داخوازا نێچیرڤان بارزانی ژ ئالیێن سیاسی

 سه‌رۆکێ هه‌رێما کوردستانێ نێچیرڤان بارزانی د داخویانیه‌کێ دا ب هه‌لکه‌فتا ده‌ستپێکرنا کامپانیایا هلبژارتنێن پارلامه‌نتۆیا کوردستانێ داخوازێ ژ هه‌موو ئالیان دکه‌ کو ل گۆری یاسا و ڕێنمایێن کۆمیسیۆنا بلند یا سه‌ربخوه‌ یا هلبژارتنان ته‌ڤبگه‌رن. کامپانیایه‌که‌ ئاشتیانه‌ و شارستانی ب ڕێ ڤه‌ ببن و دبێژه‌: کامپانیایه‌ک به‌ کو د ناڤبه‌را ئالیان دا ئالۆزی ده‌رنه‌که‌ڤه‌ و جڤاکێ پارچه‌ نه‌که‌. دڤێ وێنه‌یه‌کی جوان یێ هه‌رێما کوردستانێ نیشان بده‌ و چاندا ده‌وله‌مه‌ند یا بهه‌ڤره‌ژیانێ، هه‌ڤپه‌ژراندن و پرەنگیا جڤاکا کوردستانێ و پێکهاته‌یێن وێ نیشان بده‌.

سه‌رۆک نێچیرڤان بارزانی دبێژه‌:  هه‌ر که‌س ئازاده‌ کو پرۆپاگاندایا سیاسه‌ت و به‌رنامه‌یێن خوه‌ بکه‌، ڕه‌خنه‌ بکه‌، لێ بلا چو که‌س و ئالیه‌ک ڕێ نه‌ده‌ کو کین و نه‌فره‌تێ به‌لاڤ بکه‌.

سه‌رۆکێ هه‌رێما کوردستانێ د داخویانیا خوه‌ دا  بالێ دکشینه‌ سه‌ر پێویستیا پاراستنا ڕوومه‌ت و ستاتوویا ژنێ  و پاراستنا ژنان ب گشتی و بەربژرن ژن ژ بۆ هلبژارتنێن پارله‌مه‌نتۆیێ ژ بۆ هه‌رێما کوردستانێ پیڤانه‌که‌ گرینگه‌.

سه‌رۆکێ هه‌رێما کوردستانێ دبێژه‌: ئالیێن  سیاسی و به‌ربژێر نه‌ دژمنێ هه‌ڤن، لێ هه‌ڤرکێن سیاسی نه‌. ئه‌و هه‌موو د کوردستانیبوونێ دا هه‌ڤپارن  و چاره‌نووسێ مه‌ هه‌موویان ژی ب هه‌ڤ ڕا یه‌. له‌وما ئه‌رکا مه‌ هه‌موویانه‌ ب هه‌ڤ ڕا هه‌ول بدن کو پێڤاژۆیه‌که‌ ده‌مۆکراتیک ب ئاوایه‌کی ئاشتیانه‌ بمه‌شینه‌ پشتی هلبژارتنان دڤێ که‌سێن سه‌رکه‌تی جاره‌که‌ دن ب هه‌ڤ ڕا ڕوونێن و هکوومه‌تێ ئاڤا بکن و یێن کو دبن ئۆپۆزیسیۆن ژی دڤێ د وارێ یاسادانین و چاڤدێریێ دا ب هکوومه‌ت و سازیێن هه‌رێما کوردستانێ ڕا ته‌ڤبگه‌رن.ع

پێکڤه‌ژیانا ئاشتیانه‌ یا هه‌موو نه‌ته‌وه‌ و ئۆلان ڕوویه‌کی گه‌ش و بنگه‌هه‌که‌ بهێزه‌ ژ بۆ سه‌رکه‌فتنا هه‌رێما کوردستانێ. ئه‌م هه‌موو ب هه‌ڤ ڕا خوه‌دیێ هه‌موو ده‌ستکه‌فتی و پێشکه‌تنێن کوردستانێ نه‌. پاراستنا وێ پێکڤه‌ژیانێ ئه‌رکا مه‌ هه‌موویانه‌.

ژ به‌ر وێ ژی دڤێ د کامپانیایا هلبژارتنێ دا ڕێز ل پیرۆزی و سه‌مبۆلێن کوردستانێ و هه‌موو پێکهاته‌یان وێ بێ گرتن. ئه‌م پشتگریا ئیراده‌یا ئازاد ئا هه‌موو پێکهاته‌یێن هه‌رێما کوردستانێ دکن. دڤێ ده‌زگه‌هێن ئه‌وله‌کاری ب ئاوایه‌کی ئاشتیانه‌ و ب ڕێکووپێک خه‌باتێن هلبژارتنێ ب ڕێ ڤه‌ ببن.

سه‌رۆکێ هه‌رێما کوردستانێ گۆت: مه‌ چو جاری ب پاشخستنا هلبژارتنان ڕا نه‌بوونه‌، لێ ژ بۆ به‌رژه‌وه‌ندیێن بالا یێن هه‌رێما کوردستانێ و ژ بۆ وێ یه‌کێ کو هلبژارتن ب به‌شداریا هه‌موو ئالیێن سیاسی و پێکهاته‌یێن سیاسی بێن کرن، مه‌ چه‌ندین جار  هلبژاتن پاشخستن.

بهێزبوونا هه‌رێما کوردستانێ و نووکرنا ڕه‌واتیا سازیێن مه‌ ب لدارخستن و سه‌رکه‌فتنا هلبژارتنێن ئازاد و دادپه‌روه‌ر ڤه‌ گرێدایی یه‌. له‌وما چاڤێ هه‌ڤالێن مه‌ ل هه‌ر ده‌رێ ل سه‌ر ڤێ هلبژارتنێ یه‌ و ژ بۆ سه‌رکه‌فتنا وێ ئه‌رکا مه‌ هه‌موویان ئه‌.

هلبژارتنا پارلامه‌نتۆیه‌که‌ بهێز ده‌رفه‌ته‌که‌ گرینگه‌ ژ بۆ بهێزکرنا سیسته‌ما ده‌مۆکراسی، سازی و ڕه‌فۆرمان، و هه‌روها ژ بۆ پاراستنا هه‌رێما کوردستانێ و پێکانینا سیسته‌ما فه‌ده‌رالی و مسۆگه‌رکرنا مافێن ده‌ستووری یێن گه‌لێ کوردستانێ.