بولدان و سانجار وەک هەڤسەرۆک نامینن
ھه‌ڤسه‌رۆکێن ھه‌ده‌پێ په‌رڤین بولدان و میتحات سانجار ته‌ڤلی به‌رنامه‌یه‌کا ته‌له‌ڤزیۆنا په‌که‌کێ بوون و بەحسا پاشه‌رۆژا خوه کر.
سانجار گۆت: “د کۆنگره‌یا بهێت یا هەدەپێ دا، ئه‌م نابینه به‌ربژێرێن ھه‌ڤسه‌رۆکاتیێ. مه بریار دا کو ئه‌م د کۆنگره‌یێ دا ئه‌رکه‌ک نوو وه‌رنه‌گرن. ئه‌م دێ ئه‌رکا خوه‌یا ھه‌ڤسه‌رۆکاتیێ ژ بۆی ھه‌ڤالێن دن بھێلن”.
تێ زانن کو د پێڤاژۆیا ھلبژارتنان دا ڤێ جارێ ژ سەرۆکاتیا ھه‌ده‌پێ پێتر راسته راست قه‌ندیل که‌ت د ناڤا بازاران دا و گه‌له‌ک ڤه‌کری پێ ل سه‌ر بولدان و سانجار دانا. لێ وان نه‌وێریان ده‌نگ ده‌رخن و نھا ژی جارده‌ک دن ب ده‌ستیریا قه‌ندیلێ دخوازن بچن. د پێڤاژۆیا ھلبژارتنان دا د ناڤا ھه‌ده‌پێ دا، تایبه‌تی د ناڤا کوردێن وه‌لاتپارێزێن د ناڤا ھه‌ده‌پێ دا، گه‌له‌ک ره‌خنه ل ڤان ھه‌ر دو ھه‌ڤسه‌رۆکان ھاتنه گرتن. ژ به‌ر کو ئەو ب ته‌مامی بێ ئینسیاتیف بوون. ھه‌ده‌پێ بێ قه‌ید و شه‌رت، یان ژی ب بازاره‌ک ڤه‌شارتی، پشتگریا کلچدارۆغلو کر. ژ بۆ ڤێ ژی گه‌له‌ک که‌سان د ناڤا ھه‌ده‌پێ دا ئه‌ڤ یه‌ک پرۆته‌ستۆ کر و ژ بۆ کلچدارۆغلو نه‌چوون سه‌ر سندۆقان و ده‌نگ نه‌دان.
د ده‌مه‌کی ھه‌ده‌پێ داخویاکرن کو ئه‌و دخوازن ژ بۆ سه‌رۆکۆماریێ کاندیدێ خوه ده‌رخن. سه‌ردانا ده‌میرتاش کرن و پشتی سه‌ردانێ به‌رپرسێن ھه‌ده‌پێ گۆتن: “ئه‌م چوون سه‌ردانا ده‌میرتاش مه پێشنیار کر کو ئه‌و ببه کاندیدێ ھه‌ده‌پێ یێ سه‌رۆکۆماریێ. لێ وی قه‌بوول نه‌کر”.
پشتی ھلبژارتنان ده‌ما ده‌میرتاش داخوویاکرن کو ئه‌و دێ ده‌ست ژ سیاسه‌تا چالاک به‌ردە، وی گۆت: “من پێشنیا کر کو ئه‌ز ببم کاندیدێ سه‌رۆکۆماریێ، لێ ھه‌ده‌پێ قه‌ت به‌رسڤه‌ک نه‌دا من”. گەلۆ نھا کی راست دبێژه؟ کی ده‌ره‌وان دکه؟ ناهێت زانین. لێ ب زەلالی ئاشکه‌را بوو کو ھه‌لوه‌ستا ھه‌ده‌پێ یا ژ کورداتیێ دوور بوو ئەگەرەک کو ڤێجارێ بنگه‌ھێ ھه‌ده‌پێ ده‌نگێ خوه بلند بکه. د مه‌دیایا جڤاکی دا به‌شه‌ک ژ ھه‌ده‌په‌ئیان ب ده‌نگێ بلند داخواز دکران کو بولدان ژ ھه‌ڤسه‌رۆکیێ دوور بکه‌ڤه.
