ڕاگەهاندنا پەیڤدارێ سەرۆکایەتیا هەرێما کوردستانێ دەربارەی ڕوودانێن لالەزار
ئەڤرۆ سێشەمبی ٢٠٢٦/٤/٢١، د داخویانییەکێ دا بۆ مالپەرێ سەرۆکایەتییا هەرێما کوردستانێ، دلشاد شەهاب، پەیڤدارێ سەرۆکایەتییا هەرێما کوردستانێ ڕاگەهاند
ئەڤە دەمەکە د دەزگەهێن ڕاگەهاندنێ دا دەربارەی بوویەرێن مەها تەباخا سالا بورى یێن کو ل لالەزارا باژێرێ سلێمانیێ قەومین، هندەک بابەت سەبارەت ب هەلوێستێ جەنابێ سەرۆکێ هەرێما کوردستانێ د پرۆسەیا دادگەهکرن و یەکلاکرنا چارەنڤیسێ وان تۆمەتبار و دەستەسەرکریێن د ئەنجامێ وان بوویەران دا هاتینە گرتن، هاتینە بەحسکرن.
ل ڤێرە ئەم دخوازن ژ بۆ هەموو ئالییان زەلال بکن کو، شتی کو ئەڤ بابەتە د دەزگەهێن ڕاگەهاندنێ دا هاتیە بەحسکرن، مە ل سەرۆکایەتییا هەرێما کوردستانێ دگەل دەسهەلاتا دادوەری شێور و بەدووچوونا پێدڤی کر. دیارە کو ل گۆر یاسایێ، بڕیاردان ل سەر داخوازا ڤەگوهاستنا کەیسەکی ژ دادگەهەکێ بۆ دادگەهەکا دی، پرسەکا تەمام دادوەرییە و د تایبەتمەندیێن دەسهەلاتا دادوەریێ دایە و دادگەهێن پەیوەندیدار چارە دکن.
ئەو تشتێ کو پەیوەندی ب هەلوێستێ بڕێز سەرۆکێ هەرێما کوردستانێ ڤە هەیە، ئەم تەکید دکن کو دوور ژ هەموو دەستێوەردان و فشارەکێ، پێدڤییە هەر کەیسەک ب رێیا یاسایی و ل سەر بنەمایێن دروست یێن دادگەهکرنێ بڕێڤە بچیت، و دڤێت دەرفەتا بەرگریکردنێ و پاراستنا مافێ تۆمەتبار و دەستەسەرکریان ل گور یاسایێ یا پاراستی بیت. هەروەسا دووپات دکەین کو دڤێت د دەمێ خوە یێ یاسایی دا و ب پێی ڕێکارێن یاسایی، دادگەهـ بڕیارا خوە ل سەر ڤێ پرسێ یەکلا بکەن.
ل دوماهیێ دووپات دکەین کو سەرۆکایەتیا هەرێما کوردستانێ وەک هەمی دەمان دێ پارێزەرا یاسا و دامەزراوان بیت و پابەندە ب ڕێزگرتن ل بنەمایێ جوداکرنا دەسهەلاتان و سەربەخوەیا دەسهەلاتا دادوەری.
