سهرۆک نێچیرڤان بارزانی و سهرکردهیێن ئیراقێ رهوشا وهلات نرخاندن
برێز نێچیرڤان بارزانی سهرۆکێ ههرێما کوردستانێ، د دویهمین رۆژا سهردانا خوه یا بۆ بهغدایێ دا، تهڤی دیدار و جڤینێن دگهل برێزان؛ سهرۆککۆمار، سهرۆکێ ئهنجوومهنا بلندا دادوهری یا ئیراقێ سهرۆکێ پەرلەمهنتۆیا ئیراقێ ب وهکالهت، شێورمهندێ ئاسایشا نشتیمانی یا ئیراقێ چهندین دیدار و جڤینێن دن دگهل ههژمارهک ژ سهرکردهیێن ئیراقێ ئهنجام دان.
سهرۆک نێچیرڤان بارزانی د دیدار و جڤینێن خوه دا دگهل ههر یهک ژ برێزان؛ سهید عهممار حهکیم سهرۆکێ تهڤگهرا نشتمانی حیکمه، د. عادل عهبدولمههدی سهرۆکوهزیرێ بهرێ و سیاسهتمهدارێ ناڤدار یێ ئیراقێ، سابت عباسی سهرۆکێ ههڤپهیمانیا حهسمی نشتمانی، نووری مالکی سهرۆکێ ههڤپهیمانیا دهولهتا قانوونێ، هادی عامری سهرۆکێ رێکخراوا بهدر، موسانا سامهرایی سهرۆکێ ههڤپهیمانیا عهزم؛ حهیدهر عهبادی سهرۆکوهزیرێ بهرێ و سهرۆکێ ههڤپهیمانیا نهسر، عهبدولساده فرێجی سهکرهتهرێ گشتی یێ ههڤپهیمانیا نههجێ نشتمانی یا ئیراقێ و شێخ خهمیس خهنجهر سهرۆکێ ههڤپهیمانیا سیاده رهوشا ئیراقێ و پرسگرێکێن ناڤبهرا ههولێر و بهغدایێ دا نرخاندن.
سهرۆک نێچیرڤان بارزانی، د ڤان دیدار و جڤینان دا، دوپات کر کو ههرێما کوردستانێ، وهکه ههرتم، ئامادهیه ب دیالۆگ و لههڤتێگهشتنێ و ل سهر ئهساسێ دهستوور پرسگرێکێن خوه دگهل حکومهت و سازیێن فهدهرالی یێن ئیراقێ چارهسهر بکه، ههروهسا ئاشتی و ئارامیا ههرێما کوردستانێ ب بهشهکێ نهڤهقهتیایی ژ ئاشتی و ئارامیا ئیراقێ ب ناڤ کر.
سهرۆک نێچیرڤان بارزانی، ههروها، تەکید ل سهر وێ یهکێ کر کو ژ بۆنا رووبرووبوونا گهف، مهترسی و ئاستهنگیێن رووبروویێ وهلات دبن و چارهسهرکرنا ههموو پرسگرێکێن ئیراقێ پێویسته ههموو هێز و ئالیێن سیاسی یێن ئیراقی ب ههڤ را ههڤکار و ههڤئاههنگ بن و چارهسهرکرنا پرسگرێکێن ههولێر-بهغدایێ ب کلیلا ئاشتی و ئارامیا ئیراقێ و پێنگاڤێن بهر ب پاشهرۆژهکه باشتر و پێشکهفتی ژ بۆ تهڤاهیا ئیراقێ زانی و تهکهز ل سهر گرنگیا بهردهوامیا پهیوهندیێن د ناڤبهرا ههموو ئالیان دا کر.
ژ ئالیێ خوه ڤه، برێزان سهرکردهیێن هێز و ئالیێن ئیراقی پشتهڤانیا خوه ژ بۆ پێنگاڤێن چارهسهرکرنا پرسگرێکێن ناڤبهرا ههولێر و بهغدایێ و دیالۆگا د ناڤبهرا حکومهتا فهدهرال یا ئیراقێ و حکومهتا ههرێما کوردستانێ نیشان دان و سپاسیا خهبات و رۆلا سهرۆک نێچیرڤان بارزانی ژ بۆ چارهسهرکرنا پرسگرێکان و بهردهوامیا سهردان و پەیوهندیێن ب هێز و ئالیێن ئیراقی را دوپات کرن.
دابینکرنا بوودجه و شایستەیێن دارایی یێن ههرێما کوردستانێ، پشتگری ژ بۆ جیبجیکرنا رێکهفتنێن سیاسی و بهرنامهیا حکومهتا ئیراقا فهدهرال، رهوشا ههرێما کوردستانێ و هلبژارتنێن پەرلەمهنتۆیا کوردستانێ، پێشهاتێن ناڤچهیێ ب گشتی و ئهنجامێن وێ ل سهر رهوشا ئیراقێ، مهترسیێن تهرۆرێ، پهیوهندیێن ئیراقێ ب وهلاتێن جیران، ناڤچه و جیهانێ را هندەک مژارێن دن یێن جڤین و ههڤدیتنێن سهرۆک نێچیرڤان بارزانی و سهرکردهیێن ئیراقێ بوون.
