تەڤدەم: ئەم یەكپارچەییا سوریێ دپارێزن

به‌رپرسێ ته‌ڤده‌مێ یێ وه‌لاتێن که‌نداڤێ، شڤان خابووری، د ته‌له‌ڤیزیۆنه‌کا عه‌ره‌بی دا ئاشکه‌ره‌ کر کو وان چ جارا فکرا ئاڤاکرنا کوردستانا مه‌زن نه‌کریه ‌.

نوونه‌ر و به‌رپرسێ ته‌ڤده‌مێ ل وه‌لاتێن که‌نداڤا عه‌ره‌بی، شڤان خابووری، د ده‌ربارێ بوویەر و گوھەرتێنێن ڤێ داوی یێن ل ڕۆژاڤایێ کوردستانێ د ھەڤپەیڤینەكا خوە دا دگەل ته‌له‌ڤیزیۆنا (هه‌ده‌س) یا عه‌ره‌بی بەحسا  بیر و ئیدۆلۆژیا ڕێخستنا پککێ دكە و دبێژە: “مه‌ چ جارا فکر نه‌کریه‌ کو ئه‌م کوردستانا مه‌زن ئاڤا بکن و مه‌ چ جارا په‌یوه‌ندیێن خوه‌ دگه‌ل به‌شار ئه‌سەد نه‌بریه‌.”

هه‌روها، خابووری، ده‌ربارێ هاتنا هێزێن ڕژێما به‌شار ئه‌سەد بۆ مه‌نبجێ ژی گۆت: ”هوون دزانن ڕێڤه‌به‌ریا خوه‌جهی هه‌رده‌م پاراستنا یه‌کپارچه‌ییا سووریێ کریه‌. ژبه‌ر وێ چ جارا پرۆبله‌م د ناڤبه‌را مه‌ و ئه‌سەد ده‌ ده‌رنه‌که‌تنه‌. کێشه‌یا مه‌ یا لگه‌ل ئه‌سەد ب ته‌نێ لسه‌ر ئه‌ساسێ ده‌ستوورێ یه‌.

وی بەرپرسێ تەڤدەمێ  دا زانین کو هێزێن ڕژێما به‌شار ئه‌سەد ل مه‌نبجێ نه‌ و وگوت: “به‌رێ ژی ئارتێشا سووریێ ل وان هەرێمان ھەبوون. نها ل شوونا هێزێن سووریا ده‌مۆکراتیک ، دێ لەشكەرێ سوریێ  پاراستنێ ژ خه‌لکێ باژێر بكە و ل دژی ئێریشێن ترکیێ راوەستە.”

د بەرسڤا پرسەكێ دا؛ گه‌لۆ وێ ڕژێما سووریێ چقاسی پابه‌ندیێ ب وان ڕێکه‌فتنان بکه‌ و ئه‌و ئه‌گه‌را نینه‌ کو ڕژێم دیسا جارەكە دن  ئێریشی كوردان بكە و تەعدایێ ل وان بكە؟   خابووری گۆت: “مه‌ چ جارا فکر نه‌کریه‌ کو ژ چارچۆڤه‌یا یه‌کپارچه‌ییا سووریێ دوور بکه‌ڤن و مه‌ چ جارا فکر نه‌کریه‌ کو ئه‌م کوردستانا مه‌زن ئاڤا بکن. تێبینیا مه‌ به‌س ل سه‌ر ده‌ستوورێ بوویه‌ دگه‌ل به‌شار ئه‌سەد و مه‌ چ جارا په‌یوه‌ندیا خوه‌ دگه‌ل ڕه‌ژمێ نه‌بریه‌. هه‌ڤپه‌یمانێن مه‌ عه‌ره‌بن. به‌شه‌ک ژ هێزا مه‌ ژی عه‌ره‌بن. چاره‌سه‌ریا پرسا مه‌ ل شامێ یه‌.”

وەكە تێ زانین، به‌رپرسێ ته‌ڤده‌مێ ئالدار خه‌لیل و هسدێ چەند جارا بانگ ل ڕژێما به‌شار ئه‌سەد كریە کو بێن مه‌نبجێ و دژی ئێریشا تركیێ مه‌نبجێ بپارێزن.

نێرین / شیرۆڤە