ڕێکه‌فتنا نوو یا ئراق و ترکیێ چ باندۆرا ل پککێ دکه‌داویا هه‌فتیا بۆری وه‌زیرێ به‌ره‌ڤانیا ئیراقێ سابت ئه‌باسی و وه‌زیرێ به‌ره‌ڤانیا ترکیێ یاشار گوله‌ر ل ئه‌نقه‌ره یا پایته‌ختا ترکیێ پرۆتۆکۆله‌ک هه‌ڤکاریا له‌شکه‌ری، ئه‌وله‌هی و ته‌کۆشینا دژی ته‌رۆرێ ئیمزا کرن. وه‌کی دیار دکه کو ئه‌ڤ ژی به‌شه‌ک به ژ پرۆتۆکۆلا ئیراق و ترکیێ یا د چه‌ند مه‌هێن بۆری دا د چارچۆڤه‌یا ۲۷ لهه‌ڤتێگه‌هه‌شتنێن دن کو د ده‌ما سه‌ردانا ئه‌ردۆگان بۆ به‌غدایێ دا هاتبوون ئیمزا کرن.
ل گۆر زانیاریێن چاپه‌مه‌نیێ ڤێ ڕێکه‌فتنێ چو شانسه‌ک یێ مایینا په‌که‌کێ ل ئیراقێ نه‌هشتیه. ئه‌ڤ لهه‌ڤتێگه‌هه‌شتن د ده‌ما سه‌ردانا شانده‌یا فه‌رمی یا ئیراقێ بۆ ئه‌نقه‌رێ دا ژ بۆ گۆتووبێژکرنا چه‌ند دۆسیایه‌کێن ئه‌وله‌هیێ هاته هۆلێ.
ل گۆر زانیاریان، گۆتووبێژێن ڤێ جارێ یێن ئیراق و ترکیێ گه‌له‌ک هوورتر به‌حسا پرسا هه‌بوونا چه‌کدارێن په‌که‌کێ ل ناڤچه‌یێن درێژاییا زنجیره چیایێ قه‌ندیل، مه‌خموور و شنگالێ هاتیه کرن.
د ڤێ چارچۆڤه‌یێ دا به‌رپرسه‌کی ژ وه‌زاره‌تا ده‌رڤه یا ئیراقێ کو داخواز کریه ناڤێ وی نه‌یێ ئاشکه‌را کرن ژ ڕۆژنامه‌یا ئه‌لعه‌ره‌بی ئه‌ل جه‌دید ڕا ڕاگه‌هاند: “پرۆتۆکۆلا ئیراق و ترکیێ دا گه‌هه‌شتنه قۆناغه‌کا پێشکه‌تی یا باوه‌ریێ، ب تایبه‌ت کو ئیراقێ ئنیه‌تا پاقژ به‌ری ترکیێ نیشان دایه، ده‌ما کو په‌که‌که خست لیسته‌یا ڕێخستنێن قه‌ده‌غه‌کری دا و ب بریارا ئه‌نجوومه‌نا دادوه‌ری ژی باسکێن وێ (سێ پارتییێن گریدایی په‌که‌کێ) ل ئیراقێ داخستن.”
هه‌رواها دیار کر: “به‌رپرسێن ترکیێ و وه‌زیرێ ده‌رڤه یێ ترکیێ ژی که‌یفخواشیا خوه نیشاندان ل هه‌مبه‌ر وێ یه‌کێ کو ئیراقی ژی دژی په‌که‌کێ نه. حکومه‌تا ئیراقێ دخوازه ب ته‌مامی داوی ب وان پرسگرێکێن ئه‌وله‌هیێ بینه کو په‌که‌کێ ل ناڤچه‌یێن سینۆر چێکرینه.”
وی به‌رپرسێ ئیراقێ دیار کر کو، ته‌نێ پرسگرێکه‌ک هه‌به ئه‌و ژی په‌که‌کێ هه‌ڤپه‌یمانی دگه‌ل هنده‌ک گروبێن ملیشات هه‌یه و ئه‌و وه‌ک حکومه‌تا ئیراقێ ناخوازن شه‌ر و په‌ڤچوون بقه‌ومن، ژ به‌ر وێ ژی ئه‌و پرۆتۆکۆلا ب ترکیێ ڕا هاتیه ئینزا کرن ئه‌گه‌ر ژ بۆ ده‌مه‌کی ده‌ره‌نگ ژی بمینه، لێ دێ هه‌ر وه‌ره جیبجیکرن.
ل گۆر زانیاریان د ڤێ سه‌ردانێ دا ئیراقێ زنجیره‌یه‌ک ته‌دیرێن ئه‌وله‌هی و ئیداری جیبجیکری کرنه ژ بۆ سنۆردارکرنا هه‌بوونا چه‌کدارێن په‌که‌کێ د چارچۆڤه‌یا پاکه‌ته‌کێ ژ سۆزێن به‌غدایێ پێشکه‌شی به‌رپرسێن ترکیێ کریه.
د ده‌ربارێ ڤێ مژارێ دا ئه‌ندامێ لژنه‌یا ئاساییش و به‌ره‌ڤانیێ ل په‌رلامه‌نتۆیا ئیراقێ گۆت: “ئه‌و ڕێکه‌فتن و پرۆتۆکۆل و لهه‌ڤتێگه‌هه‌شتنا کو ئیراقێ ل گه‌ل ترکیێ ئیمزا کریه، هه‌موو خزمه‌تێ ژ ئیراقێ ڕا دکه و ئارمانج ژێ بهێزکرنا سه‌روه‌ریا ئراقێ یه.”
