ھەبوونا شەر ھەبوونا پەكەكێ یە

پارتیا كاركەرێن كوردستانێ (پەكەكە) نكارە ژیانا خوە یا سیاسی د رەوشەكا ئارام، د رەوشەكا ئاشتی و ئیستیقرارێ دا بەردەوام بكە و پێشبكەڤە، ژبۆنا كو ئەو بكاربە بەردەوامیێ ب كاروانێ خوە یێ سیاسی بدە ژیانا وێ یا سیاسی قوت نەبە ، دڤێ ئەو ھەرگاڤ و دەم د ناڤ شەر و پەڤچوونان و د ناڤ رەوشەكە تژی ئالۆزی، پرسگرێك و تەڤلی ھەڤیێ دا بە.

دەما بەریا چەند سالان پێڤەژۆیا ئاشتیێ ل باكورێ كوردستانێ دەست پێ كر، ھەر چ قاس ئەم ھەموو دزانن كو ئەو نە دانپێدانا ھەموو مافێن رەوایێن گەلێ كوردستانێ بوو، لێ ژبۆ ھینگێ ئەو دەستپێكا پرۆسەسەكا درێژ بوو و دەستپێشخەریەكە باش بوو ژ ئالیێ حكومەتا تركیێ ڤە. د ناڤا وان سالێن پێڤەژۆیا ئاشتیێ، پێڤاژۆیا چارەسەریێ  و بێدەنگبوونا چەكان دا، رەوشا باكورێ كوردستانێ ئاسایی بوو، خەلكێ بێھنا خوە دا، ئابورویا دەڤەرێ باشتر بو حكومەتێ دەست ب ھندەك پرۆژەیان كر، باكورێ كوردستانێ، ب گشتی د ھەموو واران دا، ب تایبەتی د وارێ ئابوری و جڤاكی دا گەشبوونەك ب خوەڤە دیت.

پەكەكێ ھەست پێ كر كو ئێدی رۆلا وێ رۆژ بۆ رۆژێ لاواز دبە، باندۆر و تەسیرا وێ ل سەر خەلكێ باكورێ كوردستانێ كێم دبە، ئەڤ رەوش نە ل گور دلێ قەندیلێ بو و لێخەبتین كو پێڤاژۆیا ئاشتیێ تێك بدن، ژناڤ ببن. چەكدارێن پەكەكێ ب كوشتنا دو پۆلیسێن تركیێ پێڤاژۆیا ئاشتیێ بەرئاڤێتی كر و جارەكە دن دەنگێ چەكان بلند بوو و دەنگێ ئاشتیێ قوت بوو.

ھەردەما فۆكۆس ل سەر پەكەكێ نەمینە دەست ب چێكرنا تەڤلیھەڤیان دكە ژ ئالیەكی دا كو فۆكۆس بكەڤە سەر پەكەكێ و ژ ئالیەك دن ڤە داكو بازرگانیا خوە د بن پەردا شەری دا بەردەوام بكە.

ھەیامەكی ھەدەپە ل باكورێ كوردستانێ باش پێشدە چوو و رۆلا سەلاحەدین دەمیرتاش د ناڤ جەماوەرێ پەكەكێ و ھەدەپێ دا بلند بوو، ھەتا دەولەتێن یەكێتیا ئەورۆپایێ ژی پەسنا رۆلا دەمیرتاش كرن و رۆلا وی باش دھات نرخاندن. قەندیلێ ھەست پێ كر كو رۆلا وان كێم دبە و رۆلا دەمیرتاش بلند دبە. ژبۆنا كو پەكەكە حسارا ل سەر خوە بشكینە، خوە ئیسپات بكە، چ كر؟ پەكەكێ دەست ب شەرێ ناڤا باژارێن باكورێ كوردستانێ كو، ب “شەرێ خەندەكان” تێ ناسكرن، كر. ئارمانج ژ ڤی شەرێ خەندەكان جارەكا دی قەندیل خوە وەكە ھێز و ئالیێ پەكەكێ یێ سەرەكە نیشان بدە، رۆلا ھەدەپێ و سەلاحەدین دەمیرتاش بێ قیمەت بكە. ژبۆنا ڤان دەستكەفتیێن پووچ و ڤالا چەكدارێن پەكەكێ باژارێن كوردێن وەلاتپەروەر وێران كرن، خەلكێ وان دەربەدەر و پەریشان كرن و ب دەھان جوانێن كورد د وی شەرێ بێ مەعنا دا ژیانا خوە ژ دەست دان. ئەڤ ھەموو ژ بۆ چ؟ نە ژ بۆ بەرژەوەندیا كوردان بوو، نە ژ بۆ بدەستخستنا مافێن گەلێ كورد بوو، ب تەنێ داكو پەكەك بێژە ڤایە ئەز ھەمە.

د ڤان ھلبژارتنێن داویێ دا، ب تایبەتی د ھلبژارتنا سەرۆكشارەدارێ ستەنبۆلێ دا، چەند پەیامێن سەرۆكێ زیندانكریێ پەكەكێ عەبدولا ئۆجەلان ل سەر ھلبژارتنان ژ رایا گئشتی را ھاتێن ئاشكەرا كرن. د ھەمان وەخت دا سەلاحەدین دەمیرتاش ژ زیندانێ چەند پەیام ل سەر وان ھلبژارتنان وەشاندن. د وان پەیامان دا ھەلوەستا دەمیرتاش و ئۆجەلان ھەڤدژ بوون. دەمیرتاش پشتەڤانیا جەھەپێ و ئۆجەلان ژی پشتەڤانیا ئاكەپێ دكر. قەندیلێ ژی ھەلوەستا خوە یا تیابەت ھەبوو. ڤان ھەلوەستێن جودا و ھەڤدژ ناكۆكیێنن ناڤا پەكەكێ زێدە و كوور كرن.

ئھا د ڤێ دەمێ دا، ژ بۆنا ڤەشارتنا ناكۆكیێن خوە، سەرۆكاتیا پەكەكێ ل قەندیلێ دامەزراندنا ھێزا ب ناڤێ “ھێزا پاراستنا جەوھەرێ باشوورێ كوردستانێ” راگەھاند. ب راگەھاندنا ڤێ ھێزێ، قەندیلێ خوەست ھەم ناكۆكیێن خوە ڤەشێرە و ھەم ژی جارەكا دن بالێ بكشینە سەر خوە  كو ھەی و نەیێ نە دەمیرتاش و نە ئۆخەلانە، ب تەنێ قەندیلە.     

2019-07-10

نسرەت حاجی

نێرین / شیرۆڤە