رەڤەندا کورد ژی دابەش بوو

 

داوه‌ت فه‌رکی، به‌ربووک هه‌تکی

نووری چه‌لیک

د نڤیسێن خوە ین به‌رێ دا  مە به‌حسا هنده‌ک تایبه‌تمه‌ندییێن مه‌ کوردان کربوو و گۆتبوو “ئه‌م کورد ژ بۆ پارچه‌کرن و خه‌رابکرنێ گەلەک خورت و ژێهاتی نە”، ب تایبه‌ت سیاسه‌تمه‌دار (!) ئێن مه‌ د پارچه‌کرن و خه‌رابکرنێ دا پر زیره‌ک و ژێهاتی نه‌. به‌رژه‌وه‌ندییێن خوه‌ د سه‌ر به‌رژه‌وه‌ندییێن کورد و کوردستانێ ڕا دگرن و ژ بۆ ڤێ ژی چ ژ ده‌ستێ وان دهێت ته‌خسیریێ ناکن. 

د مه‌سه‌لا دیاسپۆرا (رەڤەندا) کورد دا مه‌ دیتن و هه‌لوه‌ستا خوه‌ د نڤیسێن خوە دا بەرچاڤ کرن و مه‌ ل  سه‌ر نڤیسی. مه‌ گۆت کو پارچه‌کرنا ته‌ڤگه‌را دیاسپۆرا کورد نه‌ د به‌رژه‌وه‌ندییا کورد و کوردستانێ دا یه‌ و دڤێ خه‌باتێن ژ بۆ دیاسپۆرا کورد د بن یه‌ک سیوانێ دا بهێن کرن و هه‌ر چقاسی هنده‌ک پارتی و ده‌زگه‌هێن کوردستانی ل پشت وان بن ژی، دیاسپۆرا کورد ب سه‌رۆکاتی و ڕێڤه‌به‌رییا ئەکاده‌میسیه‌ن، دیپلۆمات و زانیارێن کورد بهێتە برێڤەبرن  و خه‌باته‌ک بێ ئیجازه‌ت و وه‌سایه‌ت بمه‌شینن.

 دامه‌زراندنا (ناڤه‌ندا ڕه‌ڤه‌ندا کورد) و (دیاکورد)ێ جاره‌ک دن نیشان دا کو ئه‌م کورد ژ هه‌ست و هزرێن نه‌ته‌وی بێپارن و ب هه‌ڤیرترشێ یه‌کێتی و نه‌ته‌وپه‌روه‌رییێ نه‌هاتینه‌ مه‌هاندن و نه‌سته‌وییانه‌.

بێگومان ل پشت هه‌موو داموده‌زگه‌هێن لۆبی یێن جیهانێ ده‌وله‌ت هه‌نه‌. ئه‌رمه‌نستان ل پشتا لۆبییا ئه‌رمه‌نییانه‌، یوونانیستان ل پشت لۆبییا یوونانانه‌، ئیسرائیل ل پشت لۆبییا جهوویانه‌. ب دزی یان ئاشکه‌ره‌ هه‌ر لۆبییه‌ک ده‌سته‌ک ل پشته‌. ژ به‌ر کو ده‌وله‌تا مه‌ نینە گەلەک نۆرماله‌ کو پارتییه‌ک وه‌ک پارتیا دەمۆکراتا کوردستانێ (پدک) یان که‌ساتته‌ک وه‌ک سەرۆک مەسعود بارزانی ل پشتا لۆبییا ڕه‌ڤه‌ندا کورد به‌. ل ڤر هه‌م قازانجا (ئاڤانتاژا) ئه‌رێنی و هه‌م ئا نەرێنی (ده‌زاڤانتاژ) ده‌ردکه‌ڤه‌ هۆلێ. خه‌باتێن دیاسپۆرا کورد و پەیداکرنا دۆستان ب ده‌رفه‌ت و ئابۆرییێ خورت ب پێش دکه‌ڤه‌. هه‌گه‌ر پارتییه‌ک وه‌ک پەدەکێ و که‌ساتیه‌ک وه‌ک سه‌رۆک بارزانی ل پشت خه‌باتێن دیاسپۆرا کورد به‌، د وارێ ئابۆری، خورتبوون و پێشخستنا خه‌باتێن دیاسپۆرا کورد دا قازانج و ئەرێنی یە. ژ ئالییێ دن، هه‌گه‌ر دیاسپۆرا کورد د بن سه‌رۆکاتی، ئیجازه‌ت و وه‌سایه‌تا پارتییه‌کێ دا به‌، دبه‌ کو خه‌باتا دیاسپۆرا کورد سه‌قه‌ت بمه‌شه‌، ب پێش نه‌که‌ڤه‌ و ببه‌ که‌له‌مێ چاڤێن ده‌وله‌تێن داگیرکه‌ر. ئه‌ڤ ژی ژ بۆ کوردان زیان و نەرێنی یە.  ژ به‌ر ڤێ یه‌کێ مه‌ گۆت (هه‌ر چقاسی پارتی یان که‌ساتیێن وه‌ک سه‌رۆک بارزانی ل پشتا وێ بن ژی) دڤێ داموده‌زگه‌هێن دیاسپۆرا کورد سه‌ربخوه‌ بن و د ئاورا گه‌له‌مپه‌ری دا د سه‌ر پارتییان ڕا بن. 

