دەقێ ڕاگەهاندنا پەیڤدارێ پارتییا دیموکرات یا کوردستانێ
وەلاتیێن خوەشتڤی
ژ سۆنگەها هەستکرنا مە ب بەرپرسیارەتییا نەتەوەیی و نیشتمانی، و د هەمان دەم دا بۆ ڕێگریگرتنێ ژ چەواشەکارییێ و ئاشکراکرنا ڕاستیان بۆ مێژوویێ، مە ب باش دیت کو بەرسڤا پشکەک ژ ئاخافتن و چەواشەکاریێن پەیڤدارێ ئێکەتییا نیشتمانی یا کوردستان بدەین، یێ کو ل دویڤ کۆبوونا سەرکردایەتیا حزبا خوە ل ڕێکەفتی ٢١ێ حوزەیرانا ٢٠٢٦ێ بۆ کەناڵێن ڕاگەهاندنێ ئاخفتی، مەبەستا مە ئەوە ڕاستیان بۆ خەلکێ خوەڕاگر و تێکۆشەرێ کوردستانێ ڕابگەهینین.
پشتی هەلبژارتنا خولا شەشێ یا پەرلەمانێ کوردستانێ، ل دەمەکێ کو پارتییا مە سەرەدان و دانوستاندنێن خوە چڕ کربوون بۆ کاراکرنا پەرلەمانی و پێکئینانا کابینەیا نوو، ئێکەتیێ دەست ب کوشتنا دەمی کر بۆ هەلنەبژارتنا دەستەیا سەرۆکاتییا پەرلەمانی و پێکنەئینانا کابینەیا دەهێ. چونکی د ناخێ خوە دا باوەری ب پرۆسەیا دەنگدان و هەلبژارتنێ نینە، لەوما کەفتنە ڤەدیتنا بهانەیان و ب ئاشکرایی ژی هەست پێ دهاتە کرن کو دهێنە پشتەڤانیکرن بۆ ڤان ڕەفتار و مەرامێن خوە، سەرۆکێ ئێکەتییێ ژی ئەڤ چەندە ڤەنەشارت و ل بەرچاڤێن خەلکی ڕاگەهاند کو ئەو دگەل پێکئینانا دامەزراوەیێن شەرعی نینە.
پەیڤدارێ ئێکەتییێ دڤیابوو ئاماژێ ب ژمارەیا دەنگ و کورسیێن خوە و یێن پارتی بکەت ل هەردو هەلبژارتنێن پەرلەمانی و جڤاتا نوێنەرێن عێراقێ، وێ دەمێ دا دیار بیت کا ئەم وەک پارتی نوێنەرایەتییا چەند ژ خەلکێ کوردستانێ دکەین و ئەو ژی نوێنەرایەتییا چەندێ دکەن. شایستەبوونا هەلبژارتنێ ل سەر وی شەرعیەتێ خەلک ددەتێ دهێتە پیڤان، نە ل سەر درۆشم و نەڕاستیان، خەلکێ کوردستانێ باوەری دایەڤە پارتی چونکی ژێ پشتڕاست بوون کو دێ دەستکەفتێن وان پارێزیت.
ئێکەتی ب هەمی تێبینیان ڤە ژی خودانێ (٢٣) کورسیێن پەرلەمانی یە، ل دەف خەلکێ کوردستانێ ڕوونە کو بوویەرا کارەساتبار یا لالەزار و زیندانیکرنا کەسێ ئێکێ یێ لڤینا نەوەی نوێ ژ بەر چ بوون، ئەڤ بوویەرە و کۆمەکا بوویەرێن دی یێن ب ڤی ڕەنگی نە کو پەیڤدارێ ئێکەتییێ شانازیێ پێ دکەت و وەسا دزانیت خەلکێ کوردستانێ ئەڤ ڕووداوێن شەرمزارکەر ژبیرکرینە! کوردستانی گەلەک ژ هندێ هۆشیارتر و زاناترن کو ب ڕێزکرنا چەند پەیڤ و ڕستەیێن تژی چەواشەکاری باوەریێ بکەن.
