۱٦ێ تەباخێ، ۷۸ سالیا سه‌رۆک بارزانی و پارتییا ده‌مۆکرات یا کوردستانێ پیرۆز به! هه‌م ژ بۆ که‌سایه‌تیا سه‌رۆک بارزانی و هه‌م ژی ژ بۆ پارتیا ده‌مۆکرات یا کوردستانێ دیرۆکه‌ک ب شان و ب شه‌ره‌فه. بێگومان پارتیا ده‌مۆکرات یا کوردستانێ خوه‌دانێ ڕێ و ڕێچا کوردایه‌تیێ و پێشه‌نگا شه‌رێ ڕزگاریا نه‌ته‌وه‌یی یا کوردستانێ یه. هه‌ر گاڤه‌ک یا د ڤان ۷۸ سالان دا ئاڤێتی ده‌لیل و شاهده‌ک یا ڤێ ڕاستیێ یه.
ده‌ما ژ به‌ریا ۷۸ سالان د ۱٦ێ ته‌باخێ دا سه‌رۆک بارزانی د بن سیها ئالایا کوردستانێ دا هاتی دنێ، د هه‌مان ڕۆژێ ده (۱٦ێ ته‌باخێ ۱۹٤٦) پارتییا ده‌مۆکرات یا کوردستانێ ل به‌غدایێ ب کۆنگره‌یا خوه یا ئاڤاکرنێ هات دامه‌زراندن، د کۆنگره‌یێ دا مه‌لا مستافا بارزانی وه‌کی سه‌رۆکێ پارتییێ هات دیار کرن. ژ ئالیێ سیاسی و دیپلۆماسیێ ڤه ژی ئاڤاکه‌رێن پارتییێ گرنگیه‌کا گه‌له‌ک مه‌زن ب وێ یه‌کێ دان کۆ هیچ زیانا وان نه‌گەهە کۆمارا کوردستانێ، ژ به‌ر کۆ مه‌لا مستافا هه‌م سه‌رۆکئه‌رکانێ ئارتێشا کوردستانێ بوو هه‌م ژی سه‌رۆکێ پارتییا هێژ نوو هاتی ئاڤا کرن بوو، بۆ پارچه‌یه‌کا دی یا کوردستانێ، ڤێ یه‌کێ دکاری د قادا ناڤنه‌ته‌وه‌یی دا ژی زیانەکە مه‌زن بکێشه سه‌ر کۆمارا کوردستانێ.
ڕۆلا مه‌لا مستافا بارزانی د ئاڤاکرنا کۆمارا کوردستانێ دا وه‌کی سه‌رۆکئه‌رکانێ کۆمارا کوردستانێ و هه‌م ژی ئاڤاکرنا پارتییا ده‌مۆکرات یا کوردستانێ، ئه‌ڤ هه‌ر دو خال ب ته‌نێ ب سه‌رێ خوه کۆ مۆهرا خوه ل دیرۆکێ دانه، بۆ هزر و بیرا نه‌ته‌وه‌یی یا مله‌تێ کورد جهێ شان و شه‌ره‌فه‌کا مه‌زنن، ڕووپه‌له‌ک زێرینه. پشتی شکه‌ستنا کۆمارا کوردستانێ، ده‌ما کۆ مه‌لا مستافا بارزانی د گولانا ۱۹٤۷ێ دا به‌رێ خوه دایی ڕێویتیا دیرۆکی یا به‌ر ب یەکیتیا سۆڤیه‌تان ڤه، شه‌رێ کۆ د ڤێ ڕێویتیێ دا ل هەمبه‌ری ئارتێشێن سێ ده‌وله‌تێن داگیرکه‌ر کریه، بوویه وانه و ده‌رس د دیرۆکا مژارێن له‌شکه‌ری دا. شه‌ره‌ک نموونه‌یی یێ هێزه‌کا نه‌نیزامی ل هەمبه‌ری ئارتێشێن نیزامی، سه‌ختییا ڕێیا ب چیایێن ب به‌رف، ب له‌هی و ئاسێ ل ئالیه‌ک دی.