ب سه‌رپه‌ره‌شتییا پەدەکێ و ل هه‌ولێرێ دامه‌زراندنا ناڤه‌ندا ڕه‌ڤه‌ندا کورد هه‌م بله‌ز بوو، هه‌م ژی کێماسی و خه‌له‌تییه‌ک بوو. و بێگومان کێماسی و خه‌له‌تییێن دن ژی هه‌بوون.  دامه‌زراندنا ناڤه‌ندا ڕه‌ڤه‌ندا کورد دکاریبوو به‌رفره‌هتر بێ گرتن و خوه‌دییێ باندۆره‌ک زێده‌تر بوویا. کار و خه‌باتێن ب له‌ز و به‌ز هه‌رده‌م ب خوه‌ ڕا کێماسی و خه‌له‌تییان ژی تینه‌. ئه‌ز باوه‌رم دامه‌زرێنه‌رێن ناڤه‌ندا ڕه‌ڤه‌ندا کورد ژی ب ڤان کێماسییێن خوه‌ هایدار بوونه‌، قه‌بوول کرنه‌ و پشتی کۆنگره‌یێ خوه‌ستنه‌ کو کێماسییێن هه‌یی چارەسەر  بکن. نیشانا ڤێ یه‌کێ ژی سه‌رۆکاتییا ناڤه‌ندا ڕه‌ڤه‌ندا کورده‌. هه‌گه‌ر کوردێ ڕۆژاڤا ئیسمائیل کامل کربن سه‌رۆکێ ڕه‌ڤه‌ندا کورد، دخویێ کو کێماسییێن خوه‌ دیتنه‌ و دخوازن وان کێماسییێن خوه‌ سه‌راراست بکن. ئه‌ڤ ژ بۆ ناڤه‌ندا ڕه‌ڤه‌ندا کورد گاڤه‌ک ئه‌رێنی و باشه‌.

خه‌له‌تی و کێماسییا دویه‌م (دیاکورد)ێ کر. چما کو پەدەکێ و بارزانی ل پشت ناڤه‌ندا ڕه‌ڤه‌ندا کورد بوون، هنده‌ک پارتییێن کو ڕکبه‌رێن پەدەکێ و بارزانیبوون ڕابوون ده‌ست ئاڤێتن دیاکوردێ و خوه‌ستن ب له‌ز و به‌ز کۆنگره‌یا دیاکوردێ ل بکن و هه‌تا ئاسته‌کێ تۆلا خوه‌ ژ پەدەکێ و بارزانی بستینن.  ژ خوه‌ ژ کۆنگره‌یا دیاکورد و شاندەیێن به‌شدار هه‌ر تشت ئاشکه‌ره‌ دبوو کا ئارمانج و مه‌سه‌له‌ چیه‌. 

چما ڕێڤه‌برێن دیاکوردێ داخواز و پێشنیارا ئۆفیسا (قه‌رارگه‌ها) بارزانی قه‌بوول نه‌کر؟

نامه‌ و به‌لگه‌یا کو قه‌رارگه‌ها بارزانی به‌ری کۆنگره‌یێ ژ ڕێڤه‌برێن دیاکوردێ ڕا شاندیه‌ د ده‌ستێ مه‌ دا یه‌. هه‌ر چقاسی ڕێڤه‌برێن دیاکوردێ نامه‌یا کو ژ وان ڕا هاتیه‌ شاندن ئینکار بکن ژی، ڕاستی ناهێتە ڤه‌شارتن. قه‌رارگه‌ها بارزانی ب نامه‌یه‌کێ تکا/رجا ژ ڕێڤه‌برێن دیاکوردێ دکە کو کۆنگره‌یێ خوە جێ نەکن، ناڤێ کۆنگره‌یێ بکن جڤینه‌ک به‌رفره‌ه دا کو ئه‌و پرسگرێکێن ناڤه‌ندا ڕه‌ڤه‌ندا کورد و دیاکوردێ د وێ جڤینا بەرفرەه دا چاره‌سه‌ر بکن و وان د بن یه‌ک سیوانێ دا بکن یه‌ک. قه‌رارگه‌ها بارزانی خوه‌ دده‌ به‌ر هه‌موو مه‌سره‌فێن چوون و هاتن و جڤینان و وان ڤه‌دخوینه‌ هه‌ولێرێ. لێ ڕێڤه‌برێن دیاکوردێ خوه‌ که‌ڕ و لال دکن و ب له‌ز و به‌ز کۆنگره‌یا دیاکوردێ ل ستۆکهۆلمێ ل دار دخن. (رۆژا پێویست بوو ئه‌م کارن نامه‌ و به‌لگه‌یێ ژ ڕایا گشتی ڕا ئاشکه‌ره‌ بکن). ئه‌ڤ یه‌ک دده‌ خویاکرن کو مه‌سه‌له‌ نه‌ به‌رژه‌وه‌ندییێن نه‌ته‌وی و به‌رژه‌وه‌ندییێن دیاسپۆرا کورد، لێ به‌رژه‌وه‌ندییێن شه‌خسی و پارتیتییێ نه‌، پارچه‌کرن، دوبه‌ندیتی و دژبه‌رییا ناڤخوه‌یی یه‌. و هه‌لبه‌ت بنگه‌ه و سه‌رکه‌فتنا ڤان کریاران ژی نینە و داوییا وێ دیسا پارچه‌بوون و تێکچوونه‌.

ب کورت و کورمانجی؛ به‌رژه‌وه‌ندییێن شه‌خسی و پارتیتییێ خه‌ون و خه‌یالێن کوردێن دیاسپۆرایێ ژی به‌راڤێتی کرن و هێڤییێن وان نه‌هشتن. کورد ب ڤێ قووشێ ناگەهێن مووشێ و هوون ساخ….

 نووری چه‌لیک
نێرین / شیرۆڤە