پارتی ب بەرپرسیارەتی ڤە بەرامبەر ڕێباز و خەباتا خوە یا نەتەوەیی و نیشتمانی و ژ ڕوانگەها خەمخۆریێ بۆ بەرژەوەندیێن وەلاتیێن کوردستانێ و پاراستنا ماف و دەستکەفتان، یێن کو ب خوین و خەباتا چەندین سالان ب دەست هاتین، چاڤپۆشی ژ گەلەک هەلوێستێن بووری و یێن نوکە یێن ئێکەتیێ کریە، بەلێ پێدڤییە ئەڤێ ژی بۆ وان ڕاست بکەینەڤە دەما کو دبێژن ئێکەتی سازشێ ل سەر مافێن خەلکێ کوردستانێ ناکەت، ڕاستییا وێ ئەوە کو بتنێ ئێکەتی یە مافێ خەلک و دەنگدەرێن کوردستانێ پێشێلکری و بوویە ڕێگر ل هەمبەر پرۆسەیا دیموکراسی و کاراکرنا پەرلەمانی. ئێکەتی بتنێ نوێنەرایەتییا دەنگدەرێن خوە دکەت، ئەو لایەنێ کو نوێنەرایەتییا ڕاستەقینە و یا پرانییا خەلکێ کوردستانێ دکەت پارتییا دیموکرات یا کوردستانێ یە، ئەڤە ژی باوەری و بڕیارا خەلکی یە، لەوما پارتی چو جاران سازشێ ل سەر ماف و داخوازێن کوردستانیان ناکەت و دێ مافێن وان پارێزیت.
ئێکەتی ل سەر زارێ پەیڤدارێ خوە بەحسێ بالبالانێ دکەت! پا باش ئەوە کو ئێکەتی د بکارئینانا هندەک چەمکێن نەدجهێ خوە دا خوە د بەرچاڤان را دەرباس بکەت، چونکی بەرسڤنەدانا پارتی سنوورێ خوە هەیە، سروشتێ پارتی وەهایە کو ئێک ڕێبەر و ئێک بڕیار و ئێکگرتییە، و هەر وەسا ژی دێ مینیت ل هەمبەر ئالۆزی و پیلانێن وان و یێن وان کەسان ژی یێن کو ل پشت وان بووین، هەر لەوما ژی پارتی سەرکەفتی بوویە و ئێکەتی ژی گەهشتییە ڤێ ڕەوشا خوە یا نوکە، مێژوو ژی شاهدە ل سەر ڤی بابەتی.
ئاخافتنا ڕاست یا پەیڤدارێ ئێکەتیێ ئەو بوو دەما دبێژیت “سیاسەتا خۆسەپاندنێ زیانێ دگەهینیتە هەرێما کوردستانێ” ئەڤە ئێکەتییە دڤێت ب زۆرداری و بێی گوهدانە دەنگ و ڕایێ خەلکێ کوردستانێ خوە ب سەر ئەنجامێن هەلبژارتنان دا بسەپینیت و چو حسابێ بۆ دەنگ و ژمارەیا کورسیێن لایەنان نەکەت.
ئەم ل پارتییا دیموکرات یا کوردستانێ، هەموو کوردستان و کوردستانی ل دەف مە عەزیزن و مە دڤێت خزمەتا وان بکەین، ئەڤە ئێکەتییە جوداکاری دروستکری و ناهێلیت یاسا و ڕێنماییێن کارگێڕی (ئیداری) و دارایی و پرۆژەیێن حکومەتا هەرێمێ ل هەموو سنوورێ کوردستانێ بهێنە بجهئینان.
ئەم هیڤیخوازین ڤان ڕەفتارێن خوە بگوهۆڕن و ئێدی پشکەکا گرنگ و یا عەزیز یا هەرێما مە نەکەنە بارمتە بۆ بجهئینانا مەرامێن خوە، ئێدی نەبنە ئەگەرێ نیگەرانیێ، و ئێکپارچەییا هەرێمێ و قەوارەیێ وێ و ماف و دەستکەفت و سەقامگیرییا خەلکێ کوردستانێ ل بەر چاڤ بگرن، و ئێدی نەیار و دوژمنێن گەلێ مە دلخۆش نەکەن.
مەحمود محەمەد
پەیڤدارێ پارتییا دیموكرات یا كوردستانێ
٢٢ێ حوزەیرانێ ٢٠٢٦
