فرەنسا دوستا گەلێ كورد  دوهى و ئەڤرو

پەيوەنديێن هەرێما كوردستانێ دگەل وەلاتێ فرەنسا پەيوەنديێن ديروكى و دێرینن و وەلاتێ فرەنسا دهێتە هژمارتن یەك ژ دوستێن نێزيك بو گەلێ كورد. هەر ژ دەستپێكا خەباتا چەكداريا ملەتێ كورد ل چيان، ل وى دەمى وەلاتێ عيراقێ، ژ بو لێدانا هێزێن پێشمەرگەيێن كوردستانێ، دخواست فروكەيێن جەنگى ژ وەلاتێ فرەنسا بكرە. لێ پشتى نامەك ژ سەركردايەتيا كوردان گەهشتيە وەلاتێ فرەنسا كو د ئەڤێ نامێ دا هاتبوو دياركرن كو ئەڤ فروكە دێ ژلايێ هێزێن عيراقى ڤە ژ بو مەرەما بومبەبارانكرنا گەلەكێ بێ دەستهەلات كو تاوانا وان بتنێ ئەوە داخازا مافێن خو دكە، هێنە بكارئينان، وەلاتێ فرەنسا ئێكسەر بريار دا كو ب هيچ شێوەيەكى فروكەيان نە فروشيتە وەلاتێ عيراقێ.

  هەر ديسان رولێ هەڤژينا سەروكێ فرەنسا  يێ وى دەمى (دانيال ميتران) يا كو بناڤ و دەنگ ب ناسناڤێ (دايكا كوردان) پالپشتى و پشتەڤانيەكا بێ سنور پێشكەشی گەلێ كورد كر.

 وەلاتێ فرەنسا رولەكێ ئێكجار مەزن هەبوو د دەركرنا بريارا ژمارە 688 ل سالا 1991 يا ئەنجومەنێ ئاسايشا ناڤدەولەتى ژ بو دروستكرنا ناوچەيەكا ئارام و دژەفرين ژ بو پاراستنا  هاولاتيێن هەرێما كوردستانێ. هەروەسان د ئێكەم كومبونا پەرلمانێ كوردستانێ ل سالا 1992 ل هەولێرا پايتەخت (دانيال ميتران) ئامادەبوو و دوبارە پشتەڤانيا خو ژ بۆ هەرێما كوردستانێ نیشان دا.

 ل دەما پەيدابوونا گروپێ تيرورستى يێ بناڤێ دەولەتا ئيسلامى ل عيراق و شامێ (داعش) ل سالا 2014ێ،  وەلاتێ فرەنسا د رووبروبوونا ئەڤێ گروپێ تيرورستى دا رۆلەكا گەلەك باش ھەبوو و د ھەموو واران دا پشتەڤانيا هێزێن پێشمەرگەيێن كوردستانێ كر.

 پشتى ئابلوقەيێن جوراوجور ژلايێ وەلاتێ عيراقێ ڤە، ب حێجەتا ريفراندوما سەربەخويا هەرێما كوردستانێ ل سالا 2017  ل سەر هەرێما كوردستانێ هاتينە سەپاندن،  وەلاتێ فرەنسا ژ بو چارەسەركرنا ئاريشەيێن دناڤبەرا هەولێر و بەغدایێ دا سەرۆكوەزيرێ هەرێما كوردستانێ يێ وى دەمى (نێچيرڤان بارزانى) بانگهێشتى پاريسێ كر.

 پپشتی ل 28 ێ گولانا سالا 2019 (نێچيرڤان بارزانى)  وەكی سەرۆكێ نوو يێ هەرێما كوردستانێ ھاتی ھلبژارتن، ب ئاوايەكێ فەرمى ژلايێ سەروكێ فرەنسا (ئيمانوێل ماكرون) ڤە هاتە داخازكرن كو سەردانا فرەنسا بكە  و ل 10ێ تيرمەها 2019 سەردانا پاریسێ كر و ب دانانا ئالايێ هەرێما كوردستانێ ب ترومبێل و جهێ كومبونێ دا، ل كوچكا ئەليزێ ژ ئالیێ سەرۆكێ فرەنسا ڤە هاتە پێشوازيكرن.

ئێكسەر ب ئاوايەكێ رون و ئاشكەرا وێنەيێ دوپاتيا پەيوەنديێن هەرێما كوردستانێ د گەل وەلاتێ فرەنسا بو مە دهێتە پێش كو ئەڤ پەيوەنديە دبەردەوامن و د پێشڤەبرن و گەشەكرنێ دانە.

كاروانێ دپلۆماسیێ سەروكێ هەرێما كوردستانێ (نێچيرڤان بارزانى) د بهێزكرنا پێگەهێ هەرێما كوردستانێ د مەيدانا ناڤدەولەتى دا د بەردەوامبوونێ دايە.

ئاشتى فەتحى بێسفكى

2019.07.11

نێرین / شیرۆڤە