۆنگره ژ بۆ ڕه‌وشا سیاسی یا هه‌رێما کوردستانێ و یا ئیراقێ ئه‌نجامێن باش ب خوه را بینه.
ل ڤێرە، ئه‌م سه‌رۆکێ خوه‌دێژێرازی، مام جه‌لال، ب رێز و حورمه‌ته‌ک مه‌زن ڤە ب بیر تینن. بلا روحێ وی شاد به و بیرانینا وی هه‌رتم ب خێر به. یه‌نه‌که یادگارا مام جه‌لاله و دڤێ ب هه‌مان رحێ و ئاراسته و فکرا وی ژ بۆ لهه‌ڤتێگهشتن، هه‌ڤگرتن و چاره‌سه‌رکرنا پرسگرێکان، ژ بۆ پاراستنا به‌رژه‌وه‌ندیێن گشتی، ل سەر رێیا مام جەلال به‌رده‌وام به.
یه‌نه‌که د ناڤ ته‌ڤگه‌را رزگاریخوازا کوردستانێ دا خوه‌دی جی و رۆله‌کێ گرنگه. د سه‌رده‌ما ئازادیێ دا، دگه‌ل پارتییا ده‌مۆکراتا کوردستانێ (په‌ده‌که) دو هێزێن سه‌ره‌کی یێن بنیاتدانه‌ر و ئاڤاکه‌رێن ئەزمونا هه‌رێما کوردستانێ و ده‌ستکه‌فتێن وێ نه، و ب به‌شداربوون و هه‌ڤکاریا به‌ره‌یێ کوردستانی و هێز و ئالیێن دن ئێن سیاسی دیرۆکه‌ک نوو ژ بۆ گه‌لێ کوردستانێ نڤیساندن.
یه‌نه‌که هه‌تا نها ژی د پرۆسه‌یا سیاسی یا هه‌رێما کوردستانێ، و ئیراقێ دا ژی، یه‌ک ژ هێزێن سه‌ره‌کی یه کو، ڤێ یه‌کێ ژی به‌رپرسیاریه‌کا مه‌زن یا نشتمانی خستیه سه‌ر ملێ وێ. دگه‌ل هێز و ئالیێن سیاسی و پێکهاته‌یێن کوردستانێ و هه‌موو ب هه‌ڤ را ئه‌رکێ پاراستنا یه‌کرێزی و یه‌کده‌نگی و کارێ هه‌ڤبه‌ش ل سه‌ر ملێ وانه داکو ماف و ده‌ستکه‌فتیێن ده‌ستووری یێن هه‌رێما کوردستانێ بپارێزن.
برێزان
ئه‌زموونا ب هه‌ڤراکارکرنا یه‌نه‌کێ و په‌ده‌کێ و هه‌ڤکاری و براتییا جه‌نابێ سه‌رۆک مه‌سعود بارزانی و خوه‌دێژێرازی جه‌نابێ مام جه‌لال ئیسبات کریه کو سه‌رکه‌فتن د یه‌کرێزی، هه‌ڤگرتن و خه‌باتا هه‌ڤبه‌ش دا یه. سه‌رکه‌فتنا سه‌رهلدانا کوردستانێ، بجهکرنا فه‌ده‌رالیزمێ و گه‌له‌ک مافێن دن یێن گه‌لێ کوردستانێ د ده‌ستوورا ئیراقێ دا، ئاڤادانی و پێشکه‌فتنا هه‌رێما کوردستانێ، به‌رهه‌مێ راسته‌راست یا وێ هه‌ڤکاری و هه‌ڤگرتن و براتیێ بوویه.
نها ژی، ژ بۆ ده‌رباسکرنا هه‌موو دژواریان، ژ بۆ چاره‌سه‌رکرنا پرسگرێکان، ژ بۆ پاراستنا ده‌ستکه‌فت و مافێن ده‌ستووری یێن هه‌رێما کوردستانێ، ته‌نێ رێیه‌ک ل پێشیا مه‌یه کو، ئه‌و ژی به‌رده‌وامی و درێژه‌پێدان ب هه‌ڤکاری و هه‌ڤپه‌ژراندن و کارێ هه‌ڤبه‌ش یێ ئالیێن سیاسی و پێکهاته‌یێن هه‌رێما کوردستانێ ل ڤێره و ل به‌غدایێ یه. هێز و مانا مه هه‌موویان د یه‌کرێزی و پێکڤه‌ژیانێ دا یه و به‌رۆڤاژیێ وێ ژی زیان و لاوازیا هه‌رێما کوردستانێ یه.
