دەما سیاسەت دبە یاریەکا بێ ڕامان

نڤیسینا: محەمەد چەلکی

ناهێتە ماندەلکرن کو حوکمەتا هەرێما کوردستانێ حەتا بن هنگلا یا د قەیران و گرفتان دا مالق بووی و سەرەداڤێن چارەسەریێ ل بەر رایەدارێن وێ ژ بڕینا هنگڤێ هۆزۆمیران ب زەحمەتر و مەترسیدارتر لێهاتیە. ئەڤە ژی بەرهەمێ وێ گێلەشۆکێ و بێپلانیا حوکمەتێ بوویە كو ب تەراتێن و تەخشان و پەخشانکرنا داهاتێ کوردستانێ ب رەنگەکێ بێ بەرپرسیاری و هزرنەکرن د ئاییندەیی دا وەکو ب کوردی دبێژن: “دراڤێ سپی بۆ رۆژا رەش” بهێتە هەلگرتن.

پەیدابوونا کێشێن ئابووری د هەر وەڵاتەکی دا پتر بەرهەمێ شاشیێن سیاسیانە د رێڤەبرنا وەڵاتی دا، بۆ هەر کەسی دیارە دانێ سیاسیێن مە د قازانەکێ دا ناکەلە و ب هەر رەنگەکێ هەبە ب کێکا دەستهەڵاتێڤە نۆژبوونە1، ئانکو نەبوونا هەڤپەژراندن و پەیادەنەکرنا بنەمایێن سەرەتایێن دیمۆکراتیێ، ئەڤ کاسۆتیا مانا د دەستهەلاتێ دا ب هەر رەنگەکێ هەبە هەموو سەکتەرێن تەندروستیا برێڤەچوونا پرۆسەسا سیاسی خەتماندنە و دەستهەلاتدار بێمننەت کرنە ژ هەر رەنگە رەخنە و داخازێن جڤاکێ سڤیل و ل داخازێن وان نەبانن.

کەلەکەبوونا کێشێن ئابووری و نەبوونا چ ئاسۆیێن چارەسەریێ جڤاکێ کوردی شلقاندیە و بەر ب نشیڤیەکا مەرترسیدار گرێل دبە، ئەڤ بارێ شلۆقێ جڤاکێ کوردستانێ خۆەش هەل و بیڤە بۆ نەحەزێن هەبوونا ڤی چرایێ دبێژنێ حوکمەتا هەرێما کوردستانێ و بزاڤێن تەمراندنا ڤی چرای ژ لایێ داگیرکەرێن کوردستانێ ڤە چ جارا هێوری ب خوەڤە نەدیتیە، لێ ئێکرێزیا گۆتارا سیاسی (حەتا بەری دەمەکی) د رێکا وان دا سنگرە بوو. مخابن، ب ئەگەرێن درێژبوونا کێشێن ئابووری و ململانا سیاسی و رەڤین ژ بەرپرسیاریا ڤێ کێشا ئابووری و بزاڤکرن خوە ژێ تافیلکرن، ئێکرێزی و ئێکگۆتاریا کوردی گەلەک لاواز و کزبوویە ئەگەر نەبێژین د نوکە دا هەر نەمایە.
هەلبەت مەرەما من پەرت و بەڵاڤەیا لایەنێن سیاسیە بەرامبەری کێشێن بنگەهینێن مە د گەل بەغدا و بەزاندنا سنوورێن کوردستانێ ژ لایێ هەردو دەولەتێن داگیرکەرێن کوردستانێ تورکیا – ئیرانێ ڤە. درێژبوونا کەشێ هەڤڕکی و لهەڤنەکرنا لایەنێن سیاسی ل سەر ڤەدیتنا رێکە چارەیێ، هەبوون و ڤەمانا ڤی قەوارێ حوکمەتا هەرێما کوردستانێ ئێخستیە د مەترسیێ دا و ئەڤ داخازێن سەربەخۆیا ئیداری دێ ببە رێخۆشکەر بۆ ناڤەندێ (حوکمەتا عێراقێ) ل هەموو رێکەفتنێن د گەل حوکمەتا هەرێما کوردستانێ پاشگەز ببە و ئێدی بۆدجا هەرێما کوردستانێ یا ئێکگرتی نامینە و هینگێ دێ هندەک قەوانێن دن دێ سەری هلدن و هەبوونا وەزارتێن هەرێمێ چ بوها و گرنگی نامینە و دێ داخازا هلوەشانێ هێتە کرن! ئەڤە دووبارە ئەم زڤڕین سەر “کاسکا زەر”، ئانکو ژ بەرهەمێ خەبات و تێکۆشینا نێزیکی سەد ساڵا دەست ڤالا بزڤڕین.

ئەڤجا بەری بگەهیتە ڤی ڕادەی فەرە لایەنێن سیاسی ل هەڤ بکەن و قەوانێ سەربەخۆیا ئیداری بتەمرینن و بێدەنگ بکەن. ئەڤە یاریەکا سیاسییا بێ ڕامانە، چونکو پەیوەندی ب هەبوونا قەوارێ هەرێما کوردستانێ ڤە هەیە و ئەڤ یاریا بێ ڕامان، یاریا ب کارئینانا کێشا ئابووری بۆ گەهەشتنا مەرمەێن سیاسی، یاریەکا چڤێل و كرێتە، ئەڤرۆ کار و ئەرکێ ژ هەموویان گرنگتر لهەڤکرنا سیاسییە و ڤەگەراندنا باوەریا خەلکێ کوردستانێ ب لایەنێنێن سیاسی یە.
ئەرێ ئەو سیاسەتا نەبە جهێ رەزامەندی و باوەریا خەلکی ئەو چتۆڤ سیاسەتە، مانە کۆلانا گۆڕێ خوەیە؟!

2020.05.31

نۆژ: کرمە د کەڤیتە سەر پیستی و خوینێ دمێژیت هەتا وی گیانداری دکوژی ژێ ڤەنابیت.

نێرین / شیرۆڤە