پۆستێ سەرۆککۆماریێ و شوورێ تووژێ شیعە و سونەیان

نڤسینا: ھۆگر نێروەیی

دەما تە ئاریشە و گرفتەک یان نەخۆشیەک ل ناڤ مالا خوە ھەبە، تو و برا و ئەندامێن دن یێن خێزانێ ب ھەڤرا نەڕینن  و دیالوگێ نەکەن و نەگەھنە چارەسەریێ، ھەڤسو و خەڵکێ دن قەد ئاریشا وە چارەسەر ناکەن. ھەر دەما دەستێن خەڵکێ دن ھاتنە ناڤ ئاریشەیێن ماڵێ دا، ئەگەر ب سەرڤە ژی چارەسەر بکەن،  لێ د ناڤەروک دا نە ھەر چارەسەر نابیت بەڵکی ئاریشەیێن وە دێ مەزنتر بن، پاشان دێ بێباوەری دروست بیت، دەما بێباوەری بۆ کولتور ژی بچووکترین ئاریشە ل ناڤ مالا وە دا دێ ڕۆژ ل دووڤ ڕۆژێ مەزن و مەزنتر بیت، ھەیا وی ڕادەی ئەندامێن خێرانێ دێ بنە بیانی، رەفتار و سەرەدەریا وان دێ یا بیانیا بیت دگەل ھەڤ، ئێدی تمامی ئەو خێزان دێ ھێتە ھەلوەشاندن و جارەکا دن نابیتە ئێک خێزان ڤە.

پۆستێ سەرۆککۆماریێ وەک عورفەک ژ سالا ٢٠٠٥ ێ وەرە ب کوردان هاتیە دان (سەرۆکوەزیر ژ بۆ شیعەیان، سەرۆککۆمار ژ بۆ کوردان و سەرۆکێ پەرلەمەنتۆیێ ژی ژ بۆ سنەیان)، شیعە و سونە چو منەتا ناکەن کو دەنگی ب کاندیدێ کوردان بدەن، و د ڕاستی دا کەس ب قاسی شیعە و سونان ناخازن کو کورد ناکوک و ئێک دەنگ نەبیت ل سەر پۆستێ سەرۆککۆماریێ، پشتەڤانیا بەرەیەکێ شیعە و سونە بۆ کاندیدەکێ کورد بەرەیەکێ دن بۆ کاندیدەکێ دن حەژێکرنا وان نینە بۆ وان پارتیا بەلكو ئەوان بەرژەوندیا خوە ھەیە چو تشتان نادەن بێ بەرامبەر! نە بتنێ ئەو ناخوازن ئاریشەیێن کوردان چارەسەرنەبن بەڵکی دێ بەنزینێ ژی ب ئاگری داکەن بۆ ھندێ کو  ئاگرێ کوردان زێدەتر مەزن بە و ب ساناھی نەھێتە ڤەمراندن.

سەرۆککۆمار دەسھەلاتێن وی سنوردارن، دەسھەلاتێن گەلەک نینن لێ ئێکدەنگیا پارتیێن کوردی  ب تایبەتی ڕێکەفتنا ستراتیژیا پەدەکێ و یەنەکێ ل سەردەمێ خودێژێرازی کاک (جەلال تاڵەبانی) تا ڕادەیەکێ ئەو پوست دکاری دەسھەلاتان بکاربینیت و بەرژەوەندیێن گەلی کوردستانێ ل گۆرەی دەستورێ بپارێزیت، لێ گەر کورد ئێک دەنگ  و ئێک ڕێز نەبن ب ھەڤرا ل سەر کاندیدەکێ رێکنەکەڤن ل شوونا کاندیدەکێ چەند کاندید ھەبن وی دەمی پۆستێ سەرۆککۆماریێ دێ نوێنەراتیا پارتیەکا دیارکری کەت نەیا کوردان، چونکە سروشتێ ئیراقێ ب گشتی و ھەرێما کوردستانێ ب تایبەتی وەھایە باوەریا تمام ب سیستەما دەموکراسیێ و پروسێسا ھەڵبژارتنان نینە ئەگەر ڕێکەفتنا پێش دەم نەبیت، چونکە ل ڤی وڵاتی ھەر تشت ب ڕێکەفتنا دھێنە کرن نە ب ھەلبژارتنان، دەما پارتیێن کوردی ب نوێنەرێ خوە نەزانن پشتگیریێ لێ ناکەن، دەما پشتگیریا کوردان نەبە ب تنێ پشتگیریا پارتیەکێ ھەبە ب تنێ دێ پۆستی پڕ کەت نەبتنێ مفا ژ بۆ کوردان نابە مینا خولا دن دێ زیان ژی ھەبە بۆ کوردان چونکە ب دەنگێ کوردان دەرناچە ب دەنگێ خەڵکێ دن دەردچە، ئەڤەژی دێ بیتە سەدەم کو ھەم ناڤمالا کوردی تێکبدەت، ھەم دێ نەیارێن کوردان ژی باندۆرا خوە  ل سەر ھەبە و دێ کونترۆل کەت و ژ بۆ  بەرژەوەندیێن خوە ئاراستە کەت، وی دەمی سەرۆککۆمار نکاریت ل سەر چو پێشیلکاریان و ل سەر مافێن کوردان بھێتە دەنگ.

گرنگە پارتیێن کوردی بەریا بچنە بەغدایێ ل ھەڤلێرا پایتەخت کوم ببن، ھەڤلێر پایتەختێ ھەرێما کوردستانێ یە و مولکێ چو پارتیان نینە، بەڵکی پایتەختێ تەڤ کوردانە  نە بتنێ پایتەختێ کوردێن باشوورە بەڵکی پایتەختێ کوردێن پارچەیێن دن یێن کوردستانێ یە بەریا کوردێن باشوور، لەوما گرنگە کورد بەریا ئاریشەیێن خوە ببنە ناڤ پایتەختێن وڵاتێن دن و خوە ب کێم بزانن، ل پایتەختێ خوە کومببن، کورد دکارن ھەڤلێرێ بکەنە پایتەختێ دیالوگێ بۆ تەڤ پرس و ئاریشەیێن کوردان، ئاریشەیێن کوردان د مەزن نینن  ب تنێ بێ باوەری ھەیە د ناڤبەرا پارتیێن کوردی دا، ئەگەر ب تنێ ئێک گاڤا کوردایەتیێ، نەیا پارتایەتیێ، ب ھاڤێژن بێ باوەری نامینیت، وی دەمی ب ساناھی دێ ئاریشەیێن کوردان چارەسەر بن، ل نیڤا رێکێ یان داویا رێکێ ژی بزڤری باشترە ھەر نەزڤری. 

ب ئومێدا ڤان چەند رۆژێن مایی بەریا دەنگدانێ ل سەر پۆستێ سەرۆککۆماریێ کورد ل ھەڤلێرێ کاندیدێ خوە ئێکلایی بکەن و نەبەنە بەغدایێ ژێر رەحما شیعە و سونان کو چو جاران وان ڕەحم بۆ کوردان نەبویە. 

شیعە و سونان ب درێژاییا دیرۆکێ ھەردەما لاواز بن بانگەوازیا براتیا کوردان و عەرەبان دکەن لێ دەما بھێز دبن  ب تنێ ب شووری دپەیڤن و ھەردەم شوورێ وان یێ تووژە بۆ بڕینا سەرێ برایێ خوە یێ کورد.

نێرین / شیرۆڤە