سه‌کره‌ته‌رێ ئه‌نجومه‌نا وه‌زیران ئامانج ڕه‌حیم دیار کر کو ڕۆلا سه‌رۆکێ هه‌رێما کوردستانێ نێچیرڤان بارزانی یا د رێکەفتنا هناردکرنا په‌ترۆلا هەرێما کوردستانێ دا رۆلەکی دیرۆکی بوو.
وه‌زیره‌کی حکومه‌تا هه‌رێما کوردستانێ ژ ڕووداوێ ڕاگەهاند کو د جڤینا ئه‌نجومه‌نا وه‌زیران دا، هه‌ولێن نێچیرڤان بارزانی یێن ژ بۆنا ئیمزاکرنا رێکەفتنا هنارده‌کرنا په‌ترۆلا هەرێما کوردستانێ دا وه‌کی “دیرۆکی” هاتنه بناڤکرن.
ئه‌نجومه‌نا وه‌زیران یا هه‌رێما کوردستانێ ۲٤ێ ئیلۆنا ۲۰۲٥ئان ب سه‌رۆکاتیا سه‌رۆکوه‌زیر مەسرور بارزانی جڤیا و مژارا سه‌ره‌کی یا جڤینێ رێکەفتنا سێئالی یا ژ بۆ ژ نووڤه ده‌ستپێکرنا هنارده‌کرنا په‌ترۆلێ بوو
وه‌زیرێ کو به‌شداری جڤینێ بووبوو ژ ڕووداوێ را گۆت: “به‌ریا داویهاتنا جڤینێ، سه‌کره‌ته‌رێ ئه‌نجومه‌نا وه‌زیران د. ئامانج ڕه‌حیم ئاخڤی و گۆت: ئەز وه‌کی ئامانج ڕه‌حیم و شانده‌یا دانووستاندنکار، گه‌له‌ک سپاسیا سه‌رۆکێ هه‌رێما کوردستانێ نێچیرڤان بارزانی دکم کو ب ڕاستی ڕۆله‌کا گه‌له‌ک گرینگ و دیرۆکی د ئاڤاکرنا رێکەفتنا سێئالی دا لیست.”
ل گۆری هه‌مان وه‌زیری، پشتی ئاخافتنا د. ئامانج ڕه‌حیم، د جڤینێ دا ده‌ستخوه‌شی ل نێچیرڤان بارزانی هاته کرن و ژ به‌ر هه‌ولێن وی یێن ژ بۆنا بئامانج گەهشتنا رێکەفتنێ دا سپاسییا وی هاتیه کرن.
رێکەفتنا سێئالی د ۲٥ێ ئیلۆنێ دا ب فه‌رمی هاتبوو ڕاگەهاندن. ل گۆری په‌یمانێ، دێ رۆژا ٢٧\٩\٢٠٢٥ سائه‌ت ٦سبه‌هێ ژ نووڤه ده‌ست ب هنارده‌کرنا په‌ترۆلێ بێ کرن.
نێچیرڤان بارزانی د هه‌ڤدیتنێن خوه دا هه‌ر تم ته‌که‌زی ل سه‌ر چاره‌سه‌رکرنا پرسگرێکێن هه‌ولێر و به‌غدایێ ب ڕێیا دیالۆگێ دکه.