ئه‌ڤ شه‌ر و ڕێویتی بوویه ئه‌فسانه‌یه‌ک دیرۆکی. ڤه‌گه‌را مه‌لا مستافا بارزانی یا د ۱۹٥۸ێ دا بۆ به‌غدایێ ژی، ڤه‌گه‌ره‌کا وه‌سا مزافه‌ر و جهێ سه‌ربلندیێ بوو کۆ ناڤ و ناسنامه‌یا مله‌تێ کورد د ده‌ستوورا بنگه‌هین یا ئیراقێ دا دا نڤیساندن. شۆره‌شا د ۱۱ی ئیلۆنا ۱۹٦۱ێ دا، د بن پێشەنگیا سه‌رۆکێ نه‌مر مه‌له مستافا بارزانی و پارتییا ده‌مۆکرات یا کوردستانێ دا ل دژی ڕه‌ژیما به‌عس ده‌ست پێکری، هه‌ر چار پارچه‌یێن کوردستانێ خست به‌ر گه‌رمی و گۆریا خوه یا ئاگرێ ڕزگاریا نه‌ته‌وه‌یی. هه‌موو کێمینه‌یێن ئایینی و نه‌ته‌وه‌یی یێن باشورێ کوردستانێ ژی جهێ خوه د ڤێ شۆره‌شێ دا گرتن.
ئارتێشا ئیراقێ د ناڤ ٥-٦ ئارتێشێن هه‌ری بهێز بوو د دنێ دا. ته‌ڤی پشتگریا جاش و نۆکه‌رێن ناڤخوه‌یی یێن کوردستانێ ژی، ڤێ ئارتێشێ ل هەمبه‌ری شۆره‌شا ئیلۆنێ چووک ڤه‌دا؛ شۆره‌شا ئیلۆنا د ۱۱ ئادارا ۱۹۷۰ێ دا ب “ئۆتۆنۆمیا کوردستانێ” هات تاچ کرن. بنگه‌هێ کوردستانا فه‌ده‌ره یا ئیرۆ ژی هه‌ر ئه‌و ئۆتۆنۆمی و به‌رده‌وامیا وێ شۆره‌شێ یه. پشتی په‌یمانا به‌خته‌ره‌ش یا د ۱۹۷٥ێ دا ل جه‌زاییرێ د نێڤبه‌ینا ئیراق و ئیرانێ دا هاتی ئیمزا کرن کو هه‌موو زرهێزێن دنێ د ناڤ ڤێ په‌یمانێ دا جهگرتبوون، مله‌تێ کورد شکه‌سته‌ک گه‌له‌ک مه‌زن خوار و هه‌موو ده‌ستکه‌فتی ژی ژ ده‌ست چوون. له‌وما دڤێ ئه‌م بزانن سه‌رۆک مه‌سعود بارزانی د ڕه‌وشه‌کا گه‌له‌ک سه‌خت و دژوار دا ئه‌رکا مه‌لا مستافا بارزانی یا سه‌رۆکاتییا پارتییێ گرت سه‌ر ملێ خوه و کوردستان ب فه‌ده‌راسیۆنێ دا تاچ کرن. قه‌هره‌مانیا شه‌رێ پێشمه‌رگه ل هەمبه‌ری داعشێ و ڕه‌فه‌راندوما سه‌رخوه‌بوونێ یا کو مله‌تێ کورد ئێدی ب ئیراده‌یا خوه ده‌رکه‌تی سه‌ر سەحنەیا دیرۆکێ وه‌رچه‌خانه‌کا دی نوو د دیرۆکا مله‌تێ کورد دا پێک ئانی. دڤێ ئه‌م بێژن، د ڤان ۳۰ سالێن داویێ یێن سه‌روه‌ریا باشوورێ کوردستانێ دا دو کاریزمایێن دی ژی ب ئاوایه‌کی گه‌له‌ک گه‌ش ده‌رکه‌تن سه‌ر سەحنەیا دیرۆکێ…