پێویستیا ڤێ قۆناخێ و ئاسته‌نگی و مه‌ترسیێن ل پێشیا هه‌رێما کوردستانێ، وێ یه‌کێ ژ مه دخوازه کو پێویسته هه‌موو هێز و ئالیێن سیاسی هه‌موو ناکۆکیێن خوه بدن ئالیه‌کی. هه‌رێما کوردستانێ بهێز بکن و ئه‌م هه‌موو ب هه‌ڤ را ل به‌غدایێ یه‌کده‌نگ، یه‌کگرتی و بهێز بن. دڤێ ئه‌ڤ ئارمانجا هه‌ڤپار یا مه هه‌موویان به.
تشته‌کی نۆرماله کو، هه‌ڤرکیێن سیاسی و جوداهی د نێرینێن ئالیێن سیاسی دا هه‌بن، لێ به‌لێ دڤێ به‌رژه‌وه‌ندیه‌کا هه‌ڤبه‌ش هه‌موویان ژ بۆ ئارمانجه‌کا هه‌ڤبه‌ش بینه جه‌م هه‌ڤ، ئه‌و ژی پاراستنا ئه‌زموون، ماف و ده‌ستکه‌فتێن ده‌ستوورێ یێن هه‌رێما کوردستانێ یه.
هه‌رێما کوردستانێ هینگێ ب هێزه ده‌ما کو ئالیێن سیاسی یه‌کگرتی بن، ده‌زگه‌هێن وێ سه‌ربخوه بن و پاراستی و رێزدار بن و ده‌ستێوه‌ردانا حزبی و سیاسی د کارووبارێ سازیان، پێشمه‌رگه و هێزێن ئه‌وله‌هیێ دا نه‌به.
هه‌رێما کوردستانێ هینگێ ب هێز دبه ده‌ما کو، ئالیێن سیاسی به‌رژه‌وه‌ندیێن بلند یێن گه‌ل و وه‌لات بدن پێشیا هه‌ر به‌رژه‌وه‌ندیه‌کا دن کو، ناکۆکیا حزبی و سیاسی نه‌به مه‌ترسی و گه‌ڤ ل سه‌ر قه‌واره‌یێ سیاسی و ده‌ستووری یێ هه‌رێما کوردستانێ.
ئامادەبوویێن هێژا
ژ ده‌ستپێکا سه‌رهلدانێ ڤه هه‌تا نها، هه‌رێما کوردستانێ، ته‌ڤی هه‌موو ئه‌ڤرازی و نشیڤی و کێماسیان، ئه‌زموونه‌کا جوان ل ناڤچه‌یێ نیشان دایه کو بالا جیهانێ کشاندیه سه‌ر خوه و بوویه جهێ رێز و حورمه‌تا جیهانێ.
ده‌مۆکراسی، ئازادی، مافێن مرۆڤان، ئازادیا راده‌ربرینێ و ئازادیا چاپه‌مه‌نیێ، پێکڤه‌ژیان، هه‌ڤپه‌ژراندن، تۆله‌رانس، پره‌نگیا ئۆلی و ئه‌تنیکی ئه‌ڤ هه‌موو ئه‌و سیما، پره‌نسیب و نرخێن هه‌ڤپارن کو هه‌رێما کوردستانێ ب جیهانا پێشکه‌تی و مرۆڤاتیێ ڤه گرێ ددن و بوونه جهێ رێز و شانازییا گه‌لێ کوردستانێ. دڤێ ئه‌م ل هه‌رێما کوردستانێ هه‌تا هه‌تایێ خوه‌دی ل ڤان نرخێن مرۆڤی یێن بلند ده‌رکه‌ڤن و وان بپارێزن. دڤێ هێز و ئالیێن سیاسی، ده‌ستهلاتدار و سازیێن هه‌رێما کوردستانێ ژ بۆ بهێزکرنا وان نرخان کار بکن و بکن بنگه‌ها سه‌ره‌که یا هزر، کردار، کار و ژیانا سیاسی و په‌روه‌رده‌یی یا جڤاکا مه.
