سیاسی

داگیرکه‌رێن مه‌ نها د ناڤا لیستکه‌ک نوو دا نه‌

نڤیسین: بوبێ ئه‌سه‌ر

ب قاسی دخوینم، دشۆپینم و دزانم، نها داگیرکه‌ر د ناڤا حازریه‌ک و چالاکیێن مه‌زن دانە کو ب ڕێیا ئۆلا ئیسلامێ ئانگۆ ب ڕێیا مسلمانتیێ دۆزا کورد و کوردستانێ تێک ببن. دڤێ کورد د ڤی واری ده‌ شیار بن.

ژ به‌ر کو نها گه‌له‌ک ژ مسلمان و ئۆلدارێن کورد ژی که‌تنه‌ ناڤا وێ چالاکیێ و مه‌سه‌له‌یا خوه‌ یا نه‌ته‌وه‌یی دایە پاش. ڕێخسن و پارتیێن مه‌، ڕه‌وشه‌نبیر و ڕۆناکبیرێن مه‌، نڤیسکار و وه‌لاتپارێزن مه‌، ب گه‌له‌مپه‌ری د ڤێ مژارێ دا بێ ده‌نگن. که‌تنا ڕه‌وشا ”مارێ ب من ڤه‌نه‌ده‌ بلا هه‌زار سالا بژی”.

لێ فێم ناکن و نزانن کو وێ ڕۆژه‌کێ ئه‌و مار ب وان ژی ڤه‌ده‌. هه‌گه‌ر تو ژ نها دا نه‌بی خوه‌دیێ خوه‌ و ل هه‌مبه‌ر ڤێ ڕه‌وشا نوو کو داگیرکه‌رێن مه‌ ل سه‌ر ناڤێ مسلمانتیێ کوردان دخاپینن و وان دکن دژمنێ گه‌لێ وان، نه‌ ھشیار بی، سبێ تێ نکاربه‌ تشته‌کی بکه‌.
هه‌لبه‌ت باوه‌ریا ئۆلی و ب کارانینا وێ دو تشتێن ژ هه‌ڤ جوودا نه‌. دڤێ مرۆڤ بزانبه‌ کو ل ڤێ جیهانێ هه‌ر مرۆڤ، جڤات و قه‌وم ژ ئۆله‌کێ ژ دینه‌کی باوه‌رن. له‌ورا دڤێ مرۆڤ ژ باوه‌ریا هه‌رکه‌سان ڕا حورمه‌ت بگره‌.

حورمه‌تگرتن هه‌تا وێ رادەیێ کو ئه‌و ئۆل ئانگۆ دین ل دژ نه‌ته‌وه‌یا ته‌ ده‌رنه‌که‌ڤه‌، هه‌بوونێن ته‌، وه‌که‌ تو باوه‌ر دکه‌ی قه‌بوول بکه‌ و ب دارێ زۆرێ ب حوکمێ کوشتنێ یا خوه‌ ب ته‌ نه‌دا قه‌بوولکرنێ، دڤێ حورمه‌تا وێ بێ گرتن.

ژ به‌ر کو باوه‌ریا ئۆلی تشته‌کی وه‌ها کو تو نکاره‌، ل گۆر دیتنا خوه‌، ل گۆر باوریا خوه‌ ب ئۆلداران ڕا بکه‌ڤی موناقه‌شه‌یێ. ژ بۆنا وان بەھەشت و 70حۆری گرینگ و ژ بۆنا خوه‌ بگهێژینن وێ ژ بۆنا وان هه‌ر تشت موباهه‌. ئانگۆ ڕاست و دوروسته‌.

له‌ورا ژی ده‌ما ئه‌م ل دیرۆکا خوه‌، ل دیرۆکا گه‌لێ خوه‌ دنێرن ئه‌م دبینن کو داگیرکه‌رێن مه‌ ژ بۆنا مه‌ کوردان وه‌که‌ کۆله‌ و خولامێن خوه‌ بهێلن هه‌ر جار، هه‌ر گاڤ و هه‌ر تم ئۆل ب کارانینه‌. ب ڕێیا ڤێ ئۆلێ کوردستان وێران و گه‌لێ مه‌ ژی قر کرنه‌.

هه‌ر چقاسی ده‌مه‌کێ ئه‌ڤ کار دانه‌ سۆسیالیزمێ و خوه‌ستن ب ڕێیا وێ فکرێ، وێ ئیدیۆلۆژیێ ژی کوردان بنده‌ست بهێلن و بکن خولامێن خوه‌. لێ سۆسیالیزم د ده‌مه‌که‌ درێژ دا ب سه‌رنه‌که‌تن و ئه‌و سازیمان تێک چوو.

ژ به‌ر ڤێیه‌ کو نها داگیرکه‌رێن مه‌ دیسا ده‌ست ئاڤێتن ئۆلا ئیسلامێ و ل سه‌ر ناڤێ وێ دخوازن ژ نوو دا بکه‌ڤن ناڤا چالاکیێن نەھێلانا کوردان و وێرانکرنا وه‌لاتێن وان.
داخواز و هه‌لوه‌ست دڤێ ئه‌و به‌ کو کوردێن مسلمان و ئۆلدارێن دینێ ئیسلامێ ڤێ بزانن و فێم بکن کو تم داگیرکه‌رێن مه‌ ئۆل ژ بۆنا هه‌ده‌ف و ئارمانجێن خوه‌ ب کار ئانینه‌.