نھا ژی بولدان و سانجار ھه‌ولددن کراسه‌کی ژ بۆ چووینا خوه که‌ر بکن. د به‌رنامه‌یا ته‌له‌ڤزیۆنی دا بولدان گۆت: “د وێ داخویانیا مه رۆژا پشتی ھلبژارتنێ دایی دا، مه راگەھاند کو ئه‌م دێ پارتیێ ببن کۆنگره‌یێ. ژ به‌ر کو ئارمانجێن مه پێک نه‌ھاتن، پارتیا مه پشتی ھه‌ڤدیتنێن دگه‌ل کۆمیته‌یێن مه دێ چیت کۆنگره‌یێ. د ھه‌ر قۆناغه‌کا ڤێ تێکۆشینێ دا ئه‌ز ئاماده‌مه کو تشتا بکه‌ڤیته ل سه‌ر ملێ من پێک بینم، لێ ب به‌رچاڤگرتنا ھه‌موو ره‌خنه‌یان، ئه‌ز دێ د ڤێ کۆنگره‌یێ دا پۆستا ھه‌ڤسه‌رۆکاتیێ ب سه‌ربلندی بدم ھه‌ڤاله‌کی خوه‌یێ دن. د پێڤاژۆیا کۆنگره‌یێ دا ئه‌ز به‌شداری چو مه‌کانیزمایێن بریاران نابم. د ڤێ قۆناغێ دا به‌رپرسیاریا مه ھه‌یه کو ئه‌م حه‌ساب بدن. ئه‌م ھه‌ما یه‌کسه‌ر ناچن ئه‌م دێ پێشی حه‌سابێ بدن. ئه‌م دێ ل ھه‌مبه‌ری گه‌لێ خوه، ل ھه‌مبه‌ری ده‌نگدێرێن خوه و ل ھه‌مبه‌ری ژنان حه‌ساب بدن. ب من مژارا ھه‌ری گرینگ ئه‌ڤه.
ژ ئالیێ دن ڤه سانجار د ده‌ربارێ ھه‌لوه‌ستا ده‌میرتاش دا گۆت: “ده‌میرتاش ھه‌ڤال و رێھه‌ڤاله‌کی پر ھێژایه. نه تشته‌که کو ئه‌م راست ببینن کو ئه‌م نیه‌تا وی بپرسن. مه سه‌ردانا ده‌میرتاش کر، گۆت ئاسته‌نگیا وی یا یاسایی ھه‌یه و پشتره ژ چاپه‌مه‌نیێ را گۆت. پاشی ئه‌م چوون کاندرایێ و مه پێشنیارێن فیگه‌ن یوکسه‌کداگ و گولتان کشاناک وه‌رگرتن. وان پێشنیار کرن کو ئه‌گه‌ر به‌ربژێره‌ک ژ بۆ سەرۆکۆماریێ ھه‌به، بلا ژنه‌ک ببه به‌ربژێر. مه ئه‌ڤ پێشنیار د کۆمیته‌یێن خوه دا گۆتووبێژ کر. د خالا داوی دا مه‌یلا ده‌رخستنا ژنه‌کێ ھه‌بوو. ئه‌ڤ یه‌ک ژ ده‌میرتاش را ھات راگەھاندن و وی ژی گۆت کو ئه‌و پشتگری دده ڤێ فکرێ.”
وەکی دیار ئێدی ھنده‌ک تشت ژ کۆنرۆلا قه‌ندیل ژی ده‌ردکه‌ڤه. کوردێن وه‌لاتپارێز یێن د ناڤا ھه‌ده‌پێ دا ڤێجا یاریێن ل سه‌ر چاره‌نووسا کوردا تێن کرن دبینن و نھا ژی ھه‌ولددن ژ چه‌پێن مارژینالێن ترک ب ئاوایه‌کی ھه‌ده‌پێ دوور بخن. د پاشه‌رۆژێ دا ئه‌م دێ ببینن کا گه‌لۆ ئه‌ڤ خه‌لکێ دۆزا گوھه‌رتنان دکن، دێ بێنه ته‌سفییه کرن یان ھه‌ده‌په، پیچه‌ک ژی بە، به‌ر ب کورداتیێ ڤه بچه.
لێ چ ببه بلا ببه گۆتنەکا که‌ڤنارا کوردا دبێژه: پشتی ترێ ……..فایده ناکه