هلبژارتن وه‌که بنگه‌ها سه‌ره‌که یا ره‌وابوونا ده‌ستهلات و حوکمداریێ ل هه‌رێما کوردستانێ پێویستیا یه‌که‌م و هه‌ری ل پێشه. دڤێ هه‌موو ئالیێن سیاسی کار بکن دا کو د مەها سباتا بێ دا ده‌نگدانه‌کا سه‌رکه‌فتی ژ بۆ هلبژارتنێن په‌رله‌مه‌نتۆیا کوردستانێ ب برێڤه بچه.
هه‌رێما کوردستانێ یا بهێز دکاره ل به‌غدایێ و ل سه‌رانسه‌رێ ئیراقێ خوه‌دی رۆل، هه‌بوون و باندۆره‌کا باشتر به. دکاره ده‌ستکه‌فت و مافێن خوه یێن ده‌ستووری باشتر بپارێزه. دکاره ل هه‌رێمێ و جیهانێ جهه‌کی باشتر و بهێزتر بگره. ژ به‌ر ڤێ یه‌کێ، د ده‌ره‌جه‌یا یه‌که‌م دا، ئه‌رکا په‌ده‌کێ و یه‌نه‌کێ یه دگه‌ل هه‌موو هێز و ئالیێن سیاسی یێن دن یێن هه‌رێما کوردستانێ ژ بۆ سه‌رخستنا هلبژارتنان کار بکن و پاشڤه‌نه‌خن
برێزان
پر باش و پێویسته کو حکومه‌تا هه‌رێما کوردستانێ ژ بۆ چاره‌سه‌رکرنا پرسگرێکان دگه‌ل حکومه‌تا فه‌ده‌رال یا ئیراقێ د دیالۆگێ دا به‌رده‌وام به. هه‌ر چه‌ند د دانووستاندنان دا هنده‌ک پێشکه‌تن هه‌نه، لێ دیسا ژی ژ به‌ر پرسگرێکێن جیبجیکرنا یاسایا بوودجه‌یێ و شاندنا مافێن دارایی یێن هه‌رێما کوردستانێ و هه‌روه‌ها ژ به‌ر نه‌هنارتنا نه‌فتێ، هه‌رێما کوردستانێ نها د ناڤا ره‌وشه‌کا ئابۆری یا دژوار دا یه. ڤێ ره‌وشێ باندۆره‌کا دژوار ل سه‌ر ژیانا وه‌لاتیان کریه.
ل ڤێره، ئه‌م ته‌که‌زیێ ل سه‌ر وێ یه‌کێ دکن کو هه‌رێما کوردستانێ دخوازه هه‌موو پرسگرێک و ناکۆکیێن خوه یێن دگه‌ل به‌غدایێ ب رێیا دیالۆگ و لهه‌ڤتێگه‌هشتن و ل سه‌ر بنگه‌ها ده‌ستوورێ چاره‌سه‌ر بکه. ئه‌م ژ حکومه‌تا فه‌ده‌رال ییا ئیراقێ هێڤی دکن کو ل گۆر رێکه‌فتنێن سیاسی، یاسا، ده‌ستوور و سیسته‌ما فه‌ده‌رالی دگه‌ل هه‌رێما کوردستانێ ته‌ڤبگه‌ره. چێنابه بوودجه و مووچه‌یێن هه‌رێما کوردستانێ ببن ره‌هینەیێن ناکۆکیێن سیاسی.