نها دیسا که‌تنه‌ ناڤا ته‌ڤگه‌را ب ڕێیا ئیسلامێ ئانگۆ ئۆلی کوردان بکن دژمنێن هه‌ڤ، ژ بۆنا کوردستانه‌کا ئازاد و سه‌ربخوه‌ پێک نه‌یێ وێ ئۆلێ ب کار بینن، تینن و ئانینه‌.
باوه‌ری تشته‌کی خوه‌زایی یه‌، کی/ێ ژ چ باوه‌ر بکه‌ ئه‌و هه‌قێ وی/ێ یه‌. لێ نه‌ هه‌قێ چ که‌سانه‌ کو باوه‌ریا خوه‌ ژ بۆنا تێکبرنا کوردان و نه‌بسه‌رکه‌تنا وان ب کاربینه‌.
نها داگیرکه‌رێن مه‌ تشتێن دخوازن بکن ئه‌ڤه‌. یانی ب ڕێیا ئۆلی ل سه‌ر ناڤێ ئیسلامێ کوردان و به‌رژه‌وه‌ندیێن وان ژناڤ ببن.

ده‌ما ئه‌م ڤێ دبێژن؛ ژ به‌ر ڤێ سه‌ده‌مێ یه‌. یا نا کی کیژان ئۆلێ، دینی دپارێزن ب کێفا خوه‌ نه‌. دڤێ ئۆلدارێن مه‌ ڤێ فێم بکن کو د ده‌ستێ ئه‌ردۆگان، مۆڵایێن ئیرانێ و ئه‌سەد دا تم قورانا پیرۆز هه‌یه‌، وێ ڕێ خه‌لکێ ددن و ل گۆر هن ئایه‌ت ئان سوره‌تێن وێ قرکرنا گه‌لێ مه‌ دکن. ئه‌نفال یه‌ک ژ وانه‌. هه‌ڕۆژ ب دارڤه‌کرنا کوردان ل ئیران ژی یه‌ک ژ وانه‌…

بالا خوه‌ بدنێ تم مه‌ش و خوه‌ پێشاندانێن ژ بۆنا قودوسێ ل باژارێ کوردان ل دیاربه‌کرێ پێک تێن و ب سه‌د هه‌زاران کورد به‌شداری تێدا دکن. ژ بۆنا قوردوسێ قرک و گه‌وریێ ل خوه‌ په‌رچه‌ دکن. لێ ژ بۆنا کوشتن و وێرانکرنا کوردان و کوردستانێ ده‌نگه‌کی ب ته‌نێ ژی ژ کوردێن ئۆلدار ده‌رناکه‌ڤه‌. ژ خوه‌ ئه‌ز به‌حسا یێن داگیرکه‌ران ناکم.

لێ ژ بۆنا وێرانکرنا وه‌لاتێ، خوه‌ ژ بۆنا کوشتن و قه‌تلکرنا برایێ خوه‌ ده‌نگ ژ یه‌ک مسلمانێ ژ دینێ ئیسلامێ باوه‌ره‌ ده‌رنه‌که‌ڤه‌. ب سه‌رده‌ ژی ده‌وله‌تێن دۆستانیا کوردان دکن، دخوازن وان بکن دژمنێ گه‌لێ مه‌.
ده‌ما ڕه‌وش ئه‌ڤ به‌، دڤێ تو بزانبه‌ کو داگیرکه‌رێن مه‌ ل سه‌ر کارێن کو ب ڤێ ڕێیێ کوردان به‌ڕا هه‌ڤ بدن. ئه‌و دبینن کو کوردستانه‌کا سه‌ربخوه‌ ل سه‌ر ڕێ یه‌. ئه‌و بخوازن، نه‌خوازن ژی دێ ئه‌ڤ ببه‌. ژ بۆنا ئه‌ڤ نه‌به‌ ژی چ ژ وان تێ کرنه‌ و وێ بکن.

داخوازا من ئه‌ڤه‌ کو ئه‌م کورد هه‌می ل گه‌ل هه‌ڤ ب ئاوایه‌ک ماقوول، بێ کو ئه‌م دژمناتیا هه‌ڤ بکن، د ڤی واری دا ھشیار بن. کی/ێ ل سه‌ر کیژان ئۆلێ ئانگۆ دینی بن، دڤێ ئه‌م هه‌ڤدو وه‌ها قه‌بوول بکن.
ژ برایێ خوه‌ یێن مسلمان ڕا دبێژم؛ نها خه‌ته‌ره‌کا مه‌زن ل پێش مه‌ یه‌. داگیرکه‌رێن مه‌ ب هه‌می هێزا خوه‌ و ب ڕێیا ئۆلی دخوازن ل هه‌مبه‌ر به‌رژه‌وه‌ندیێن کوردان ڕاوه‌ستن. هه‌گه‌ر ئه‌م ب هه‌ڤرا د ڤی واری دا ھشیار بن ئه‌م دێ ب هه‌ڤرا وه‌لاتێ خوه‌ و سه‌رخوه‌بوونا باشوورێ کوردستانێ بپارێزن.

ژ به‌ر کو هه‌تا کورد نه‌بن ده‌وله‌ت وێ هه‌ر کۆلێ خه‌لکێ بن. ژ بۆنا ئه‌م ژ کۆله‌تیێ خلاس ببن، ل سه‌ر مه‌ هه‌ر کورده‌کی فه‌رزه‌ کو ژ بۆنا باشوورێ کوردستانێ ببه‌ ده‌وله‌ته‌کا کوردی یا سه‌ربخوه‌ دڤێ ئه‌م ل هه‌مبه‌ر لیستکێن داگیرکه‌ران ھشیار بن.

2019.06.08

Back to top button