سه‌رۆکێ هه‌رێما کوردستانێ نێچرڤان بارزانی و سه‌رۆکوه‌زیرێ کوردستانێ مەسروور بارزانی. هه‌لبه‌ت ژبلی ڤان بارزانیان د دیرۆکا مله‌تێ کورد دا، ئەبدولسه‌لام بارزانی و شێخ ئه‌حمه‌د بارزانی خوه‌دانێ شان و شه‌ره‌فاکا مه‌زنن. میراسه‌کا مه‌زن بۆ دیرۆکێ هشتنه. سه‌رۆکوه‌زیر ڕێزدار مەسروور بارزانی د په‌یاما خوه یا بۆ مناسه‌به‌تا ۷۸ سالیا پارتییێ ده گۆت: “پارتی ژ ڕۆژا هاتی ئاڤا کرن هه‌یا نها هه‌رتم بوویه پارتییا کوردایه‌تیێ.” ئه‌ز ژی دبێژم، گه‌ر مرۆڤ باش به‌رێ خوه بده دیرۆکا پارتییێ یا کو من ل ژوور ب کورتاسی، ب خولاسا ئاماژه پێ کری، کاریگه‌ریا پارتییێ ل سه‌ر کۆمه‌لگه‌یا کورد و هه‌ر چار پارچه‌یێن کوردستانێ کریه، په‌یوه‌ندی و دانووستاندنێن د ئاسته‌یێ ناڤنه‌ته‌وه‌یی دا ب درێژاهیا ۷۸ سالێن بۆری دا پێک ئانین، خوه‌راگریا ل هەمبه‌ری هه‌ر چار ده‌وله‌تێن داگیرکه‌ر و هه‌موو هه‌ڤالبه‌ندێن وان نیشان دایی، مرۆڤ دبینه کو پارتییێ وه‌کی ده‌وله‌ته‌کا کوردی یا نه‌هاتی ئیعلان کرن بزاڤ کریه، خوه‌دانێ میسیۆنه‌کا وه‌سا بوویه. ژ پارتییه‌کێ زێده‌تر وه‌کی ده‌وله‌ته‌کێ کار و خه‌باتا مله‌تێ کورد گرتیه سه‌ر ملێ خوه.
د چه‌ند گۆتنێن داویێ دا به‌رێ بڤر بدم پارتیێ. ئه‌ڤ پارتییا خوه‌دانێ دیرۆکه‌کا هنده مه‌زن، ژ گه‌له‌ک ده‌وله‌تان مه‌زنتر و خوه‌دان ئه‌زموونتر. ئه‌ڤ پارتییا خوه‌دانێ ڤان لیده‌ر و ڕێبه‌رێن هنده کاریزماتیک کو کاریزمایا هه‌ر یه‌ک ژ وان دکاره سه‌د سالان تێرا ئیداره‌کرنا ده‌وله‌ته‌کێ بکه. چ حه‌یفه کو ل هەمبه‌ری هنده‌ک پارتی و گروبێن هه‌لوه‌ست و ڤیزیۆنا وان بۆ مله‌تێ کورد ته‌نێ “پاریاتی” یه، گه‌له‌ک جاران نه‌چار و بێده‌ستهلات دمینه. ئه‌ڤ ژی کێشه‌یه‌کا سه‌ره‌که یا پارتییێ بخوه یه. دڤێ د زووترین وه‌خت دا ل خوه ڤه‌گه‌ره، ب هێژایی شان و شه‌ره‌فا خوه یا دیرۆکی، هیچ ژ کێماسی و بێخه‌میێن خوه نه‌ترسه، وان ده‌ست نیشان بکه و بله‌ز وان ژ ناڤێ ببه… جاره‌که دی ڕۆژا ئاڤاکرنا پارتییا ده‌مۆکرات یا کوردستانێ و ڕۆژا بوویینا سه‌رۆک مه‌سعود بارزانی ل هه‌موو مله‌تێ کورد و کوردستانێ پیرۆز به!
ژ فێسبۆکا محمه‌د سانری هاتیه وه‌رگرتن..