پارتیێن سیاسی یێن کو حکومه‌تا فه‌ده‌رال پێک تینن دڤێ ژ بۆ جیبجیکرنا رێکه‌فتنێن سیاسی و یاسایا بوودجه‌یێ ئالیکاریا سه‌رۆکوه‌زیر محه‌مه‌د شییاع سودانی بکن. دڤێ هه‌موو که‌س، ئالی و هێزێن ئیراقێ بزانبن کو چێکرنا پرسگرێکێن دارایی ژ بۆ هه‌رێما کوردستانێ خزمه‌تا ئیراقێ ناکه.
ئاشتی، ئارامی و پێشکه‌تنا هه‌رێما کوردستانێ و هه‌ر هه‌رێمه‌کا دن یا ئیراقێ، ئاشتی و ئارامی و پێشکه‌تنا ته‌ڤاهیا ئیراقێ یه. ئه‌م ل هه‌رێما کوردستانێ ب ڤێ تێگهشتنێ ل هه‌موو ئیراقێ دنێرن کو، هه‌ر ئه‌ڤ یه‌ک ژی دێ خزمه‌تا گه‌لێن ئیراقێ و هه‌موو پێکهاته‌یێن وێ بکه. ئیراقه‌ک کو بێ جوداهی مه هه‌موویان بگه‌هینه هه‌ڤ و ب هه‌موو پێکهاته‌یێن خوه ڤه وه‌لاتێ مه هه‌موویان به. پشتگۆهخستنا هه‌ر پێکهاته‌یک ئیراقی پابه‌ندبوونا وێ ب وه‌لات را لاواز دکه.
دڤێ ئه‌م هه‌موو ل ئیراقێ رابردوو بکن ده‌رس و په‌ند و سوودێ ژێ وه‌ربگرن. شکه‌ستنا هه‌رێما کوردستانێ و هه‌ر ناڤچه و پێکهاته‌یه‌ک دن یا ئیراقێ، چو جاری سه‌رکه‌فتنا چو به‌شه‌ک دن یێ ئیراقێ نه‌بوویه و نابه ژی. پێکهاته، سه‌رمایه‌یا مرۆڤی و خوه‌زایا ئیراقێ ژ بۆ ئیراقێ هێزه‌کا مه‌زنه. ئه‌م ب هه‌ڤ را دکارن ئیراقێ بکن وه‌لاته‌کی بهێز ل ناڤچه و جیهانێ. ئه‌گه‌ر تێگه‌هشتنه‌کا راسته‌قینه و ئیراده‌یا سیاسی ژ بۆ ڤێ یه‌کێ هه‌به، بێگومان ئیراق دێ ببه ئه‌و ئیراق.
چاوا کو یه‌کرێزی و یه‌کگرتن ل هه‌رێما کوردستانێ بنگه‌ها سه‌رکه‌فتنا مه یه، ب هه‌مان ئاوایی هه‌ڤبه‌شیا پێکهاته‌یێن جودا یێن ئیراقێ، بێی جوداهیا ئه‌تنیکی و ئۆلی، د ده‌ستهلاتا سیاسی و ئیداری یا وه‌لات دا، دێ ئیراقێ بخه سه‌ر جه و پێگه‌هێ وێ یێ راسته‌قینه. دێ ژ بۆ خوه و هه‌رێمێ ژی ببه فاکتۆرا ئاشتی، ئارامی و پێشکه‌تنێ.
د داویێ دا، جاره‌کا دن پیرۆزباهیێ ل کۆنگره‌یێ یه‌نه‌کێ یا پێنجه‌مین دکم و هێڤیا سه‌رکه‌فتنێ ژ بۆ کۆنگره‌یێ وه دخوازم. هێڤیدارم ئه‌نجام و بریارێن کۆنگره‌یێ وه ببن هۆکارێ خورتکرنا یه‌کرێزی، براتی و کارێ هه‌ڤبه‌ش د ناڤبه‌را ئالیێن سیاسی یێن هه‌رێما کوردستانێ و ئیراقێ دا بهێزتر بکه.
گه‌له‌ک سپاسییا وه دکم
ژ وه را ده‌مه‌ک خوه‌ش دخوازم.
نێچیرڤان یارزانی
سه‌رۆکێ هه‌رێما کوردستانێ
٢٠٢٣.٩.٢٧
