دۆست: دڤێ ئەم ھەرێما كوردستانێ وەك چاڤێ خوە بپارێزن

ژان دۆست نڤیسکار و چاڤدێرێ سیاسی ژ ڕۆژاڤایێ کوردستانێ د هه‌ڤپه‌یڤینه‌‌كا کورت دا د گه‌ل مالپه‌را کدپ.ئینفو دا‌ دبێژه‌: “هه‌رێما کوردستانێ پا‌رچه‌یه‌کا ئازاده‌ ژ وه‌لاتێ مه‌ و دڤێ ئه‌م وێ ب چاڤێ خوه‌ بپارێزن.”

ژان دۆست د ڤێ هه‌ڤپه‌یڤینێ دا به‌هسا پێشهات و بوویه‌رێن داوی یێن ل کوردستانێ و ناڤچه‌یێ دکه‌.

نڤیسكار ژان دۆست بەھسا گرنگیا كیانێ ھەرێما كوردستانێ دكە وەكو دەستكەفتیەك دیرۆكی ژ بۆ ھەموو گەلێ كورد ب ناڤ دكە و دبێژە: ” هه‌رێما کوردستانێ ژ بۆ هه‌موو کوردان ده‌ستکه‌فته‌ک دیرۆکی مه‌زنه‌. ژ بۆ هه‌ر کورده‌کی ئه‌ڤ هه‌رێما ئازاد دیواره‌که‌، و ئه‌و ستوونا کورده‌واریێ یه‌. نابه‌ کو که‌سه‌ک یان هێزه‌ک ئارامیا وێ خه‌را بکه‌. گه‌ره‌ک هه‌ر کورده‌ک وێ بپارێزه‌.”

د بەشەك دن ژ ھەڤپەیڤینا خوە دا، ژان دۆست نڤیسکار و چاڤدێرێ سیاسی ژ ڕۆژاڤایێ کوردستانێ ھەبوونا پەكەكێ ل باشوورێ كوردستانێ ب نە مەشروع دبینە و دیار دكە كو لڤ و كریارێن وێ پارتیێ نە د بەرژەوەندیا كوردان وو ب تایبەتی باشوورێ كوقردستانێ دا نە: “بێگومان ئه‌ڤ تشتا کو پەکەکە دکه‌ خه‌رابه‌، مخابن ژ ده‌ستپێکا سالێن 80ان دا‌ پەکەکێ ل هنده‌ک ده‌ڤه‌رێن هه‌رێما کوردستانێ ب جھ بوویه‌. دۆز ئه‌و بوو کو خه‌باتا خوه‌ یا چه‌کداری ژ وێرێ ده‌ست پێ بکه‌ و ل دژی ده‌وله‌تا ترکیێ شه‌ر بکه‌. لێ به‌لێ سه‌د جاری مخابن کو هه‌بوونا پەکەکێ ل هه‌رێما کوردستانێ، ب تایبه‌تی ژی پشتی سالێن 90 ان ئێدی نه‌ ژ خێرا کوردان ڕا‌ بوو. دڤێ ئالیگرێن پەکەکێ ب خوه‌ ژ ڤێ یه‌کێ شیار ببن و زانبن کو ته‌ڤگه‌را پەکەکێ ل هه‌رێما کوردستانێ هه‌موو ژی د خزمه‌تا دژمنێ کوردان دا‌ یه‌.”

ژ گۆر نڤیسكار ژان دۆست نڤیسكار رەوشەنبیر دەنگێ گەلن و دڤێ شاشیێن پارتیێن سیاسی ئاشكەرا بكەن و دبێژە: “نڤیسکار و ڕه‌وشه‌نبیر ده‌نگێ گه‌لێ خوه‌ نه‌. گه‌له‌ک جاران گاڤا کو ئه‌ز شاشیتیێن پارتیێن سیاسی، وه‌ک پەکەکێ و پەیەدێ دبێژم، دبێژنه‌ من خوه‌ دووری سیاسه‌تێ بکه‌. تشتا کو ئه‌ز دکم نه‌ نێزیکبوونا سیاسه‌تێ یه‌، ئه‌و ئه‌رکێ که‌سێ ڕه‌وشه‌نبیره‌ و ئه‌ز ژی ب ئه‌رکێ خوه‌ ڕادبم. دڤێ ئه‌ز ب ده‌نگه‌کی بلند ل دژی شاشیتیێن مه‌زن بانگ بکم و بێژم (نا).

د داویا ھەڤپەیڤنا خوە دا ژان دۆست دبێژە: هه‌رێما کوردستانێ پارچه‌یه‌کا ئازاده‌ ژ وه‌لاتێ مه‌، دڤێ ئه‌م ب چاڤێ خوه‌ وێ بپارێزن. دڤێ وه‌ک کلێ چاڤێ مه‌ به‌. ڕۆناهیا چاڤێ مه‌ به‌. ژ بۆ هه‌موو کوردان هه‌رێما کوردستانێ دیوار و ستارگه‌هه‌کا‌ پاراستنێ یه‌.

نێرین / شیرۆڤە