پەرلەمانێ بێ ئاگەھ

نڤیسینا: سەردار هێتوتی

ب ناڤ سازیەکا یاسادانان و چاڤدێریێ یە، ڕێک ب ڤاڵاهیێن یاسایی نادە   و ل گۆر دەمی بریارا دەردکە یان ژی هەموار دکە، لێ ئەڤ پێناسە پەرلەمانێ کوردستانێ ناڤەگرن، چونکی ناڤەندەکا مت و بێ دەنگە و یاسادانان نە خەما وانە، ب تنێ ناڤە و وەک کارتونێ یە، کارێ وان یێ پێشین ڤەبرینا موچێن وان یێن خانەنشینیێ نە، کار دکەن کو سەپاندنا هەیمەنەتا حزبێن سیاسی ل سەر کارێ پەرلەمانی و باشترین دیوان و جڤاتگەها عەشیرانە.

 پەرلەمانێ کوردستانێ کو دڤێت ل سەر داهاتێ نافخوە، خالێن گۆمرکێ، سندوقا داهاتێ نەفتێ و بوریا نەفتێ و گازێ یێ ب ئاگەهـ بە، لێ بەرۆڤاژی، ھەتا نوکە ژی ل سەر داهاتێ کوردستانێ بێ ئاگەهن.   وەک ئێک ژ سیاسەتمەدارێن کوردستانی د دەمێ بوری دا دایە دیارکرن کو “بێی هەبوونا جڤاتا وەزیران و پەرلەمانی ژی ئەڤ وەڵاتێ ب ناڤێ هەرێما کوردستانێ دشێت بڕێڤە بچە”.

 ئەگەر ئەم ھزرا خوە د گۆتنا وی سەرکردێ سیاسی دا بکەین دێ ب زەڵالی دیار بە کو مە چ ناڤەندێن چاڤدێریێ نینن کو بشێن مافیایان ڕاوەستینن و وان ببنە بەر دادگەهان.

 هێشتا دیار نینە کانێ چ حکمەت د ھەبوونا ڤی پەرلەمانی دا هەیە، یان ژی دبە كو باشیا وی ب تنێ کێمکرنا بارێ داخوازیێن سەروکعەشیران و کورێن عەشیران بە ل سەر ملێ هندەک سەرکردێن سیاسی کو چەندەک ژ نڤشێ وان ب ڕێکا ئەندامەتیا پەرلەمانی دەوڵەمەند بکەن، چونکی د مەها بوری دا دیاربوو کو ب تنێ چەند دانە کەسەک ژ پەرلەمانتاران ژ کۆما چارسەدان، دەست ژ مۆچێ خانەنشنیێ بەردایە و یێن مای نەشێن وێ خوارنا پڕی ڤیتامین ژ دەست بدەن.

 لەورا ژ ئەڤڕۆ پێڤە دڤێت داخوازا مە نەهێلانا خانەنشینیا پەرلەمانتاران و کێمکرنا هژمارا وان  ژ سەدویازدان بو سیهـوپێنجان بە و نابە .مەزناتیا ڤێ ناڤەندێ بکەڤیتە ژێر لنگێن هندەك ڕێڤەبەرێن نەزان

2020.08.08

نێرین / شیرۆڤە